TITUS
Otfrid von Weissenburg, Evangelienbuch
Part No. 98
Previous part

Chapter: 13  
p. 128v    

XIII. PETRUM DIXIT NEGATURUM.


Verse: 1     Zi sineru spráchu druhtin fíang,   \   so Júdas thanan úz gigiang;
Verse: 2     thes náhtes er in zálta   \   reda mánagfalta.
Verse: 3     "Giwísso", quad er, "wízit nú,   \   kíndilin mínu,
Verse: 4     theih bín mit iu in wára   \   lúzila wíla,
Verse: 5     So súachet ir mih héizo   \   joh harto ágaleizo;
Verse: 6     ni hílfit iuih thiu íla   \   thanne in thía wila.
Verse: 7     Ih lazu, ságen ih íu tház,   \   gibót alaníwaz:
Verse: 8     ir iuih mínnot untar íu,   \   so ih iz bílidta fora iu,
Verse: 9     Thaz mánnilih irkénne   \   in themo mínnonne,
Verse: 10     joh ellu wórolt ouh in thíu,   \   mih méistar habetut zi thíu."
Verse: 11     Súntar gruazt er óuh in wár   \   Pétrum sinan thégan thar,
Verse: 12     sprah ímo thero wórto   \   in múat tho filu hárto:
Verse: 13     "Símon, húg es ubar ál   \   thés ih thir nu ságen scal,
Verse: 14     joh harto thénki tharazúa,   \   thaz muat in fíara ni dua:
Verse: 15     Gérota iuer hárto   \   selb ther wídarwerto,
Verse: 16     thaz múasi er rédan iu thaz múat,   \   só man korn in síbe duat.
Verse: 17     Iz was * hárto égislih;   \   tho betota ih sélbo bi thíh,
Verse: 18     in gilóubu ni giwángtis   \   joh múates thih gíhártis.
Verse: 19     Wis ouh dróst séres   \   sár thu thih bikéres,


p. 129r    


Manuscript page: 129r 
Verse: 20     brúadoron thínen,   \   thaz scádon sie firmíden."
Verse: 21     Ér sprah báldlicho   \   joh harto théganlicho,
Verse: 22     quad io gihárteti   \   mit ímo in theru nóti:
Verse: 23     "Mit thír bin garo, drúhtin,   \   mit múate joh mit máhtin,
Verse: 24     in kárkari zi fáranne   \   joh tóthes ouh zi kóronne;
Verse: 25     Gisuíchen sie thir álle   \   nub íh io thíz wolle,
Verse: 26     nub íh giwéizez ubar ál,   \   so man méistere scal!
Verse: 27     Ni sí thir in githánke   \   thaz íh thir io giwénke,
Verse: 28     drúhtin min líobo;   \   thes dúan ih thih gilóubo!"
Verse: 29     Tho zálta Krist thia hérti,   \   theiz álleswio wúrti,
Verse: 30     báldi sines múates   \   joh éllenes gúates:
Verse: 31     "Pétrus, zellu ih thir tház:   \   thaz wíg thaz ist so hébigaz,
Verse: 32     thaz thú gilougnis hárto   \   noh hínaht thero wórto;
Verse: 33     Tház thu quis zi lézist,   \   thaz thú mih sar ni wízist,
Verse: 34     joh suéris filu héizo,   \   ni sís thero ginózo.
Verse: 35     Thu lóugnis min zi wáre,   \   er hinaht háno krahe,
Verse: 36     in nótlichemo thínge,   \   er thaz húan singe;
Verse: 37     Lóugnis thrín stunton   \   mit thínes selbes wórton
Verse: 38     (gihúgi wórtes mines)   \   thes héreren thines!"
Verse: 39     Zi spéri irquam er hárto   \   súlichero wórto;
Verse: 40     tho spráh er wórton héizen,   \   thia kúanheit wolt er wéizen:


p. 129v    


Manuscript page: 129v 
Verse: 41     "Drúhtin min ginádig,   \   thi íh es wurti wírdig,
Verse: 42     mit thíonostu ih biwúrbi   \   thaz ih mit thír irsturbi;
Verse: 43     Thaz suért ni wari in wórolti   \   so harto bízenti,
Verse: 44     odo ouh spér thehein so wás   \   thaz ih rúahti bi tház;
Verse: 45     Wáfan ni wári   \   thaz ih in thíu firbari,
Verse: 46     ni ih gabi séla mina   \   in wéhsal bi thia thína;
Verse: 47     Ther fíant io so hébiger   \   then ih intríati thiu mér,
Verse: 48     thaz mih ío ginotti   \   theih thin firlóugneti!"
Verse: 49     Sie sprachun álle, so man wéiz,   \   so sámalichan úrheiz,
Verse: 50     bihíazun sih zi nóti   \   thera selbun kúanheiti:
Verse: 51     In sélben thaz ni hángtin   \   thaz siẹ ịmo ío giwangtin;
Verse: 52     thehéin thes múate horti   \   in súlicheru nóti.
Verse: 53     "Níst er", quadun, "tháre   \   ther ío thih so irfáre,
Verse: 54     gisúnten uns thir dérien;   \   wir wóllen thih in wérien!" *


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.