TITUS
Otfrid von Weissenburg, Evangelienbuch
Part No. 99
Previous part

Chapter: 14  
p. 129v    

XIV. JUBET UT, CUI DESIT, GLADIUM EMAT.


Verse: 1     "Thánne ih", quad er, "sánta,   \   in min árunti iuih wánta:
Verse: 2     wárd iz iowánne   \   thaz brústi iu wihtes thánne?"
Verse: 3     "Ni wérd iz", quadun, "drúhtin,   \   ni wir fúarin mit ginúhtin;
Verse: 4     thoh unser nihéin wiht drúagi,   \   thoh hábetun wir ginúagi."
Verse: 5     "So wer sékil", quad er, "éigi,   \   ni sí imo in thiu ginúagi,
Verse: 6     wanta iu nu nót wirdit;   \   neme thia dásgun tharmit."


p. 130r    


Manuscript page: 130r 
Verse: 7     Gibót er tho in then nótin,   \   thaz sie sih wárnotin,
Verse: 8     thaz nihéin thes fártes   \   tho thárbeti thar suértes;
Verse: 9     So wélih so iz ni hábeti,   \   gibót er thes gizíloti,
Verse: 10     er úmbi thaz in gáhi   \   thia dúnichun gigábi.
Verse: 11     "Thaz héilege io girédotun,   \   ouh búah fon mir giságetun,
Verse: 12     joh fórasagon zéllent,   \   thio zíti iz nu irfúllent."
Verse: 13     "Drúhtin", quádun se sár,   \   "wir éigun zuei suért hiar
Verse: 14     nu zi thérera fristi   \   in thina fóllusti."
Verse: 15     "Ginúag ist thár", quad er zín;   \   "thiu mugun úrkundon sin,
Verse: 16     thaz wír in mugun wérren   \   in thíu wir tház wollen;
Verse: 17     Nóh ni tharf man zéllen   \   in thiu wir tház irwellen,
Verse: 18     ni búnsih wáfan nerien,   \   gistén wir unsih wérien."


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.