TITUS
Otfrid von Weissenburg, Evangelienbuch
Part No. 100
Previous part

Chapter: 15  
p. 130r    

XV. CONSOLATUR DISCIPULOS DE MORTE EJUS.


Verse: 1     Dróst er sie tho wórto   \   sines tóthes harto,
Verse: 2     er iz zi thíu wurti;   \   es wárun in tho thúrfti.
Verse: 3     "Ni síuz", quad er, "smérza,   \   ni ríaze óuh iuer hérza;
Verse: 4     in got gilóubet joh in míh,   \   giwísso theist gilúmplih.
Verse: 5     Mines fáter hus ist bréit,   \   ward wóla then thara íngeit;
Verse: 6     ther sih thés muaz frówon   \   joh ínnana biscówon!
Verse: 7     Thar ist in álawari   \   mánagfalt gilári
Verse: 8     (húgget therero wórto!)   \   joh selida mánagfalto.


p. 130v    


Manuscript page: 130v 
Verse: 9     Wariz álleswar in wár:   \   sliumo ságetị ih iu iz sár;
Verse: 10     wérgin thaz gizámi:   \   sọ ih íuih iz ni háli.
Verse: 11     Ih faru gárawen iu sár   \   frónisgo iu stát thar,
Verse: 12     ir thés ni missedrúet,   \   mit mír thar iamer búet;
Verse: 13     Thaz thar min géginwerti íst,   \   si íamer iuer náhwist,
Verse: 14     thar ir wízit mina fárt,   \   thero wégọ ouh weset ánawart."
Verse: 15     Zi ímo sprah tho Thómas,   \   er ein thero éinlifo was:
Verse: 16     "thes wéges ni birun wir ánawart,   \   ouh ni wízun thina fárt;
Verse: 17     Giríhti unsih es álles   \   wara thu fáran wolles."
Verse: 18     thaz wára zált er imo sár   \   joh spráh ouh zi imo sús in war:
Verse: 19     "Íh bin weg réhtes   \   joh alles rédihaftes,
Verse: 20     bin ouh líb inti wár;   \   bi thiu ni gírrot ir thar.
Verse: 21     Nist mán nihein, thaz ist wár,   \   ther quéme zi themo fáter sar,
Verse: 22     thes íaman inan gibéite,   \   íh inan ni léite.
Verse: 23     Ób ir mih irknátit,   \   ir sélbon thaz instúantit
Verse: 24     ana lánglicha fríst,   \   wíolih ouh min fáter ist."
Verse: 25     Quad tho Phílippus, iro éin   \   (thiz selba wás imo untar zuéin;
Verse: 26     giloubt er únredina,   \   ther fáter wari fúrira):
Verse: 27     "Then fáter, druhtin, éinon   \   then láz unsih biscówon
Verse: 28     (thin wórt sin ófto giwúag);   \   so ist uns álles ginuag."
Verse: 29     Nám tho druhtin thánana   \   thia selbun únredina;


p. 131r    


Manuscript page: 131r 
Verse: 30     want er in ábuh iz instúant,   \   kert er mo álleswio thaz múat.
Verse: 31     "So mánagfalto zíti   \   ih mit íu bin hiar in wórolti,
Verse: 32     mit múatu ir mir ni náhet   \   joh mih nóh nirknáhet?
Verse: 33     So wér so thaz irwélle,   \   then fáter sehan wólle:
Verse: 34     thánne, thaz ni híluh thih,   \   giwaro sców er anan míh;
Verse: 35     Thar síhit er thaz édili   \   joh sínes selbes bílidi;
Verse: 36     giwisso séh er anan míh:   \   min fáter ist so sámalih!"
Verse: 37     Er zalt in óuh tho thar méist,   \   wio ther héilego géist
Verse: 38     thie wízzi in scolta méron   \   mit sínes selbes léron;
Verse: 39     Nihéinemo ni brústi   \   ni er alla frúma westi,
Verse: 40     allaz wár inti gúat,   \   so sélben gotes géist duat.
Verse: 41     Zálta in ouh in wára   \   wóroltliuto fára,
Verse: 42     árabeiti mánago,   \   thio ín tho warun gárawo.
Verse: 43     Lért er sie mit wórton   \   wio thaz firdrágan scoltun;
Verse: 44     quad after théru thulti   \   zi mámmunte in iz wúrti!
Verse: 45     "Ir ni thúrfut", quad, "bi thíu;   \   fridu lázu ih mit íu,
Verse: 46     mámmunti ginúagaz,   \   drof ni suórget bi tház!
Verse: 47     Ni lázu ih iuih wéison,   \   ih iuer ávur wison;
Verse: 48     gidróstu ih iuih scíoro   \   mit fréwidu alazíoro.


p. 131v    


Manuscript page: 131v 
Verse: 49     Ir bírut, thaz nist wúntar,   \   fríunta mine súntar,
Verse: 50     drúta mine in álawár;   \   zi thiu so kós ih iuih sár.
Verse: 51     Theist gibót minaz zi íu:   \   ir iuih mínnot untar íu,
Verse: 52     joh íagilih thes thénke,   \   thero mínnono ni wénke."
Verse: 53     Ín tho druhtin zélita,   \   want ér se selbo wélita,
Verse: 54     mánota sie thes náhtes   \   mánagfaltes réhtes.
Verse: 55     Er hábet in thar gizáltan   \   dróst mánagfaltan
Verse: 56     fon sin sélbes gúati,   \   so slíumo so er irstúanti.
Verse: 57     Quad after théra fristi   \   in níamer sin ni brústi,
Verse: 58     joh sie íamer sar thaz wúrti,   \   wárin mit giwúrti.
Verse: 59     So er se lérta thó in thera náht,   \   so thú thir thar lésan maht,
Verse: 60     gizóh se thar tho fóllon   \   sélbo in sinan wíllon:
Verse: 61     Úf zi hímile er tho sáh   \   joh sélben gotes lób sprah,
Verse: 62     bifálah tho thie thégana   \   in sines fáter segana;
Verse: 63     Thaz ér mo sie gihíalti   \   unz er fon tóthe irstuanti,
Verse: 64     ér sie thanne sánti,   \   in thíonost sinaz wánti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.