TITUS
Otfrid von Weissenburg, Evangelienbuch
Part No. 101
Previous part

Chapter: 16  
p. 131v    

XVI. EGRESSUS EST POST HAEC TRANS TORRENTEM CAEDRON.


Verse: 1     Er after thésen worton   \   gíang in einan gárton,
Verse: 2     úbar einan klíngon   \   sid tho thésen thingon.


p. 132r    


Manuscript page: 132r 
Verse: 3     Sie ouh zi thíu gifiangun,   \   mit imo sáman giangun,
Verse: 4     festes húges follon,   \   thie nótigistallon.
Verse: 5     Bidrahto iz állaz umbiríng,   \   thaz was nu jámarlichaz thíng:
Verse: 6     ther alla wórolt nerita,   \   tho méra ira ni hábeta;
Verse: 7     Er déta al thaz gidán ist,   \   joh gibit in álla thia wíst,
Verse: 8     thoh ni hábeta er nu, lés!   \   méra thes githígines!
Verse: 9     Thaz wésta selbo Júdas   \   thaz drúhtin thes giwón was,
Verse: 10     thaz er ófto tharaín   \   giwon was gángan mit in.
Verse: 11     Er slíumo sar tho zímo nam   \   thes selben hérizohen man,
Verse: 12     skára filu bréita,   \   joh sie thára leitta;
Verse: 13     Joh thie éwarton réhto   \   liwun fílu knehto,
Verse: 14     thie fárira ouh ginúage   \   zi thémo selben wíge.
Verse: 15     Bigóndun sie sih fázzon   \   mit iro líohtfazzon,
Verse: 16     mit fákolon mánagen   \   joh wáfanon gárawen.
Verse: 17     Ingegin ímo fuar in wár   \   únfirslagan héri thar,
Verse: 18     mánno mihil ménigi   \   (sie wárun einon zuélifi!)
Verse: 19     Mit spéron joh mit suérton;   \   bihíazun sih mit wórton,
Verse: 20     tház man nan gifíangi,   \   mit níawihtu er ningíangi.
Verse: 21     Súme ouh thie ginóza   \   druagun stángun groza,
Verse: 22     kólbon ouh in hénti,   \   thaz síes gidatin énti.
Verse: 23     Zi ín sprah tho Júdas,   \   ther iro léitiri was,


p. 132v    


Manuscript page: 132v 
Verse: 24     fúrista ouh in wára   \   thera ármilichun fára:
Verse: 25     "Thaz ír ni missifáhet   \   (ni wánu ir nan irknáhet),
Verse: 26     séhet then ih kússe,   \   so sít es sar giwísse;
Verse: 27     Ther íst iz, sagen ih íu in wár,   \   then gifháhet ir sár,
Verse: 28     sar zi thémo wipphe,   \   thaz er iu nintslúpfe!"
Verse: 29     (Óda er horta gáhun   \   fon thén theiz gisáhun,
Verse: 30     wíolih er sih fárota,   \   in themo bérge sih gibílidta;
Verse: 31     Tho wánt er in ther nóti   \   sih ánderlichan dáti,
Verse: 32     tház man nan nirknáti   \   joh thiz bi thíu quati;
Verse: 33     Sin kráft ouh thi uns giscríban ist,   \   theiz wari góugulares líst,
Verse: 34     mit thíu sih in biwériti   \   joh síh fon in ginériti.)
Verse: 35     Krist giang fórna, sos iz zám,   \   jóh ingegin ín quam;
Verse: 36     er slíumo sar tho zín sprah:   \   "wenan súachet ir?" quad.
Verse: 37     Sie ímo sar iz záltun   \   joh ínan selbon nántun;
Verse: 38     náles thaz sie iz dátin,   \   thaz síe nan thoh irknátin.
Verse: 39     Zi in spráh er tho sár:   \   "ih bin iz sélbo, thaz ist wár;
Verse: 40     zi gúatu ir min ni rúachet,   \   thoh bín ih then ir súachet."
Verse: 41     So slíumo sie iz gihórtun,   \   sie sar biskránkolotun,
Verse: 42     wídorort sie fúarun   \   joh alle nídarfialun.
Verse: 43     Det er ávur fragun,   \   só sie tho biquámun;
Verse: 44     er eischota ávur sar tho zi ín,   \   wénan sie thar súahtin.


p. 133r    


Manuscript page: 133r 
Verse: 45     Gábun sie mit wórte   \   thaz selba zi ántwurte;
Verse: 46     thaz sélba sie imo ságetun   \   sie híar bifóra zelitun.
Verse: 47     "Ja ságet ih iu", quad er zi ín,   \   "thaz íh ther selbo mán bin
Verse: 48     bi thén ir rehto in wára   \   irhúabut thesa fúara."
Verse: 49     Júdas, ther sie bráhta,   \   sih drúhtine tho náhta,
Verse: 50     thaz ér irfulti állaz   \   so ér hiar fórna gihiaz.
Verse: 51     "Héil", quad er, "méistar!"   \   inti kústa inan sár.
Verse: 52     intfíang er nan mit thúlti   \   thúruh sina mílti.
Verse: 53     Thaz zéichan tho firnámun   \   thie thara mit ímo quamun,
Verse: 54     joh íagilih tho hógeta   \   wio er in ér sageta.
Verse: 55     Stúantun sie tho gáro thar   \   inti fíangun nan sar,
Verse: 56     datun thio iro hénti   \   drúhtin in gibénti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.