TITUS
Otfrid von Weissenburg, Evangelienbuch
Part No. 102
Previous part

Chapter: 17  
p. 133r    

XVII. QUOMODO PETRUS ABSCIDIT AURICULAM SERVO SACERDOTIS.


Verse: 1     Pétrus ward es ánawert   \   joh bratt er slíumo thaz suért,
Verse: 2     er hérzen sih gihárta   \   inti éinan sar irwárta.
Verse: 3     Ih wéiz er thes ouh fárta,   \   thes hóubites rámta,
Verse: 4     tház er thaz gisítoti,   \   then méistar irrétiti;
Verse: 5     Gistuant géner (wan ih) thénken,   \   tház er wolti wénken,
Verse: 6     thoh slúag er imo in wára   \   thana thaz zésua ora.
Verse: 7     Níst ther widar hérie   \   so héreron sinan wérie,
Verse: 8     ther úngisaro in nóti   \   so báldlicho dáti;


p. 133v    


Manuscript page: 133v 
Verse: 9     Ther ana scílt inti ana spér   \   so fram firlíafi in thaz giwér,
Verse: 10     in githréngi so ginóto   \   sinero fíanto!
Verse: 11     Wérit er inan giwísso   \   hárto filu wásso,
Verse: 12     unz imo drúhtin thuruh nót   \   thaz wig sélbo firbot.
Verse: 13     Soso éin man sih scal wérien   \   joh héreron sinan nérien:
Verse: 14     so áht er io ginóto   \   thero Kristes fíanto,
Verse: 15     Unz er sélbo zi imo spráh:   \   "ih mág giwinnan hériscaf,
Verse: 16     éngilo giwélti,   \   ob ih iz dúan wolti.
Verse: 17     Hímilisge thégana,   \   thúsunt filu mánaga,
Verse: 18     sih snéllo héra fuartin   \   joh géginwerte stúantin;
Verse: 19     Thaz síe mih hiar firspráchin,   \   jóh mih sar giráchin,
Verse: 20     irrétitin mit suérton   \   úzar iro hánton.
Verse: 21     Irkenni sélbo thisu wórt   \   joh dúa thaz suert wídorort,
Verse: 22     gilímphit theih thiz wólle   \   joh thaz giscríb irfulle."
Verse: 23     Thés ni was tho duála:   \   so er rúarta imo thaz óra,
Verse: 24     er sáztaz wídar héilaz;   \   ni gilóubtun síe thoh bi tház!
Verse: 25     Thie liuti ráchun tho iro zórn,   \   thes thahtun sie ér ju filu fórn,
Verse: 26     sie ínan sar gibúntun   \   so slíumo sie inan fúntun.
Verse: 27     Thie júngoron thiz gisáhun,   \   inflúhun imo gáhun;
Verse: 28     then méistar io méino   \   líazun sie thar éino!
Verse: 29     Sie sahun úngimacha   \   joh égislicha sácha:


p. 134r    


Manuscript page: 134r 
Verse: 30     drúhtin iro bíntan;   \   ni gidórstun zi imo irwíntan!
Verse: 31     Ánna híaz thar ein mán,   \   Káiphases suéhur, wan;
Verse: 32     zi thémo leittun sie érist   \   selbon drúhtinan Krist.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.