TITUS
Otfrid von Weissenburg, Evangelienbuch
Part No. 103
Previous part

Chapter: 18  
p. 134r    

XVIII. DE NEGATIONE PETRI.


Verse: 1     Petrus fólgeta imo thó   \   rúmana joh férro,
Verse: 2     thaz er biscówoti   \   wáz man imo dáti;
Verse: 3     Zi wíu sie iz ouh bibráhtin   \   joh wáz sie bi inan tháhtin,
Verse: 4     wólt er in then ríuon   \   thaz énti biscowon.
Verse: 5     So ér tho zi einen dúron quam   \   (ih wanu er gíangi zi fram),
Verse: 6     zi imo hárto thar tho spráh   \   thaz wíb thaz thero dúro sah:
Verse: 7     "Ih wánu thu sis réhto   \   thésses mannes knéhto,
Verse: 8     thes sínes gisíndes,   \   thaz, wán ih, thu nu fíndes."
Verse: 9     Tho spráh er fora theru ménigi   \   slíumo thara ingégini,
Verse: 10     lóugnit es álles,   \   quad ni wésti wiht thes mánnes.
Verse: 11     Thar was fíur thuruh tház   \   wánta iz filu kált was;
Verse: 12     thar stuant Pétrus untar ín,   \   sih warmta sáman thar mit ín.
Verse: 13     Sie quadun súme sare:   \   "waz duast thú man hiare?
Verse: 14     thú bist rehto in wára   \   thésses mannes fúara!"
Verse: 15     Er suár tho filu gérno,   \   quad ni wári thero mánno;
Verse: 16     mit éidu iz deta fésti,   \   thaz ér then man ni wésti.
Verse: 17     "Ih ságen iu", quad, "in wára:   \   ni bín ih thera fúara;


p. 134v    


Manuscript page: 134v 
Verse: 18     ni máchon ih then úrheiz,   \   ih wiht ouh súliches ni weiz!"
Verse: 19     Dátun thie ginóza   \   imo ángust ouh tho gróza,
Verse: 20     sie quádun (sum zi nóti),   \   thaz man nan irknáti.
Verse: 21     Thes selben mág es thar giwúag   \   themo er thaz óra thana slúag,
Verse: 22     quad ér nan in ther gáhi   \   in themo gárten gisáhi:
Verse: 23     "Thu dati, ih ságen thir in wár,   \   thaz selba wértisal thar,
Verse: 24     wanta íh gistuant thin wárten   \   thár in themo gárten;
Verse: 25     Thaz wíg thu thar irhúabi   \   joh wérresal ginúagi,
Verse: 26     ahtos únser thuruh nót;   \   ni scáltu queman wídorort!"
Verse: 27     "Ni thárft es", quadun, "lóugnen,   \   thin sprácha scal thih óugen;
Verse: 28     thinu wórt núa   \   thiu méldont thih in dríua!"
Verse: 29     Thó bigond er suérien   \   (er wólta sih ginérien),
Verse: 30     zált in in giwíssi,   \   thaz ér then man ni wéssi;
Verse: 31     Suár in io zi nóti,   \   thaz ér nan sar nirknáti,
Verse: 32     noh er ánarati   \   mit ímo io ni gidáti!
Verse: 33     Wárun tho thie zíti   \   thaz ther háno krati,
Verse: 34     thaz ouh thaz húan gikúndti   \   thes selben dáges kúnfti.
Verse: 35     So er érist tho irkráta,   \   sih Pétrus sar biknáta;
Verse: 36     thaz múat brungun héimort   \   thiu selbun drúhtines wort.
Verse: 37     Yrhógt er tho ginóto   \   théro selbun zíto,
Verse: 38     thaz ímo iz hiar al gáganta   \   thaz drúhtin imo ságeta.


p. 135r    


Manuscript page: 135r 
Verse: 39     Thó bigan er wúafen,   \   zi drúhtine rúafan,
Verse: 40     wéinonnes smérza   \   so rúarta mo thaz hérza;
Verse: 41     Wanta drúhtin in wár   \   ér sah ubar ínan sar,
Verse: 42     bigónda er inan scówon   \   ginádlichen óugon.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.