TITUS
Otfrid von Weissenburg, Evangelienbuch
Part No. 104
Previous part

Chapter: 19  
p. 135r    

XIX. VERBA PONTIFICIS AD JESUM, ET DE FALSIS TESTIBUS.


Verse: 1     Stuant drúhtin innan thés in war   \   fora themo bískofe thar,
Verse: 2     thaz éwiniga wísduam   \   scolta réda thar tho dúan.
Verse: 3     Stúant er thar tho nóton   \   untar fíanton
Verse: 4     in bánton iro séilo;   \   thero fríunto was er éino.
Verse: 5     Fráget er nan sáre   \   bi júngoron síne,
Verse: 6     joh éiskota ouh tho méra   \   bi sínes selbes léra.
Verse: 7     "Thánne ih", quad er, "lérta,   \   iz thisu wórolt hórta;
Verse: 8     in míttemo iro rínge   \   so spráh ih zi iro thínge.
Verse: 9     Thar ih in zálta minu wórt,   \   thar wárun sie al gisámanot;
Verse: 10     óffonota in wára   \   in álla mina léra.
Verse: 11     Ziu thu fráges es míh?   \   thie selbun ríhtent es thíh,
Verse: 12     joh wís duent thih es álles   \   in thíu sies frágen wolles."
Verse: 13     So druhtin tház tho gispráh,   \   ein thero mánno zimo sah,
Verse: 14     slúag inan hárto   \   joh ráfsta ịnan thero wórto:
Verse: 15     "Sprih", quad, "mézworte   \   zi thesemo éwarte;
Verse: 16     er ist hiar hérosto,   \   ni ántwurti so frávilo!"


p. 135v    


Manuscript page: 135v 
Verse: 17     Mit wángon tho bifílten   \   bigán er ántwurten,
Verse: 18     mánota sie thes náhtes   \   thes wízzodes réhtes:
Verse: 19     "Ob íh hiar úbilo gispráh,   \   zéli thu thaz úngimáh;
Verse: 20     spráh ih avur alawár,   \   ziu fíllist thu mih thanne sár?"
Verse: 21     In mórgan sar bi nóti   \   so quam thaz héroti,
Verse: 22     álte joh thie júnge,   \   zi thero bískofo thínge.
Verse: 23     Thie selbun éwarton   \   joh thie héreston
Verse: 24     súahtun ío innan thíu   \   úrkundi lúggu,
Verse: 25     Thaz síe nan thoh mit lúginon   \   móhtin thar birédinon,
Verse: 26     thaz sie irslúagin inan sár;   \   ni fúntun sies giwára thar;
Verse: 27     Thoh iro fílu wari,   \   ni wárd in es gifúari,
Verse: 28     thaz síe nan in ther fáru   \   bizélitin mit wáru.
Verse: 29     Zuene, ságen ih thir tház,   \   thie zaltun ál thaz ni wás:
Verse: 30     quádun sie iz gihórtin,   \   thoh sie niwíht fuartin,
Verse: 31     Thaz kréfto er sih bihíazi,   \   thaz gótes hus zistíazi,
Verse: 32     joh mohti in thrín dagon sár   \   irzímboron iz avur thár!
Verse: 33     Lúgun sie giwísso!   \   drúhtin er ni quád so;
Verse: 34     er quad zilóstin síe iz, in war,   \   thaz ér irquícti iz avur sár;
Verse: 35     Er zéinta, thés sie was ouh óth,   \   sines líchamen tód;
Verse: 36     these méintun avur tház   \   mit stéinon gidánaz!
Verse: 37     ÉEín ist thaz man wékit,   \   fon tóthe man irquíckit;


p. 136r    


Manuscript page: 136r 
Verse: 38     theist ánderlich gimácha   \   thaz man zímborot thia rácha.
Verse: 39     Zi ímo sprah ther bíscof:   \   "gib es ántwurti thoh;
Verse: 40     thu hóris waz sie nénnent   \   joh thih ánazellent!"
Verse: 41     Ni gáb in thiu sin thúlti   \   wiht thes ántwurti;
Verse: 42     ingégin in, so ih ságeta,   \   so stúant er inti thágeta.
Verse: 43     Úf yrscrikta hárto   \   ther furisto éwarto,
Verse: 44     sinan stúal in alawár   \   so liaz er ítalan thar;
Verse: 45     Bizéinta thaz sin wírdi   \   zi niwíhti scioro wúrdi,
Verse: 46     joh scólti werdan ítal   \   thiu sin éra ubar ál!
Verse: 47     "Sís", quad er, "bimúnigot   \   thuruh then hímilisgon got,
Verse: 48     bisuóran thuruh thes fórahta   \   ther alla wórolt worahta,
Verse: 49     Thaz thu unsih nú gidua wís,   \   óba thu gotes sún sis,
Verse: 50     zi Kríste er thih ginánti   \   joh héra in wórolt santi!"
Verse: 51     Ther gótes sun fróno   \   gab ántwurti imo scóno.
Verse: 52     "gidúan ih thíh es", quad er, "wís:   \   ih bin iz réhto ther thu quís;
Verse: 53     Áfter thisu séhet ir   \   (thes gilóubet ir mir)
Verse: 54     mih quéman filu hóho   \   in wólkonon scóno,
Verse: 55     Ouh sizen hérlicho   \   joh filu gúallicho
Verse: 56     after thérera redinu   \   zi selben gótes zesawu!"
Verse: 57     Ther éwarto zi nóti   \   inbran in héizmuati,
Verse: 58     joh sléiz er sin giwáti,   \   sin muat in kúnd gidati,


p. 136v    


Manuscript page: 136v 
Verse: 59     Thaz ther líut westi tház   \   theiz ímo filu zórn was,
Verse: 60     in ábulgi ouh sie wúrtin,   \   mit ímo iz sáman zurntin.
Verse: 61     Zéllu ih ana bága   \   bi thésa selbun frága,
Verse: 62     irkénni in themo múate:   \   ni dét er iz bi gúate;
Verse: 63     Dét er iz then mánnon   \   zi einen frístfrangon,
Verse: 64     thaz síe nan, so ih thir ráchon,   \   mohtin giánabrechon.
Verse: 65     "Ir hórtut", quad, "thaz úngimah,   \   wío er widar góte sprah;
Verse: 66     ni bithúrfun wir in wára   \   nu úrkundono méra.
Verse: 67     Waz er sélbo hiar nu quít,   \   thaz éigut ir gihórit;
Verse: 68     mánnilih nu thénke   \   waz ínan thesses thúnke!"
Verse: 69     Ther líut tho sar giméinta,   \   zi tóthe nan irdéilta;
Verse: 70     quád thes wari wírdig   \   joh hárto filu scúldig.
Verse: 71     Tho spíun sie óuh ubar tház   \   in ánnuzzi sínaz,
Verse: 72     síh ouh thes ni mídun, lés,   \   sines hálsslagonnes!
Verse: 73     Thiu óugun sie imo búntun   \   (thaz in zi spíle funtun)
Verse: 74     joh frágetun ginúagi,   \   wér ịnan thanne slúagi.
Verse: 75     Thaz thúlt er in then stúnton   \   bi únseren súnton,
Verse: 76     ál io theso frávili   \   thuruh thio únsero ubili!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.