TITUS
Otfrid von Weissenburg, Evangelienbuch
Part No. 105
Previous part

Chapter: 20  
p. 136v    

XX. DUXERUNT EUM AD CAIPHAM, UBI ERAT ET PILATUS.


Verse: 1     Tho léittun nan thie líuti   \   thar was thaz héroti;
Verse: 2     ther biscof Káiphas was thár   \   joh ther hérizoho in wár.


p. 137r    


Manuscript page: 137r 
Verse: 3     Giang er sélbo ingegin úz   \   thár zi themo pálinzhus;
Verse: 4     sie ni múasun gan so frám   \   zi themo héidinen man,
Verse: 5     Tház sie in thén gizitin   \   biwóllane ni wúrtin,
Verse: 6     mit réinidu gisémotin,   \   thie óstoron giféhotin;
Verse: 7     Sie wíht thoh thes nintríatun   \   (sie mánslahta ríatun!),
Verse: 8     ni síe thes giwúagin,   \   sie Krístan irslúagin!
Verse: 9     Sprah ther hérizoho zi in,   \   so er úz gigíang ingegin ín:
Verse: 10     "welih rúagstab so frám   \   zéllet ir in thesan mán?"
Verse: 11     Thes árgen willen hérti   \   gab imo ántwurti:
Verse: 12     "ob ér", quad, "wóla thahti,   \   zi thísu er iz ni bráhti;
Verse: 13     Ni fúer er in then líutin   \   mit grozen méindatin,
Verse: 14     wír ouh thes ni tháhtin   \   thaz wir nan thír brahtin."
Verse: 15     Wórton tho ginúagen   \   bigóndun sie nan rúegen,
Verse: 16     thíngon filu hébigen   \   joh súnton filu mánagen;
Verse: 17     Quádun sih bihíazi,   \   er gotes sún hiazi,
Verse: 18     jóh ouh dati mári,   \   er iro kúning wari;
Verse: 19     Zélle ouh in giwíssi,   \   tház er selbo Kríst si,
Verse: 20     in thia béldida gigánge,   \   then námon imo félge.
Verse: 21     Quádun er ni wólti,   \   thaz man zíns gulti,
Verse: 22     thie líuti furdir méra   \   in thes kéiseres éra;
Verse: 23     Joh er thie líuti alle   \   spúani zi giwérre,


p. 137v    


Manuscript page: 137v 
Verse: 24     zi grozemo úrheize:   \   "in thíu man nan firláze.
Verse: 25     Er es ér io nirwánt   \   er er állaz thiz lánt
Verse: 26     gidruabta hárto in waru   \   mit sínes selbes léru;
Verse: 27     Nist thes giscéid noh giwánt,   \   wio er gírrit thaz lánt,
Verse: 28     wio er iz állaz wírrit   \   joh thesa wórolt merrit!
Verse: 29     Bigan er súsliches   \   zi énte thesses ríches,
Verse: 30     mit thiu er thaz lánt al ubargíang,   \   unz man híar nan nu gifíang!"
Verse: 31     "Német inan", quad er, "zi íu;   \   ziu bráhtut ir nan mír bi thiu?
Verse: 32     irdéilet imo tháre   \   so wízzod íuer lére.
Verse: 33     Fíndet ir thar álle   \   wio er thaz réhta wolle:
Verse: 34     thaz gifrúmmet allaz ír;   \   iz ist iu kúnd, nales mír!"
Verse: 35     Thaz, quádun sie, in ni dóhti,   \   ouh wésan thaz ni móhti,
Verse: 36     wanta in thio búah luagin,   \   thaz sie mán sluagin.
Verse: 37     Ther liut mit thíu bizeinta   \   thaz druhtin ér gimeinta,
Verse: 38     thaz er sin líb scolta énton   \   in héithinero hánton;
Verse: 39     Thoh ságen ih iu in war mín:   \   sie warun mánslagon sín,
Verse: 40     zi tóthe sie nan brúngun   \   mit wássidu iro zúngun!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.