TITUS
Otfrid von Weissenburg, Evangelienbuch
Part No. 107
Previous part

Chapter: 22  
p. 138v    

XXII. QUOMODO PILATUS VOLUIT CHRISTUM DIMITTERE PRO BARNABA.


Verse: 1     Giang er, so er tház giquad   \   (ih weiz es wírdig ni ward,
Verse: 2     tház er thaz gihórti   \   waz drúhtin thes giquáti;
Verse: 3     Wane óuh bi thíu so gahti:   \   thes scácheres githáhti;
Verse: 4     mit wéhselu er gisítoti,   \   er selban Kríst irrétiti).
Verse: 5     Spráh er tho zen líutin,   \   sie iz álleswio giríatin;
Verse: 6     "ni fíndu ih", quad er, "thesan mán   \   in niheinen sáchon firdán,
Verse: 7     Ni bín ih ouh thes wísi,   \   oba er thes líbes scolo sí;
Verse: 8     so yrsúaht ih inan thráto   \   sínes selbes dáto.


p. 139r    


Manuscript page: 139r 
Verse: 9     Ja íst iu in thesa zíti   \   zi giwónaheiti,
Verse: 10     ih úzar themo wíze   \   iu einan háft firlaze;
Verse: 11     Nu áhtot wio ir wóllet   \   joh wéderan ir irwéllet,
Verse: 12     ir Barabbásan nemet zíu   \   odo ir nu Kríst irwellet íu!"
Verse: 13     Thanne wás imo avur thér   \   skáhari hébiger;
Verse: 14     bi théro dato ánton   \   so lág er thar in bánton.
Verse: 15     Riaf imo ál ingégini   \   thes lántliutes ménigi;
Verse: 16     quad wár in líob joh súazi,   \   man Barabbán in liazi!
Verse: 17     Tho háft er nan, so er wólta,   \   joh er nan sélbo fílta,
Verse: 18     selbon drúhtinan;   \   waz wan ther wénego man!
Verse: 19     Námun nan tho thánana   \   thes hérizohen thégana,
Verse: 20     sie flúhtun in zi gámane   \   thórna thar zisámane,
Verse: 21     Joh sáztun sie imo in hóubit   \   then selbon thúrninan ríng,
Verse: 22     zi hónidon gérno:   \   coróna thero thórno!
Verse: 23     Sie námun in thera dáti   \   kúninglih giwáti,
Verse: 24     fílu rotaz púrpurin,   \   inti dátun inan ín;
Verse: 25     Fialun thó in iro knío,   \   zi hue hábetun inan ío,
Verse: 26     zi bísmere thráto   \   súslichero dáto!
Verse: 27     "Heil thu", quádun sie, "Kríst!   \   thu thérero liuto kúning bist;
Verse: 28     bist gáro ouh thiu gilícho   \   joh harto kúninglicho!"
Verse: 29     Zi hónidu imo iz dátun   \   thaz sie súlih quatun;


p. 139v    


Manuscript page: 139v 
Verse: 30     sie tháhtun io bi nótin   \   wío sie inan gihóntin.
Verse: 31     Sie slúagun sar thén gangon   \   thiu héilegun wángun,
Verse: 32     joh hérton in then fáron   \   so blúun sie imo thiu órun.
Verse: 33     Er thúlta, so ih hiar fóra quad,   \   bi únsih suslih úngimah
Verse: 34     in slégin joh in wórton,   \   bi únsen suaren súnton!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.