TITUS
Otfrid von Weissenburg, Evangelienbuch
Part No. 109
Previous part

Chapter: 24  
p. 140v    

XXIV. VOLUIT PILATUS JESUM DIMITTERE, ET QUIA TRADIDIT EUM EIS.


Verse: 1     Pilátus was tho in flízi   \   tház er nan firlíazi,
Verse: 2     tház er in ni hórti   \   joh námi ir thera nóti.
Verse: 3     Stímma sie iro irhúabun,   \   so síe tho thaz insúabun,
Verse: 4     ingégin skrei ginóto   \   al ménigi thero líuto:
Verse: 5     "Thih zihen únhuldi   \   bi míchileru scúldi,
Verse: 6     thaz thú sus laz in héila hant   \   thes kéiseres fíant.
Verse: 7     Er war állaz thiz lant,   \   bi thiu gábun wir nan thír in hant;
Verse: 8     then líut spuan úrheizes,   \   thu sús inan nu lázes?
Verse: 9     Ther man thaz giágaleizit   \   thaz sih kúning heizit:
Verse: 10     ther wídorot in alawár   \   themo kéisore sar!"
Verse: 11     Giang Pilátus zi ín tho frám   \   joh selbon Kríst mit imo nam;
Verse: 12     "waz mag ih zéllen", quad er, "mér?   \   hiar eggo kúning iuer!"


p. 141r    


Manuscript page: 141r 
Verse: 13     Ingégin riaf tho lúto   \   hériscaf thero líuto,
Verse: 14     irscrírun filu gáhun   \   so sie inan ánasahun:
Verse: 15     "Hína, hina ním inan   \   inti crúzo then mán!
Verse: 16     sin gisíuni ist uns in wár   \   zi sehanne úrgilo suar!"
Verse: 17     Quad Pilátus: "wio mag sín   \   thaz quéme io thaz in múat min,
Verse: 18     theih io zi thíu gifahe,   \   ih iuan kúning hahe?"
Verse: 19     Thie bískofa zi nóti   \   firspráchun tho thie líuti,
Verse: 20     firsúahun sino gúati,   \   joh selb thaz héroti:
Verse: 21     "Wir eigun kúning einan,   \   ánderan nihéinan,
Verse: 22     joh wanen wáltan wolle   \   ther kéisor ubar álle."
Verse: 23     Ther líut mit thisu imo ánalag   \   unz selban mítten then dág;
Verse: 24     ni móht er sie io giwéichen   \   thes willen ármalichen.
Verse: 25     Tho wúasg er sino hénti;   \   er wólt es duan tho énti,
Verse: 26     sih wolt er réhto ubarlút   \   néman ir thera léidunt.
Verse: 27     "Ni wíll ih", quad, "in war mín   \   sínes bluates scólo sin,
Verse: 28     noh ouh thérero dato   \   plégan borathráto;
Verse: 29     Ir sélbo iz hiar nu scówot!"   \   tho riaf ther líut al thuruh nót,
Verse: 30     in sih sélbon ana rúah   \   luadun míhilan flúah:
Verse: 31     "Nim thana gáralicho thíh!   \   sin blúat si ubar únsih,
Verse: 32     iz fólge ouh, so wir zéllen,   \   unsen kíndon allen!"
Verse: 33     Ni wést er thóh tho waz er wán,   \   firlíaz in then firdánan man;


p. 141v    


Manuscript page: 141v 
Verse: 34     thia fruma líazun sie fon ín   \   joh námun grozan scádon zi in!
Verse: 35     Tho irdéilt er thaz sie dátin   \   só sie thar tho bátin;
Verse: 36     gibót thaz man nan námi,   \   then líutin irgábi;
Verse: 37     Irgáb er nan, so ih zálta,   \   síd er nan bifílta,
Verse: 38     joh wórahtun sie tho fóllon   \   then iro múatwillon.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.