TITUS
Otfrid von Weissenburg, Evangelienbuch
Part No. 110
Previous part

Chapter: 25  
p. 141v    

XXV. PAUCA SPIRITALITER.


Verse: 1     Ih wólta hiar gizéllen,   \   er síe nan sus nu quéllen,
Verse: 2     tho man nan bísmerota,   \   wio er únsih mit thiu nérita;
Verse: 3     Wio wúntarlicho er uns gihálf,   \   thó man thiz in ínan warf,
Verse: 4     ginádlicho unsih rétita,   \   tho thíz man imo sítota.
Verse: 5     Thio súnta thio unsih stéchent   \   joh sih in úns rechent --
Verse: 6     bizéinont thaz thie thórna   \   thie wír hiar lasun fórna;
Verse: 7     Sie stéchent unsih séro   \   joh wúntont filu suáro,
Verse: 8     duent se únsih únguate   \   mit súntlichemo blúate.
Verse: 9     Zéinot ouh thio dáti   \   thaz púrpurin giwáti,
Verse: 10     ther selbo dúah roto   \   héidinero líuto;
Verse: 11     Thie lúad er thó thar ufan síh   \   (giwísso thaz ni híluh thih)
Verse: 12     mit sínes selbes wírdin   \   irlósta unsih thera búrdin;
Verse: 13     Er nágalta sie in thaz crúzi   \   inti thúlta bi unsih wízi,
Verse: 14     joh thólota bi únsih allaz tház,   \   thaz uns es íamer si the báz!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.