TITUS
Otfrid von Weissenburg, Evangelienbuch
Part No. 112
Previous part

Chapter: 27  
p. 143r    

XXVII. QUOMODO CLAVIS EUM FIXERUNT, ET TITULUS PILATI.


Verse: 1     Ni námun sie thía meina   \   thero wíbo klaga góuma,
Verse: 2     nihéin tharzua ouh húgita   \   zi theru thráu thia er in zélita.
Verse: 3     Léitun sie ouh tho tháre   \   scáchara úrmare
Verse: 4     zuéne zi themo wíze,   \   thie stálun er zi flíze.
Verse: 5     Ih wéiz sie thaz ouh wóltun,   \   mit súntigon nan záltun,
Verse: 6     mit thén wurti ouh firméinit   \   so alt giscríp uns zéinit.
Verse: 7     In thaz crúci sie nan nágultun,   \   so síe iz zi thiu gisítotun,
Verse: 8     mit fúazin joh bi hánton   \   mit thráto herten bánton.
Verse: 9     Yrhúabun sie úf in alawár   \   then kuning hímilisgan thár,
Verse: 10     then kéisor mit then máhtin,   \   sélbon unsan drúhtin.


p. 143v    


Manuscript page: 143v 
Verse: 11     Er wás thar mit giwélti,   \   thóh er súlih thúlti;
Verse: 12     bi únsih er iz thóleta,   \   so ih hiar fóra zelita.
Verse: 13     Mit théru diurun líchi   \   so lost er wóroltrichi,
Verse: 14     ménnisgon ouh álle   \   mit sínes todes fálle.
Verse: 15     Bi unsih góz er hiar sin blúat,   \   thaz iamer ánder ni dúat:
Verse: 16     er détaz hiar nu fésti,   \   thaz gúates uns ni brústi.
Verse: 17     Sie dátun, so ih zélita:   \   in thaz crúci man nan nágalta,
Verse: 18     so sie tho fástos móhtun,   \   joh thar nan úf irrihtun;
Verse: 19     Tho zéintun wóroltenti   \   sínes selben hénti,
Verse: 20     thaz hóubit hímilisga múnt,   \   thie fúazi ouh thesan érdgrunt.
Verse: 21     Thaz wás sin al in wára   \   úmbikirg in fíara,
Verse: 22     óbana joh nídana;   \   so wóla thie sine thégana!
Verse: 23     Pilátus huab giscríbana   \   sínes selbes rédina
Verse: 24     úbar sinaz hóubit   \   (thaz wórolt al gilóubit):
Verse: 25     "Héilant ther wáro,   \   fon Názaret ther máro;
Verse: 26     ist kúning er githíuto   \   júdisgero líuto."
Verse: 27     Tho quatun thie éwarton:   \   "ni scríb iz so then wórton;
Verse: 28     scríb thaz er iz quáti   \   joh sulih sélbo marti."
Verse: 29     Tho gab er ántwurti,   \   quad álleswio iz ni wúrti;
Verse: 30     "thaz ih scréib, in alawár,   \   thaz stéit imo giscríban thar!"


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.