TITUS
Otfrid von Weissenburg, Evangelienbuch
Part No. 114
Previous part

Chapter: 29  
p. 144v    

XXIX. MYSTICE.


Verse: 1     Bizéinot thisu túnicha   \   racha díurlicha;
Verse: 2     giwár es wis giwísso,   \   harto límphit iz so:
Verse: 3     Bizéinot thiu ira rédina   \   thie sélbun Kristes thégana,
Verse: 4     sint sie álang io zi gúate   \   joh harto fástmuate;
Verse: 5     Sie sínt al éinmúate   \   zi allemo ánaguate
Verse: 6     joh sínt io mit ébine   \   mit mínnu al untarwébane.
Verse: 7     Wólt er sie gisámanon   \   mit fílu kleinen fádomon,
Verse: 8     er sélbo sie birúachit,   \   bi thiu níst thar wiht gidúachit;
Verse: 9     Ouh síh tharzua ni náhit   \   wíht thes ist gináit
Verse: 10     (úngimaches múates),   \   noh wíht thes ist gidúahtes.
Verse: 11     Gilóubent sie io réhtes   \   in líchamon Krístes,
Verse: 12     in sina ménnisgi,   \   mit thiu thékent sie nan úmbi.
Verse: 13     Thie gotes drútthegana   \   thaz sínt thie sconun fádama,
Verse: 14     mit ín ist io mit ébinu   \   thiu túnicha giwébinu;
Verse: 15     Thiu túnicha thiu gúata,   \   bi thia ther lóz suanta,
Verse: 16     thaz si álang mit giwúrti   \   giháltinu wúrti;
Verse: 17     Theiz wári so gispróchan,   \   ni wúrti wiht firbróchan,
Verse: 18     thaz iro nihéin ni wari   \   thaz wíht ira firzári;
Verse: 19     Joh sie thés gizami   \   thaz sia éinlicher námi,


p. 145r    


Manuscript page: 145r 
Verse: 20     thes wúrti ouh thar giflízan,   \   ni wúrti wiht firslízzan.
Verse: 21     Was sí nu thero wórto   \   unwírdig filu hárto,
Verse: 22     thaz íaman thaz thar spráchi   \   thaz wíht ira firbráchi,
Verse: 23     Wánta sia span scóno   \   káritas in fróno,
Verse: 24     si thie fáduma alle gáb   \   joh sia sélbo giwáb.
Verse: 25     Giwísso, so ih thir zéllu,   \   thiu wérk bisihit si éllu;
Verse: 26     si iz allaz góte reisot   \   joh sínen io gizéigot.
Verse: 27     Ni wáne theih thir gélbo:   \   thia túnichun span si sélbo,
Verse: 28     sélbo wab si Kríste tház,   \   bi thiu íst iz allaz so álangaz;
Verse: 29     Joh si iz állaz gimáz   \   so Kristes líchamen saz,
Verse: 30     scóno si iz gifúagta   \   so drúhtin selbo súahta;
Verse: 31     Giscáffota sia sóso iz zám,   \   joh só siu bézist biquam,
Verse: 32     mit fílu kleinen fádamon   \   joh únginaten rédinon,
Verse: 33     Kléinero gárno,   \   thaz déta si Kríste gerno;
Verse: 34     was giwéban ubar ál   \   so man éinegen scal.
Verse: 35     Bisáh si iz iogilícho   \   thrato líublicho,
Verse: 36     giwáralicho in thráti   \   thaz séltsana giwáti;
Verse: 37     Tház thar wiht ni rómeti,   \   so er sih iz ána legiti,
Verse: 38     biquami zíoro ana wánk   \   thaz selba fróno gifank;
Verse: 39     Joh thár, soso iz zámi,   \   wiht fúlteres ni wári,
Verse: 40     thaz sih zi thíu gifiarti,   \   thia Kristes líh biruarti;
Verse: 41     Biquámi ouh scóno ubar ál,   \   so fadum zi ándremo scal,
Verse: 42     sih untar ín ruartin,   \   zisámane gifúagtin.


p. 145v    


Manuscript page: 145v 
Verse: 43     Sélbo si thaz wólta,   \   tho si Kríste scolta,
Verse: 44     thaz si in théra nahi   \   sélbo iz al bisáhi;
Verse: 45     Theiz wari in álalichi   \   thera sínera líchi,
Verse: 46     wíht ni missihúlli,   \   sid sí sia selbo spúnni;
Verse: 47     Thaz níaman thar ni ríafi,   \   sid sí sia selbo scúafi,
Verse: 48     thaz wíht thar míssihúlli   \   thes líchamen fólli;
Verse: 49     Súntar selb si in gáhi   \   Kristan ánasahi,
Verse: 50     joh sélbon scówoti ana wánk,   \   tho simo skúaf thaz gifánk.
Verse: 51     Káritas thiu gúata   \   si sélbo iz sus gifúagta;
Verse: 52     si noh híutu ana wánk   \   wibit Kríste sin gifank.
Verse: 53     Nist wiht so rédihaftes   \   (drof ni zuífolo thu thés,
Verse: 54     laz thir quéman iz in múat)   \   so thaz káritas giduat;
Verse: 55     Si líuzit iz al thanana uz   \   zi themo drúhtines hus,
Verse: 56     si ist álla zit iowánne   \   símbolon tharínne.
Verse: 57     Súmenes farent thánana   \   thio iro suéster zuá,
Verse: 58     afur thísu in min wár   \   ist émmizigen ío thar!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.