TITUS
Otfrid von Weissenburg, Evangelienbuch
Part No. 115
Previous part

Chapter: 30  
p. 145v    

XXX. DE IRRISIONE SACERDOTUM ET OMNIUM PRAETEREUNTIUM.


Verse: 1     Sih fuarun thrángonti   \   umbi ínan tho thie líuti,
Verse: 2     
intéretun nan hérton   \   mit iro skéltworton.
Verse: 3     
Thar stúantun tho ginúage   \   inti hábetun nan zi húahe,
Verse: 4     
zi bísmere hárto   \   mit íro selben wórto.
Verse: 5     
Álle thie thar wárun,   \   joh ouh thar fúrifuarun,


p. 146r    


Manuscript page: 146r 
Verse: 6     
zúrntun thia gimácha   \   sínes selbes rácha.
Verse: 7     
Sie wégitun iro hóubit   \   joh sprachun úbilo tharmít,
Verse: 8     
spráchun tho zi nóti   \   thaz iro héizmuati:
Verse: 9     
"Wóla weing, zi zórne   \   bihíaz sih ther ju wánne,
Verse: 10     
thaz móht er thaz giflízan,   \   thaz gótes hus zislízan;
Verse: 11     
Joh thaz er móhti avur thár   \   iz eino irzímboron sár,
Verse: 12     
joh dáti thiu sin gúati   \   theiz thrítten dages stúanti!
Verse: 13     
Senú, hánget er thár,   \   nóh ni mag ni wédar sar
Verse: 14     
thes húses wiht bithíhan   \   noh hera nídarstigan;
Verse: 15     
Nu hélf er imo sélben   \   úfan themo gálgen,
Verse: 16     
in scántu thesses tóthes;   \   thaz wízi mánot inan thes!
Verse: 17     
Óba thu sis gótes sun,   \   stig nu nídar herasun;
Verse: 18     
thes sélben ouh giflízes,   \   thih lóses thesses wízes!"
Verse: 19     
Thie selbun éwarton   \   hóntun nan mit wórton,
Verse: 20     
scúltun nan zi flíze   \   in thémo selben wíze.
Verse: 21     
Thio ármilichun wízzi   \   imo dátun ítwizzi,
Verse: 22     
siez állaz frámbrahtun   \   so wás sies thó githáhtun.
Verse: 23     
Ingegin ímo wás thar   \   fílu manag lástar,
Verse: 24     
thaz scéltan líezun se allaz frám   \   thaz in zi múate tho biquam.
Verse: 25     
"Já héilt er", quadun, "líuti   \   mit sínes selbes dáti;
Verse: 26     
ni mag biwérban   \   thaz síh giheile sélban!


p. 146v    


Manuscript page: 146v 
Verse: 27     
Dua noh híutu unsih wís,   \   óba thu unser kúning sis,
Verse: 28     
so stig nídar hera in wár,   \   wir gilóuben thir sár!
Verse: 29     
Stíg fon themo bóume,   \   tház man thir gilóube;
Verse: 30     
innágili thih thánana,   \   wir wérden thine thégana!
Verse: 31     
firsáh er sih in gót;   \   scirm er ímo, nu ist es nót,
Verse: 32     
thaz séhet ir hiar nu álle;   \   nu hélf er mo ob er wólle!
Verse: 33     
Nist thiz álleswanana   \   ni si sínes selbes rédina;
Verse: 34     
thaz det er sélbo mari,   \   er gotes sún wari."
Verse: 35     
Thaz was nu jámarlichaz thíng;   \   thaz fólc thaz stúant thar umbiríng,
Verse: 36     
ni wárun in then liutin   \   thie sulih ríwetin!


Next part



This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.