TITUS
Otfrid von Weissenburg, Evangelienbuch
Part No. 130
Previous part

Chapter: 7  
p. 160r    

VII. MARIA AUTEM STABAT AD MONUMENTUM.


Verse: 1     Maríun thes thoh io nirthróz,   \   stuant úzana thes grábes, roz
Verse: 2     zi stéti thar ginóto,   \   si mínnota inan thráto;
Verse: 3     Hábeta si nu in war mín   \   minna míhilo sin,
Verse: 4     míhilo líubi,   \   thes wórtes mir gilóubi,
Verse: 5     Minna míhilo ubar ál,   \   so íh thir hiar nu ságen scal:
Verse: 6     thie drúta giangun thana sár;   \   si stuant thoh, wéinota thar,
Verse: 7     Si thia stát noh tho nirgáb   \   joh luagata ávur in thaz gráb;
Verse: 8     si ávur thar tho súahta,   \   so hárto siu sin rúahta.
Verse: 9     Ther mán ther thaz súachit   \   thes er hárto ruachit:
Verse: 10     thar er es míthont mista in wár,   \   er kérit, suachit ávur thar.
Verse: 11     Thiz wíb ouh thaz hiar sítota --   \   si iz al irsúachit habeta;
Verse: 12     ni súahta siu thar thes thiu mín,   \   luaget ávur tho tharin.
Verse: 13     Tho sah si sízzan scóne   \   thar éngila zuéne,
Verse: 14     sie warun frónisg filu fram,   \   so in Krístes selben grábe zam.
Verse: 15     Zi then fúazon saz ther éino,   \   thar Kríst lag dóter eino,
Verse: 16     zen hóubiton ther ánder,   \   thar ther líchamo lag er.
Verse: 17     Sie spráchun thio únthulti   \   joh wáz si thara wólti;


p. 160v    


Manuscript page: 160v 
Verse: 18     ira múat sie ouh sértun,   \   thaz sie thes frágetun.
Verse: 19     "Wib, ziu kúmistu thar?   \   wenan súachistu sar?
Verse: 20     waz úngifuaro thinaz íst,   \   so úngimacho ríuzist?"
Verse: 21     "Mág mih", quad si zi in tho, "lés!   \   gilusten wéinonnes,
Verse: 22     sér joh léid ubar wan   \   ist mir hárto gidan;
Verse: 23     Háben ih zi klágonne   \   joh léidalih zi ságenne,
Verse: 24     ni wéiz ih, les! in gáhe,   \   war ih iz ánafahe.
Verse: 25     Thaz sér thaz thar ruarit míh,   \   theist léidon allen úngilih,
Verse: 26     iz ubarstígit noti   \   allo wídarmuati;
Verse: 27     Mir ist sér ubar sér,   \   ni ubarwíntu ih iz mér,
Verse: 28     ni wán es untar manne   \   íamer dróst giwinne!
Verse: 29     Sie éigun mir ginómanan   \   liabon drúhtin minan,
Verse: 30     thaz min líaba herza,   \   bi thiu rúarit mih thiu smérza.
Verse: 31     Ni wás in thar ginúagi   \   tház man nan irslúagi,
Verse: 32     súntar se ouh biwúrbin   \   tház sie nan gibúrgin;
Verse: 33     Thaz fríunt nihein ni wésti   \   wío man nan firquísti,
Verse: 34     joh wío man nan firduásbti   \   mir zi léidlusti!
Verse: 35     Bi thiu, fró min, so ih iu rédinon,   \   ni még ih thaz irkóboron,
Verse: 36     theih iamer fráwolusti   \   giláze in mino brústi;
Verse: 37     Joh, so íh iu hiar nu zéllu,   \   wárd mir wé mit mínnu,
Verse: 38     theih sino líubi in mih gilíaz,   \   ob ih sia níazan ni muaz!


p. 161r    


Manuscript page: 161r 
Verse: 39     Oba íaman thoh giquáti   \   wára man nan dáti,
Verse: 40     ódo mir gizéliti   \   wára man nan légiti,
Verse: 41     Thaz íh thoh in thera dóti   \   waz thíonestes gidáti
Verse: 42     themo líeben manne:   \   waz wári mir thánne!"
Verse: 43     So slíumo si tho thaz gispráh,   \   si sár io wídorort bisah;
Verse: 44     thar sah si drúhtin stantan   \   joh hábeta inan fúntan.
Verse: 45     Si wíht thoh sin nirknáta   \   joh giwísso wanta,
Verse: 46     theiz in álawari   \   ther gártari wari.
Verse: 47     Frágeta er sa sáre,   \   ziu si rúzi thare;
Verse: 48     waz súahti si so hárto   \   thero klágontero worto.
Verse: 49     "Fró min!" quad si, "dua mih wís,   \   oba thú nan námis,
Verse: 50     joh wára thiu thin gúati   \   then minan líobon dati;
Verse: 51     Ih giágaleizon, thaz ist wár,   \   thaz íh inan gihólon thar,
Verse: 52     ni klékent mir zi héiti   \   thie liebun árabeiti."
Verse: 53     Ni nánta si nan dróf er   \   thuruh thaz míhila ser;
Verse: 54     si wanta in álafesti   \   thaz mánnalih iz westi.
Verse: 55     Bi námen er sa nánta,   \   joh sí nan sar irkánta;
Verse: 56     zi fúazon si sar ílta,   \   thes híaz er sia duan bíta.
Verse: 57     "Inthábe", quad er zi iru, "thíh,   \   drof ni rúari thu mih!
Verse: 58     ni fúar ih noh nu thárawert   \   in mínes fater géginwert.
Verse: 59     Gizeli wórton thinen   \   then brúadoron minen,


p. 161v    


Manuscript page: 161v 
Verse: 60     thaz hábes thu irfúntan   \   theih bin fon tóde irstantan;
Verse: 61     Joh theih fáru in rihti   \   in sines sélb gisihti,
Verse: 62     in frónisgi gisíunes   \   thes drúhtines mínes.
Verse: 63     Zél in, thu ther bóto bist,   \   er gót joh iro fáter ist,
Verse: 64     thaz lázen sie in wára   \   thia úngilouba in fíara."
Verse: 65     Ni déta si thes tho bíta,   \   zen júngoron si sar ílta,
Verse: 66     sageta in thó thaz si nan sáh,   \   joh wórt thiu er zi íru sprah.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.