TITUS
Otfrid von Weissenburg, Evangelienbuch
Part No. 133
Previous part

Chapter: 10  
p. 164r    

X. APPROPINQUABANT CASTELLO.


Verse: 1     Sih náhtun sie tho álle   \   zi themo kástelle,
Verse: 2     thára zen iro sélidon   \   mit thésen selben rédinon.


p. 164v    


Manuscript page: 164v 
Verse: 3     Tho dét er selb so er wólti   \   joh rúmor fáran scolti;
Verse: 4     tho nóttun sie nan ginúagi,   \   thaz er mit ín giangi.
Verse: 5     "Ni dúa thir", quadun, "thia árabeit,   \   wanta áband unsih ánageit;
Verse: 6     wis mit úns hinaht,   \   wanta fúrdir thu ni máht.
Verse: 7     Ni scaltu io nú so gidúan,   \   wir gében thir hinaht suásduam;
Verse: 8     ni weiz wár thu iz avur fíndes,   \   ther dág ist sines síndes."
Verse: 9     Ih wéiz sie filu hárto   \   tháhtun thero wórto,
Verse: 10     thiu ín thar warun méista   \   thes sines tódes drósta,
Verse: 11     Fon Móysese sélben   \   joh fórasagon állen,
Verse: 12     wio iz tharána ist al gizált,   \   er tódes duan scoltạ úbarwant.
Verse: 13     Dét er so sie quátun   \   joh ínan ouh tho bátun,
Verse: 14     ál so sie nan béitun,   \   in hús inan giléitun;
Verse: 15     Tho wán ih sie gisázin,   \   tház sie saman ázin,
Verse: 16     irbútun ímo tho iro gúat,   \   so man líobomo duat.
Verse: 17     Nám er tho thaz selba brót   \   joh then júngoron iz bot;
Verse: 18     thiu gísiuni in sih indátun,   \   joh ínan sar irknátun.
Verse: 19     Tho ward in álagahun   \   sin wíht sar ni gisáhun;
Verse: 20     sar io in théra fristi   \   tho ruartun se ángusti.
Verse: 21     Wárd in sár tho filu léid   \   thaz er sih sár fon in firméid,
Verse: 22     thaz múasin sih sin frówon   \   joh inan lángo scouon.
Verse: 23     Sah ein zi ándremo   \   joh fórahtun in slíumo,


p. 165r    


Manuscript page: 165r 
Verse: 24     irquamun úngimezen   \   thes líaben gimazen,
Verse: 25     Thaz síe sin so firmístun,   \   só sies wiht ni wéstun,
Verse: 26     jóh inslúpta in gahun   \   then míthont se ánasahun!
Verse: 27     Bigondun thíngon tho untar ín,   \   wio er giang kósonti mit ín,
Verse: 28     waz es thie búah quatun,   \   sie wíht thoh sin nirknátun;
Verse: 29     Wio thaz hérza bran in ín   \   unz er thíngota mit ín,
Verse: 30     thuruh thio ángusti   \   joh sines líubes lusti!
Verse: 31     Sie sar io thén stuntun   \   wídarortes wúntun,
Verse: 32     thaz síe sih tho gidúamtin,   \   then júngoron es girúamtin.
Verse: 33     Giwisso ságen ih thir éin:   \   sie záltun sar tho thésen zuein,
Verse: 34     thaz inan Pétrus gisah,   \   joh sélbo er ouh mit ímo sprah;
Verse: 35     Sie in tho réda datun,   \   wio síe nan ouh irknátun,
Verse: 36     joh wío sie in thera férti   \   giangun kósonti.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.