TITUS
Otfrid von Weissenburg, Evangelienbuch
Part No. 134
Previous part

Chapter: 11  
p. 165r    

XI. STETIT JESUS IN MEDIO DISCIPULORUM SUORUM.


Verse: 1     Warun thie júngoron tho   \   bi fórahtun thero Júdono
Verse: 2     thuruh míhila not   \   in einaz hús gisamanot;
Verse: 3     Then búachon maht thar wárten:   \   dúron so bispárten
Verse: 4     stúant er untar mítten   \   thes sélben dages thrítten.
Verse: 5     (Ni zemo ántdagen mín   \   quam er ávur sama zi in,
Verse: 6     wanta, ih ságen thir in wár,   \   sie wárun avur sáman thar;
Verse: 7     Sie flúhun ouh then selbon nót);   \   joh er in frído sar irbót,


p. 165v    


Manuscript page: 165v 
Verse: 8     gab frído (so ih thir rédinon)   \   then sinen drúttheganon;
Verse: 9     Ouh blías er sie ána (so thu wéist)   \   then selbon héilegon géist,
Verse: 10     thia selbun kráft sina,   \   thaz gihíaz er in ju wíla.
Verse: 11     "So wémo ir", quad, "gihéizet,   \   ir súnta mo bilázet --
Verse: 12     giwisso wízit ana wán,   \   ist mína halbun sar gidán;
Verse: 13     Then ír iz avur wízet,   \   in súnta ni bilázet --
Verse: 14     theist ouh fésti ubar ál   \   ána theheinig zwíval!"
Verse: 15     Firgáb in thaz zi rúame   \   theiz wari in íro duame,
Verse: 16     thaz sies álles wialtin   \   so wío so siez giríatin;
Verse: 17     Thaz sies wíaltin filu frám,   \   so gotes théganon gizám,
Verse: 18     joh sar io in théru fristi   \   iz wári filu fésti.
Verse: 19     Tho wúrtun sie gidrúabte   \   zwívalemo múate,
Verse: 20     ni gilóubtun thesa rédina   \   thuruh thes hérzen frewida.
Verse: 21     Ni dét er thes tho bíta,   \   hiaz rúaren sina síta;
Verse: 22     sie hénti ouh sino rúartin,   \   thaz sie ni zwívolotin.
Verse: 23     Thaz deta drúhtin thuruh tház   \   want er giwúntoter was,
Verse: 24     thaz sie álleswio ni dátin,   \   bi thíu nan thoh irknátin.
Verse: 25     Want ér ward thar giwáro   \   giwúntot filu suáro,
Verse: 26     zi férehe gistóchan;   \   iz wárd thoh sid giróchan.
Verse: 27     Síe ouh tho so dátun   \   joh noh tho zuívolotun;
Verse: 28     was in thaz hérza filu fró,   \   bi thiu wúntorotun sie sih só.


p. 166r    


Manuscript page: 166r 
Verse: 29     So gibúrit mánne   \   thara er so gínget thanne:
Verse: 30     gisihit thaz súaza liabaz sín,   \   thoh fórahtit theiz ni mégi sin.
Verse: 31     Súlih hiar ouh rúarta   \   thie selbun Krístes druta;
Verse: 32     sie hábetun nan in hánton   \   hérzen zuívolonton.
Verse: 33     Híaz er imo thánne   \   geban zi ézanne;
Verse: 34     noh warun zuíviline   \   thie selbun drúta sine.
Verse: 35     Sus lókota er mit mínnon   \   thie drutménnisgon,
Verse: 36     sus io thésen datin,   \   tház sie nan irknátin;
Verse: 37     Thaz fón in wurti fúntan   \   thaz ér was selbo irstántan,
Verse: 38     joh sie giwísso ouh wéstin   \   thaz ér stuant fon then réstin.
Verse: 39     Wanta iz mag man wízan:   \   ther the wilit ézan,
Verse: 40     thaz inan líb ruarit,   \   joh líchamon fuarit.
Verse: 41     Áz er fora in tho tháre,   \   thaz wéstin sie zi wáre,
Verse: 42     thaz er thaz férah habeta,   \   in líchamen lebeta.
Verse: 43     Tho nám er thaz er léibta,   \   mit thíu er in ouh tho líubta;
Verse: 44     gáb in thaz zi súazi,   \   thaz íagilih thes ázi.
Verse: 45     Mánota er sie tho álles   \   thes éreren thínges,
Verse: 46     thaz er gizálta iz allaz ín   \   unz er ér ju was mit ín;
Verse: 47     Er deta in óffan állaz   \   thaz giscríb follaz,
Verse: 48     mérota in thie wízzi   \   ménnisgon zi núzzi;
Verse: 49     Thaz íagilih firnámi   \   tharána thaz gizámi,


p. 166v    


Manuscript page: 166r 
Verse: 50     thaz drúhtin thiz so wólta,   \   joh sús ouh wésan scolta.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.