TITUS
Otfrid von Weissenburg, Evangelienbuch
Part No. 135
Previous part

Chapter: 12  
p. 166v    

XII. SPIRITALITER.


Verse: 1     Lékza therero wórto   \   thiu gruazit zéichan harto,
Verse: 2     rácha filu mára   \   joh thrato séltsana;
Verse: 3     Iz íst (thaz ni híluh thih)   \   wúntoron managen úngilih,
Verse: 4     thísu selba rédina   \   thia wir hiar scríbun obana.
Verse: 5     Éigun uns thiu gotes wérk   \   harto míhilaz gibérg,
Verse: 6     thaz wir thes bigínnen,   \   wir súlicho dati zéllen.
Verse: 7     Ist thaz selba mári   \   harto séltsani,
Verse: 8     harto rúmo oba unsan wán   \   sulih rácha gidán:
Verse: 9     In wélicha wisun wúrti   \   ther mán was in gibúrti
Verse: 10     (joh wir gilóuben thaz ouh frám,   \   er waran líchamon nam,
Verse: 11     Joh habet fásto ouh unser múat,   \   sid er fon tóde selbo irstúant,
Verse: 12     giwisso wízun wir tház   \   theiz sid war líchamo was) --
Verse: 13     Wío er selbo quámi   \   (thaz ist séltsani)
Verse: 14     bisparten dúron thara zi ín   \   joh stuant thar mítten untar in!
Verse: 15     Wir scúlun hiar nu súntar   \   gizellen ánder wuntar,
Verse: 16     thésemo gimachaz,   \   thaz wir firstánten thiz thiu baz;
Verse: 17     Thaz wir fon séltsane   \   wóla megin sáre
Verse: 18     irkénnen so iz giscríban stat,   \   thia wúntarlichun gótes dat.
Verse: 19     Mánnilih weiz gúater,   \   thaz thíarna ist Kristes múater,


p. 167r    


Manuscript page: 167r 
Verse: 20     thiu nan bár so er wólta,   \   tho er bunsih stérban scolta.
Verse: 21     Bar si frúma mánagen   \   mit iro lídin alangen,
Verse: 22     ni thúlta si in giwíssi   \   nihein irwártnissi,
Verse: 23     Tho er bi únsih wolta dówen,   \   mit thiu thia wórolt frowen,
Verse: 24     tház si sin ginúzzi   \   in thes líchamen brúzzi:
Verse: 25     Waz wúntoro ist thaz wólta   \   ther iamer lében scolta,
Verse: 26     er ingiang úngimerrit   \   dúron so bispérrit,
Verse: 27     Tho er ward zi mánne   \   bi sie zi irstérbanne,
Verse: 28     álangera múater,   \   ther gotes sún guater,
Verse: 29     Giháltenera thíarnun,   \   ther selbo drúhtines sun?
Verse: 30     ubar bédu det er tház,   \   só thiu sin giwált was.
Verse: 31     Hiar lisis thu óuh gizami   \   ánder seltsani,
Verse: 32     hárto mihil wúntar   \   fon selben Kríste ouh suntar.
Verse: 33     Theist giwís io so dág:   \   thaz man girúaren mag,
Verse: 34     thaz iz mág (so ih rédinon)   \   wértisal irkóboron.
Verse: 35     Yróugt uns hiar gimúato   \   unser drúhtin guato
Verse: 36     sih zi rúarenne ubar ál,   \   thér thoh iamer lében scal;
Verse: 37     Sih zi rúarenne,   \   thia wúntun ouh zi séhanne,
Verse: 38     thoh inan tód (giloubi mír)   \   ni scúli ruaren fúrdir,
Verse: 39     Joh wértisal nihéinaz   \   (giwisso wízist thu thaz
Verse: 40     ál sos ih thir rédinon)   \   fúrdir ubarkóboron;


p. 167v    


Manuscript page: 167v 
Verse: 41     Thaz wari wúntarlih thiu dát,   \   só siu thar giscríban stat,
Verse: 42     úngilih in gúatin   \   io ánderen sinen dátin,
Verse: 43     Úngilih, so ih zéllu,   \   thísu thing éllu,
Verse: 44     állo theso dáti,   \   thaz drúhtines giráti;
Verse: 45     Thaz sie gúallichi   \   instúantin in thera líchi,
Verse: 46     joh so frónisg gimah   \   so mennisgo ér ni gisah;
Verse: 47     Joh íamer westin thánne   \   thie sine hóldon alle,
Verse: 48     thie tho thár warun   \   joh ouh sídor quamun,
Verse: 49     Tház er in natúru   \   was sélbo ther zi wáru,
Verse: 50     théra érerun wesini,   \   so iz ér sah sin githígini.
Verse: 51     Nóh ist ouh hiar méra   \   thera frónisgun léra,
Verse: 52     thero drúhtines dáto,   \   thes wir bithúrfun thrato,
Verse: 53     Thaz wír firnemen álle   \   waz thíu racha wólle,
Verse: 54     joh wáz siu hiar bizéine   \   inti uns zi frúmu meine,
Verse: 55     Thie sélbun zua gífti   \   (es sínt uns harto thúrfti),
Verse: 56     thie zuá gifti dróstes,   \   thes sélben gotes géistes.
Verse: 57     Hiar lérit thiu sin stímna   \   unsih zuá minna,
Verse: 58     tho er in zuíro (so thu wéist)   \   gab then héilegon geist;
Verse: 59     Tho er sie híar thaz anablías,   \   thaz er in ér ju gihíaz,
Verse: 60     fon hímile inan sid ouh gáb,   \   so er in ér ju firgáb.
Verse: 61     Érist gab er in thaz gúat   \   thar er in géginwertig stuant,


p. 168r    


Manuscript page: 168r 
Verse: 62     joh sánta in avur sidor tház   \   tho er in hímile gisaz.
Verse: 63     Theist ther héilego géist,   \   mit thiu er se drósta sidor méist,
Verse: 64     sid sino géginwerti   \   er nám fon iro hénti.
Verse: 65     Mit thíu ist gizeinit mánnon,   \   sih untar ín io mínnon,
Verse: 66     joh ouh thiu mínna (so thu wéist)   \   si io zi drúhtine meist.
Verse: 67     In érdu gab er in then géist,   \   thaz man firnémen thaz io méist,
Verse: 68     thaz mínna sie ginúage,   \   joh káritas gifúage;
Verse: 69     Sid gáb er nan fon óbana,   \   thaz man firnámi thanana,
Verse: 70     thaz sie scúlun thuruh nót   \   minnon gót so er gibót.
Verse: 71     Mit thiu kúndt er hiar ouh mánnon,   \   thaz síe sih erist mínnon,
Verse: 72     thaz síe biquemen fóllon   \   mit thiu zen gótes minnon;
Verse: 73     So er érist hiar in érdu   \   then géist gab, soso ih zéllu,
Verse: 74     áfter thiu fon hímilon,   \   so íh thir hiar ouh rédinon.
Verse: 75     Nist ménnisgono wízzi   \   ni wédar ana ander núzzi,
Verse: 76     joh ér sih góte leidit,   \   ob ér siu zuei giscéidit.
Verse: 77     Bi thiu símes io zi góte funs   \   mit then mínnon untar úns,
Verse: 78     joh ínan harto mínnon;   \   so quimit iz wóla mannon!
Verse: 79     Nist thiu mínna sumirih   \   kreftin ánderen gilih
Verse: 80     (giwisso wízist thu thaz),   \   thía wir heizen káritas.
Verse: 81     Gilóbot ist si hárto   \   Páules selbes wórto,
Verse: 82     sines sélbes bredigon,   \   thiu káritas so ih thir rédinon;


p. 168v    


Manuscript page: 168v 
Verse: 83     Lóbot sia giwáro   \   ther brédigari máro
Verse: 84     filu mánagfalto   \   sínes selbes wórto.
Verse: 85     Thóh er si so mári   \   joh ouh so wís wari:
Verse: 86     ni irzált er thaz gimúati,   \   thia mánagfaltun gúati,
Verse: 87     Odo er íra dohti,   \   zi énte queman móhti,
Verse: 88     thera ira frámbari;   \   bi thíu ist si so mári.
Verse: 89     Zalt er mánagfaltaz gúat   \   ufan sía joh thes ginúag,
Verse: 90     joh lúad sia hárto guates   \   joh suásliches múates.
Verse: 91     Theist es állero meist   \   wi es drúhtin quít, so thu weist,
Verse: 92     bí thia selbun mínna   \   thia er lérta wórolt alla;
Verse: 93     Wio er lerta drúta sine   \   hiar in wóroltlibe,
Verse: 94     wi er zálta in fon theru mínnu   \   mit sínes selbes stímmu;
Verse: 95     Quad man irkénnen scolti:   \   ther sía mínnon wolti,
Verse: 96     joh thaz gibót mit willen   \   wolti émmizen irfúllen --
Verse: 97     Thaz thíe warin gúate   \   joh góte filu drúte;
Verse: 98     zi thiu zóh er hiar in líbe   \   thie júngoron sine.
Verse: 99     Bi thiu dúemes uns io hiar in múat   \   thaz filu míhila guat,
Verse: 100     thia filu scónun wunna;   \   thaz héizit avur mínna!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.