TITUS
Otfrid von Weissenburg, Evangelienbuch
Part No. 137
Previous part

Chapter: 14  
p. 169v    

XIV. MYSTICE.


Verse: 1     Thaz bizéinot mihil gúat   \   thaz drúhtin thar in stáde stuant,
Verse: 2     thaz ér ni drat thio úndun mer,   \   soso er ju déta for in ér.
Verse: 3     Únodi ist iz hárto   \   sus frénkisgero wórto
Verse: 4     thia kléini al zi giságanne   \   joh zi irrékenne;
Verse: 5     Thoh wíll ih es mit wíllen   \   hiar lúzilin gizéllen,
Verse: 6     gizéigon ouh in wára   \   war thú es lisis méra.
Verse: 7     Ther stád bizeinot lústi   \   thes sines líbes festi,


p. 170r    


Manuscript page: 170r 
Verse: 8     thia er ginám in sina hánt,   \   tho er tód ubarwánt;
Verse: 9     Ther sé bizeinot dáti   \   joh worolt únstati,
Verse: 10     thíu sih io zi nóti   \   hiar ferit stózenti.
Verse: 11     Thar wárun mit githuínge   \   thie júngoron noh tho ínne,
Verse: 12     sie scolta rúaren noh tho mér   \   thaz selba wóroltlicha sér.
Verse: 13     Thaz hábeta mit then máhtin   \   ther éwinigo drúhtin
Verse: 14     úbarwuntan, thaz ist wár;   \   bi thiu stúant er tho in stáde thar,
Verse: 15     Sélb so er rehto quáti   \   in thérera selbun dáti:
Verse: 16     "ni bin fúrdir ih mit mánnon   \   in thesen wóroltundon;
Verse: 17     Thia zessa drát ih untar fúaz,   \   si furdir dáron mir ni múaz,
Verse: 18     joh stán nu mit gilústi   \   in éwinigeru fésti!"
Verse: 19     Waz thaz nézzi zeinit,   \   ther rim thero físgo meinit,
Verse: 20     thero júngorono ménigi,   \   thaz théro warun síbini;
Verse: 21     Thaz brót in themo dísge   \   mit gibrátanemo físge,
Verse: 22     joh tház ouh thuruh thía last   \   thaz selba nézzi ni brast;
Verse: 23     Thaz Pétrus thaz in stád ouh zoh,   \   thaz imo físg nihein inflóh,
Verse: 24     thaz Krist zi júngist hiar gisáz   \   mit knehton síbinin inti áz:
Verse: 25     Gregórius ther gúato   \   er spúnota iz gimúato,
Verse: 26     joh filu scóno in war mín,   \   so ist giwónaheit sín;
Verse: 27     Iz Augustínus rechit   \   joh fílu kleino inthékit,
Verse: 28     ther uns hárto mánag guat   \   offan scóno giduat.


p. 170v    


Manuscript page: 170v 
Verse: 29     Sie thiz béde gruazent   \   joh uns iz hárto suazent;
Verse: 30     thésses thi ih nu hiar giwúag,   \   es ist uns fóllon thar ginúag.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.