TITUS
Otfrid von Weissenburg, Evangelienbuch
Part No. 138
Previous part

Chapter: 15  
p. 170v    

XV. CUM ERGO PRANDISSENT, DICIT JESUS PETRO.


Verse: 1     Só sie thar tho gázun   \   thie thar mit ímo sazun,
Verse: 2     mit selb drúhtine   \   thie liebun drúta sine,
Verse: 3     Quad tho drúhtin selbo sús:   \   "mínnost thu mih, Pétrus?
Verse: 4     mínnost thu mih filu mér   \   thanne thín ginoz ánder?"
Verse: 5     "Thú weist, druhtin", quad er, "mín,   \   thaz ih mínna haben thín,
Verse: 6     joh thú mir bist in mínnon   \   fora allen wóroltmannon."
Verse: 7     Quad ér: "theih thir gibíete,   \   thaz hábe thu fasto in múate,
Verse: 8     joh íl iz io irfúllen   \   mit hórsglichemo wíllen.
Verse: 9     Gihalt mir scáf minu   \   (mínu, nales thínu),
Verse: 10     fúatiri siu io zi wáru   \   mit mínes selbes leru."
Verse: 11     Druhtin ávur zi imo sprah,   \   thaz man ér ni gisah
Verse: 12     thaz er éino dati   \   so thiko frágeti:
Verse: 13     "Pétrus, dua mih wísi,   \   oba ih thir líob filu si,
Verse: 14     mit mínnu thines múates   \   mir únnis alles gúates?"
Verse: 15     Gab avur ántwurti   \   Pétrus mit giwúrti,
Verse: 16     zalta drúhtine   \   thie githánka sine:
Verse: 17     "Thu wéist, druhtin gúato,   \   thaz ih thih mínnon thrato,
Verse: 18     thaz thu líobo miner bíst,   \   mir ánder fora thír nist."


p. 171r    


Manuscript page: 171r 
Verse: 19     "Dúa", quad drúhtin, "thuruh nót   \   so ih híar thir óbana gibót;
Verse: 20     in hérzen si iz bifángan,   \   ni láz es wiht ingángan.
Verse: 21     Bisih mir lémbir minu   \   (mínu, nales thínu),
Verse: 22     in ín gidua thia wórolt wis,   \   wio filu hóld thu mir sís."
Verse: 23     Er thríttun stunt nan grúazta,   \   want er in ímo buazta
Verse: 24     thaz er ér ju in war mín   \   so thiko lóugnita sin;
Verse: 25     Ther thría stunton jáhi,   \   so thiko inflóhan wari;
Verse: 26     thia minna zálti hiar, so zám,   \   ther er so séro hintarquám:
Verse: 27     "Pétrus, avur zéli mir,   \   bin ih líob filu thír?
Verse: 28     ist thaz hérza thinaz   \   mir wárlicho holdaz?"
Verse: 29     Erquám er ana bága   \   thera thíkun gotes frága,
Verse: 30     er was es harto únfro,   \   joh gab er ántwurti avur thó:
Verse: 31     "Thu selbo drúhtin alles bíst   \   joh wéist al thaz in wórolt ist,
Verse: 32     thu weist thir sélbo anan mír   \   thia mina mínna zi thir."
Verse: 33     "Firním", quad er, "thia rédina   \   thia ih zálta thir hiar óbana;
Verse: 34     thaz ih wílle, so thu wéist,   \   laz thir wésan thaz io méist.
Verse: 35     Nu fúatiri scáf minu   \   (mínu, nales thínu),
Verse: 36     in ín dua hárto filu scín,   \   wio liob thir húldi mino sin.
Verse: 37     Húgi hiar nu hárto   \   thero mínero worto,
Verse: 38     in hérzen kléibi siu nu sár,   \   wanta ih ságen thir in álawar:
Verse: 39     Unz thu júng wari,   \   so wás thir thaz gizámi,


p. 171v    


Manuscript page: 171v 
Verse: 40     thaz thu thir sélbo gurtos   \   joh gíangi thara thu wóltos.
Verse: 41     Thu thénist thino hénti   \   sar thu bist áltenti,
Verse: 42     giwisso thaz ni híluh thih,   \   so gurtit ánderer thih;
Verse: 43     Thih leitit fílu manno   \   thara thú ni gengist gérno:
Verse: 44     thu scált iz thoh irfúllen   \   mit thinemo únwillen."
Verse: 45     Er mit thíu mo zálta   \   thaz wérdan thaz noh scólta,
Verse: 46     thaz man nan gifíangi,   \   in krúci nan irhíangi.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.