TITUS
Otfrid von Weissenburg, Evangelienbuch
Part No. 139
Previous part

Chapter: 16  
p. 171v    

XVI. DE ASCENSIONE DOMINI.


Verse: 1     Tho drúhtin wolta réison,   \   sin selbes ríches wison,
Verse: 2     sid themo síge, so gizám,   \   then er in sátanase nam;
Verse: 3     Fon thémo er unsih rétita,   \   in héllu nan gistréwita,
Verse: 4     giwán ouh mit githwínge   \   in sin selbes héiminge:
Verse: 5     Gibót er sinen théganon   \   sid tho thésen redinon,
Verse: 6     thaz wóla sie iz firnámin,   \   ingegin ímo quamin;
Verse: 7     Gibót in thaz sie giíltin   \   zi then sélben sconen zítin,
Verse: 8     thára er tho giméinta   \   joh sélbo in iz gizéinta.
Verse: 9     Sie íltun íro thuruh nót,   \   so er in sélbo tho gibót,
Verse: 10     thia fárt sie al so gisítotun   \   joh selbon drúhtin betotun.
Verse: 11     Er in tho náhor gigiang   \   joh sie súazlicho intfiang,
Verse: 12     thoh ráfst er se erist hárto   \   sines sélbes worto,
Verse: 13     Thaz in thera úngiwurti   \   thaz hérza in was so hérti,


p. 172r    


Manuscript page: 172r 
Verse: 14     ni gilóubtun sar then gáhun   \   thi erstántan nan gisáhun.
Verse: 15     Fílu er ín tho zálta,   \   so er fón in fáran scolta,
Verse: 16     thaz ín iz wari fésti   \   in thes hérzen brusti.
Verse: 17     Er in thar ouh zálta   \   spracha mánagfalta
Verse: 18     wórton ginúhtin;   \   joh spráh ouh sus tho drúhtin:
Verse: 19     "In hímile inti in érdu   \   so wált ih es mit állu,
Verse: 20     gigéban sint mir zi hénti   \   ellu wóroltenti.
Verse: 21     Nu scál ih iuih sénten,   \   in thíonost minaz wénten,
Verse: 22     gizellet wóroltthiote   \   ál theih iu gibíete.
Verse: 23     Faret brédigonti   \   so wít so thisu wórolt si,
Verse: 24     joh kundet éllu thisu thing   \   úbar thesan wóroltring;
Verse: 25     Gizéllet in ouh filu frám,   \   theih sélbo hera in wórolt quam,
Verse: 26     thaz thiu min géginwerti   \   giwéihti thia iro hérti.
Verse: 27     Mines sélbes lera   \   thia dúet in filu mára,
Verse: 28     tóufet sie inti brédigot,   \   thaz sie gilóuben in got.
Verse: 29     Árme joh thie ríche   \   so gén iu al gilíche,
Verse: 30     so waz so in érdu habe líb,   \   thaz si gómman inti wíb,
Verse: 31     Óba sie thes gigáhent,   \   zi gilóubu sih gifáhent:
Verse: 32     gidóufit werden álle;   \   so ist iro lába thanne.
Verse: 33     Ther avur thés ni giílit,   \   mit dóufu sih ni wíhit:
Verse: 34     ni gilóubit thanne ouh thuruh nót,   \   so íst er ju firdámnot.


p. 172v    


Manuscript page: 172v 
Verse: 35     Zéichono éigit ir giwált   \   zi wírkenne ubar wóroltlant,
Verse: 36     thiu ir mih dúan sahut   \   unz ir mit mír warut:
Verse: 37     Hórngibruader héilet,   \   so slíumo ir iz giméinet,
Verse: 38     thie suhti thána fuaret   \   so slíumo so ir se rúaret;
Verse: 39     Dóte man irquíket   \   thar ir zi mír es thigget,
Verse: 40     tharzúa sin ouh gizálte   \   béttirison álte.
Verse: 41     Thiu kráft ist iu giméini,   \   thaz nist únheili
Verse: 42     in wórolti zi ware,   \   nub ír sa heilet sáre.
Verse: 43     Ni mag díufal thara ingégin sin   \   thar ír ginennet námon mín,
Verse: 44     so wár ir es biginnet,   \   ir widar ímo ringet.
Verse: 45     Ir ni thúrfut bi thiu,   \   ih bin íamer mit iu;
Verse: 46     iu ni brístit min mér,   \   drof ni fórahtet thaz sér!"


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.