TITUS
Otfrid von Weissenburg, Evangelienbuch
Part No. 141
Previous part

Chapter: 18  
p. 173v    

XVIII. CUMQUE INTUERENTUR IN CAELUM.


Verse: 1     Únz sie thar tho stúantun,   \   tharafter lúagetun,
Verse: 2     thar stuantun mán tho zuene   \   joh hárto filu scóne.
Verse: 3     Sie quatun zi ín sos iz zám:   \   "wes scówot ir thar, guate mán?
Verse: 4     ziu sínt thie iuo wízzi   \   thes sulih fíruwizzi?
Verse: 5     Ir ni thúrfut bi thiu:   \   er quimit ávur sama zi íu:
Verse: 6     zi thera sélbun wisun   \   so er hína fuar nu thárasun.
Verse: 7     Er fuar io thémo mezze   \   zi sínes sélbes sezze,
Verse: 8     zi sin selbes gúallichi   \   in sines fáter richi,
Verse: 9     Ubar hóhi hímilo,   \   inti íst in allen óboro,


p. 174r    


Manuscript page: 174r 
Verse: 10     zi díuri thar sin fáter was,   \   zi sin selbes zésuer gisaz.
Verse: 11     Thar scówot er sin ríchi,   \   thaz hoha hímilrichi;
Verse: 12     nist wiht in érdu ouh, wizist tház,   \   gisíuni sin firhólanaz."
Verse: 13     Iz mág uns wesan thráti:   \   er síhit unso dáti,
Verse: 14     húgu in then githánkon,   \   ni múgun wir thaz biwánkon;
Verse: 15     Sint unsu wórt in rihti   \   in síneru gisíhti;
Verse: 16     irthénkit wíht io mannes múat:   \   er ím es alles réda duat!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.