TITUS
Otfrid von Weissenburg, Evangelienbuch
Part No. 142
Previous part

Chapter: 19  
p. 174r    

XIX. DE DIE JUDICII.


Verse: 1     Thes hábet er ubar wóroltring   \   giméinit einaz dágathing,
Verse: 2     thíng filu hébigaz,   \   zi sorganne éigun wir bi thaz.
Verse: 3     Thir zéllu ih híar ubarlút:   \   nist nihéinig siner drút,
Verse: 4     thes álleswio bigínne   \   ni er quéme zi themo thínge.
Verse: 5     Quément thara ouh thánne   \   thie wénegun álle
Verse: 6     thie híar gidatun fóllon   \   then iro múatwillon.
Verse: 7     Zi zéllenne ist iz suári!   \   nist ther fon wíbe quami
Verse: 8     (es irquímit muat mín),   \   nub er thár sculi sin;
Verse: 9     Ni síe sculin hérton   \   thar iro dáti renton
Verse: 10     al io giwísso umbiríng,   \   theist filu jámarlichaz thíng!
Verse: 11     Ward wóla in then thíngon   \   thie selbun ménnisgon,
Verse: 12     thie thar thoh bígonoto   \   sint síchor iro dáto;
Verse: 13     In thie thoh úbil thanne   \   nist wiht zi zéllenne,


p. 174v    


Manuscript page: 174v 
Verse: 14     mit thíu sih thoh biwérien   \   joh étheswio ginérien!
Verse: 15     Wanta es nist lába furdir,   \   thaz gilóubi thu mir,
Verse: 16     er wérgin megi ingángan   \   (wérd er thar bifángan),
Verse: 17     Nub er scúli thuruh nót   \   (wérd er thar birédinot)
Verse: 18     thúlten thanne in éwon   \   thes hélliwizes wéwon.
Verse: 19     Ward wóla in then thíngon   \   thie selbun ménnisgon,
Verse: 20     thie thar thoh bígonoto   \   sint síchor iro dáto!
Verse: 21     Weist thu wío bi thia zít   \   ther gotes fórasago quít?
Verse: 22     er zélit bi thaz selba thíng,   \   thaz thar si míhilaz githuíng;
Verse: 23     In ímo man thar lésan mag   \   theiz ist ábulges dag,
Verse: 24     árabeito, quísti,   \   joh managoro ángusti;
Verse: 25     Thaz íst ouh dag hórnes   \   joh éngilliches gálmes,
Verse: 26     thie blásent hiar in lánte,   \   thaz worolt úfstante;
Verse: 27     Theist dag ouh níbulnisses   \   joh wíntesbruti, léwes!
Verse: 28     thiu zuei firwázent thanne   \   thie súntigon alle;
Verse: 29     Hérmido ginóto   \   joh wénagheiti thráto
Verse: 30     (waz mag ih zéllen thir hiar mér?) --   \   thes ist ther dág al foller!
Verse: 31     Lási thu io thia rédina,   \   wio drúhtin threwit thánana?
Verse: 32     thar dúat er zi gihúgte,   \   er thanne hímil scutte.
Verse: 33     Wér ist manno in lánte   \   ther thánne witharstánte,
Verse: 34     thanne er iz zi thíu gifiarit   \   thaz sih ther hímil ruarit;


p. 175r    


Manuscript page: 175r 
Verse: 35     Thánne er mit giwélti   \   ist inan fáltonti
Verse: 36     (queman mág uns thaz in múat!),   \   so man sinan lívol duat.
Verse: 37     Níst ther dag sumiríh   \   dagon ánderen gilih,
Verse: 38     thaz sar man in githánkon   \   thar mégi wiht biwánkon;
Verse: 39     Gibórganero dáto   \   ni plígit man hiar nu thráto,
Verse: 40     sih ougit thár ana wánk   \   ther selbo lúzilo githank.
Verse: 41     Ward wóla ménnisgon   \   in thén selben thíngon,
Verse: 42     thie thar thoh bígonoto   \   sint síchor iro dáto;
Verse: 43     In thie thoh úbil thanne   \   nist wiht zi zéllenne,
Verse: 44     mit thíu sih thoh biwérien   \   joh étheswio ginérien!
Verse: 45     Ni lósent thar in nóti   \   góld noh diuro wáti,
Verse: 46     ni hilfit gótowebbi thár   \   noh thaz sílabar in war;
Verse: 47     Ni mag thar mánahoubit   \   helfan héreren wiht,
Verse: 48     kínd noh quéna in ware,   \   sie sorgent íro thare;
Verse: 49     Odo íawiht helphan thánne   \   themo fílu richen mánne:
Verse: 50     sie sint al ébanreiti   \   in theru selbun árabeiti.
Verse: 51     Giwísso thaz ni híluh thih:   \   thar sorget mánnilih bi sih,
Verse: 52     bi sines sélbes sela;   \   nist wíht in thanne méra.
Verse: 53     Skálka joh thie ríche   \   thie gént thar al gilíche,
Verse: 54     ni si thíe thar bi nóti   \   gifórdoront thio gúati.
Verse: 55     Ward wóla in then thíngon   \   thie selbun ménnisgon,


p. 175v    


Manuscript page: 175v 
Verse: 56     thie thar thoh bígonoto   \   sint síchor iro dáto!
Verse: 57     Thar nist míotono wiht   \   ouh wéhsales níawiht,
Verse: 58     thaz íaman thes giwíse,   \   mit wíhtu sih irlóse;
Verse: 59     Ni wari thu ío so richi   \   ubar wóroltrichi,
Verse: 60     thóh thu es thar bigínnes:   \   ther scáz ist sines síndes.
Verse: 61     Wanta drúhtin ist so gúat,   \   ther thaz úrdeili duat;
Verse: 62     er duat iz sélbo, ih sagen thir éin,   \   ander bótono nihein;
Verse: 63     Bi thiu ist wóla in then thíngon   \   thie selbun ménnisgon,
Verse: 64     thie thar thoh bígonoto   \   sint síchor iro dáto;
Verse: 65     In thie thoh úbil thanne   \   nist wiht zi zéllenne,
Verse: 66     mit thíu sih thoh biwérien   \   joh étheswio ginérien!


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.