TITUS
Otfrid von Weissenburg, Evangelienbuch
Part No. 143
Previous part

Chapter: 20  
p. 175v    

XX. QUOMODO JUDICATURUS EST MUNDUM.


Verse: 1     Gizéllen will ih súntar   \   thaz égislicha wúntar,
Verse: 2     thaz selba úrdeili   \   thaz wórolti ist giméini;
Verse: 3     Er sélbo ist sus giméinta   \   joh júngoron sinen zéinta,
Verse: 4     joh selbo in ságeta ubar ál,   \   wio égislih iz wésan scal. CUM VENERIT FILIUS HOMINIS IN SEDEM.
Verse: 5     Químit ther selbo gótes sun   \   fon hímilriche hérasun
Verse: 6     mit míhileru kréfti   \   joh éngilo giscéfti;
Verse: 7     Mit míhileru hébigi,   \   mit ímo al sin githígini,
Verse: 8     thaz súach er mit then fórahtun   \   waz ménnisgon io wórahtun.


p. 176r    


Manuscript page: 176r 
Verse: 9     Thaz méintun hiar thie zuéne,   \   thie wízun man thie scóne,
Verse: 10     thie quátun: sar so er wólti,   \   er sama quéman scolti.
Verse: 11     Thaz wíll ih hiar nu zéllen   \   unsen líobon allen,
Verse: 12     thaz sorge mín gilicho   \   tharazúa io fórahtlicho.
Verse: 13     Ther selbo kúning richo   \   sizzit gúallicho,
Verse: 14     hóh ist ther, so ih zéllu,   \   then wórolt sihit éllu;
Verse: 15     Thaz selba sédal sinaz   \   ist allen úngilichaz,
Verse: 16     ni wirdit thíng, ih sagen thir tház,   \   ér noh sidor súlichaz!
Verse: 17     Thar sizzent drúta sine,   \   thi er zóh hiar sélbo in libe,
Verse: 18     joh sínt ouh therero dáto   \   giwéltig filu thráto.
Verse: 19     Thara férit al ingégini   \   éngilo ménigi,
Verse: 20     quément iogilícho   \   tharazua fórahtlicho.
Verse: 21     Fóra sinen óugon   \   stent alle ménnisgon,
Verse: 22     úbile joh gúate;   \   in stárcho ist thanne in múate.
Verse: 23     Nist mán ther nóh io wurti,   \   odo ouh si nú in gibúrti,
Verse: 24     od ouh noh wérde in alawár,   \   nub er scúli wesan thár;
Verse: 25     Thie sélbe irstantent álle   \   fon thes líchamen fálle,
Verse: 26     fon themo fúlen légere,   \   iro wérk zi irgébanne,
Verse: 27     Úz fon theru ásgu,   \   fon theru fálawisgu,
Verse: 28     so wánne soso iz wérde,   \   fon themo írdisgen hérde;
Verse: 29     Mit themo sélben beine,   \   ándere nihéine,


p. 176v    


Manuscript page: 176v 
Verse: 30     mit fléisge joh mit félle,   \   thoh er ío ni wolle!
Verse: 31     Thie scéidit er in war mín   \   íagiwedarhalb sín,
Verse: 32     so hírti ther thar héltit   \   joh sines féhes weltit.
Verse: 33     Ni thárft thu thes wiht frágen,   \   ni bigínnent sie thar bágen,
Verse: 34     thaz zúrnen odo iz réchen   \   odo íawiht thes gispréchen,
Verse: 35     Odo íawiht thara ingégini   \   múrmulo thiu ménigi,
Verse: 36     suntar sár sih ríngot   \   so drúhtin iz githíngot.
Verse: 37     Sih sceident thío warba   \   sar in álahalba
Verse: 38     (nihéin iz thar innéinit,   \   so kráft iz sin giméinit);
Verse: 39     Sih scéident thar zi líbe   \   thie wárun hiar gilíabe
Verse: 40     zi áltere fúrdir,   \   thaz gilóubi thu mir;
Verse: 41     Múater fona kínde,   \   thaz fúrdir si iz ni fínde,
Verse: 42     joh ther fáter, thaz ist wár,   \   giscéidit sih fon ín thar;
Verse: 43     Giscéident sih in alawár   \   hérero inti thégan thar
Verse: 44     fon álteru líubi,   \   then wórton mir gilóubi;
Verse: 45     Gisíbbon filu líebe,   \   thie wárun hiar in líbe
Verse: 46     mit mínnon filu zéizen,   \   ni múgun siez thar giwéizen!
Verse: 47     So selbo drúhtin gibot,   \   so scal iz wésan thuruh nót,
Verse: 48     níst in themo thínge   \   ther thára ingegin rínge;
Verse: 49     Ni múgun siez bibríngan   \   ni iz wérde thar infángan,
Verse: 50     thaz sie ér io mínnotun   \   joh émmizigen wórahtun:


p. 177r    


Manuscript page: 177r 
Verse: 51     Súaznissi mánagaz,   \   thie hiar githíonotun thaz;
Verse: 52     thie ánthere iz ni níazent,   \   thara áfter iamer ríazent.
Verse: 53     Sih scéidit, so ih thir zéllu,   \   sús thiu wórolt ellu,
Verse: 54     fríunt fona fríunte   \   mit míhilemo nóte!
Verse: 55     So sézzit er thie gúate   \   blídlichemo múate
Verse: 56     in zésuemo rínge   \   zi thémo selben thínge;
Verse: 57     Thar sint thie ándere alle   \   in wénegemo fálle,
Verse: 58     thia wínistrun ni biwénkent,   \   thie selb so zígun stinkent.
Verse: 59     Ther kúning biginnit scówon   \   ginádlichen óugon
Verse: 60     thie thar zi zésue thuruh nót   \   sines wórtes beitont:
Verse: 61     Sie óugun zi imo ouh wéntent   \   joh fórahtente stántent,
Verse: 62     ist in hárto in múate,   \   wío er bi sie gibíete;
Verse: 63     Hánton joh ouh óugon   \   bigínnent sie nan scówon,
Verse: 64     wio er sinaz wórt gimeine,   \   joh wáz er in irdéile.
Verse: 65     Bigínnit er sie grúazen   \   wórton filu súazen,
Verse: 66     mit míhileru mínnu   \   sines sélbes stimnu:
Verse: 67     "Quémet", quít er thara zi ín,   \   "thie giwíhte mines fáter sin,
Verse: 68     giségenote síne   \   joh liabun drúta mine;
Verse: 69     Intfáhet thaz er wórahta,   \   ríchi thaz er gárota
Verse: 70     er ánagengi wórolti,   \   er íuih thara hóloti!
Verse: 71     Ir éigut iz giscúldit,   \   wíllon min irfúllit;


p. 177v    


Manuscript page: 177v 
Verse: 72     ih lónon iu es tháre   \   mit líebu zi álaware.
Verse: 73     Ir gibúaztut mir in wár   \   thúrst inti húngar,
Verse: 74     in hús mih ouh intfíangi,   \   theih wállonti ni gíangi;
Verse: 75     Ir ni thúltut thuruh gót   \   tház ih giangi náchot,
Verse: 76     ir eigut óuh thuruh gót   \   síuchi in mir gilóchot;
Verse: 77     Ob ih in kárkare wás,   \   ir biríwetut thaz,
Verse: 78     wísotut min ouh in thíu,   \   ni brast mir wíhtes noh io zi íu; *
Verse: 79     Ward ouh tház theih irstárb:   \   íuer íagilih biwárb,
Verse: 80     tház man mih irhúabi   \   joh scóno bigrúabi."
Verse: 81     Gébent sie mit thúlti   \   themo kúninge ántwurti
Verse: 82     (sie séhent sinaz ríchi,   \   thie hohun gúallichi,
Verse: 83     Híntarquement múates):   \   "wer mag wánen, druhtin, thés
Verse: 84     thaz mán io in álagahi   \   thih súlichan gisáhi;
Verse: 85     Dótan thih io fúarti,   \   joh nákotdag thih rúarti,
Verse: 86     thúrst inti húngar?   \   wio mag wérdan thaz io wár,
Verse: 87     Thaz quámi uns in gidráhti,   \   thih thuungin únmahti,
Verse: 88     élilenti séro   \   odo kárkari suáro;
Verse: 89     Thaz ío thaz mohti wérdan   \   (iz ist rúmo oba unsan wán!),
Verse: 90     in súlicheru nóti   \   thir man io thíonoti?"
Verse: 91     Quit ther kúning maro:   \   "ih ságen iu gíwáro,
Verse: 92     ih scal iu iz zéllen ubar ál,   \   thaz wízit ana zuíval:


p. 178r    


Manuscript page: 178r 
Verse: 93     Mino líd es fúaltun   \   joh mih thio dáti rúartun,
Verse: 94     thar ir iz dátut líeben   \   then brúaderon mínen."
Verse: 95     Thie wínistre er ouh thar grúazit   \   joh thie úbili in firwízit,
Verse: 96     biginnit sie ánafarton   \   mit égislichen wórton,
Verse: 97     Joh ouh ánabrechon   \   mit égislichen sáchon,
Verse: 98     mit séremo githuínge   \   joh suáremo ánaginge.
Verse: 99     Jámarlicho er zi in quít:   \   "firwázan ir fon góte sit;
Verse: 100     fáret fon thérera suazi   \   in thaz éwiniga wízi!
Verse: 101     Giwisso wízit ir tház:   \   themo díufele ist iz gárawaz;
Verse: 102     mit ímo iz niaze nóti   \   ther thíonost sinaz dáti!
Verse: 103     Ni fánd in íu wiht gúates   \   noh líabes mines dróstes
Verse: 104     léithes theih githúlta,   \   hiar líeben minen zálta;
Verse: 105     Ni búaztut ir mir, thaz ist wár,   \   thúrst inti húngar,
Verse: 106     ír mih ouh ni wáttut,   \   in síuchi dróst ni dátut;
Verse: 107     Ób ih ouh irstúrbi,   \   ni wás ther mih bidúlbi;
Verse: 108     in hús mih ouh ni léittut   \   joh mámmuntes ni béittut;
Verse: 109     Mir íagilih io wángta   \   thes íh in iuih thíngta,
Verse: 110     es scál man iu giwáro   \   nu lonon filu suáro!"
Verse: 111     Biginnent sie ángusten,   \   sie wóllent sih inzéllen;
Verse: 112     er dríbit sie alle thánana,   \   wíht nist iro rédina.
Verse: 113     Mit hérzen filu séren   \   biginnent sie thána keren,


p. 178v    


Manuscript page: 178v 
Verse: 114     sie sátanasa dríbent   \   in wízi thiu in ni líbent;
Verse: 115     Sie habent in álawari   \   zuivalt úngifuari:
Verse: 116     sie hímilriches thárbent,   \   joh innan béche werbent.


Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.