TITUS
Otfrid von Weissenburg, Evangelienbuch
Part No. 148
Previous part

Chapter: 25  
p. 187r    

XXV. CONCLUSIO VOLUMINIS TOTIUS.


Verse: 1     Selben Krístes stíuru   \   joh sínera ginádu
Verse: 2     bin nú zi thiu gifíerit,   \   zi stáde hiar gimíerit;
Verse: 3     Bín nu mines wórtes   \   gikerit héimortes,
Verse: 4     joh wíll es duan nu énti   \   mit thiu íh fuar férienti.
Verse: 5     Nu wíll ih thes giflízan,   \   then segal nítharlazan,
Verse: 6     thaz in thes stádes feste   \   min rúadar nu giréste.
Verse: 7     Bin gote hélphante   \   thero árabeito zi énte,


p. 187v    


Manuscript page: 187v 
Verse: 8     thes mih fríunta batun,   \   in gótes minna iz dátun;
Verse: 9     Thes síe mih batun hárto   \   selben gótes worto,
Verse: 10     thaz ih giscríb in unser héil   \   evangéliono deil;
Verse: 11     Tház ih es bigúnni   \   in únseraz gizungi;
Verse: 12     ih thuruh gót iz dati,   \   soso man mih báti.
Verse: 13     Ni móht ih thaz firlóugnen,   \   nub íh thes scolti góumen
Verse: 14     thaz ih ál dati   \   thes káritas mih bati;
Verse: 15     Wanta sí ist in war mín   \   druhtines drútin,
Verse: 16     ist fúrista innan húses   \   sines thíonostes.
Verse: 17     Thes selben thíonostes giwált,   \   thaz géngit thuruh íra hant;
Verse: 18     nist es wíht in thanke   \   mit íru man iz ni wírke!
Verse: 19     Nu íst iz, so ih rédinon,   \   mit selben Krístes segenon,
Verse: 20     mit sínera giwélti   \   braht anan énti,
Verse: 21     Giscríban so sie bátun,   \   thaz iro mínna datun,
Verse: 22     brúaderscaf ouh díuru,   \   thaz ságen ih thir zi wáru.
Verse: 23     Ih hiar nu férgon wille   \   gótes thegana álle,
Verse: 24     alle hóldon sine   \   joh liabe fríunta mine,
Verse: 25     Si frúma in thesen wérkon:   \   thaz sies góte thankon,
Verse: 26     thaz sie tház irwellen,   \   gótes gift iz zellen,
Verse: 27     Sínera mahti   \   állaz thaz gidráhti,
Verse: 28     ímo, so ih zéllu,   \   thiu selbun wórt ellu;


p. 188r    


Manuscript page: 188r 
Verse: 29     Sí thar thaz ni dóhta,   \   so mir gibúrren mohta:
Verse: 30     zéllet thio giméiti   \   minera dúmpheiti,
Verse: 31     Mínes selbes úbili,   \   thaz íh io ward so frávili;
Verse: 32     joh minera árgi filu frám,   \   thaz ih es góuma ni nam,
Verse: 33     Thaz íh in thesen rédion   \   ni lúgi in thevangélion;
Verse: 34     thaz íh mir liaz so úmbiruah   \   thio mines drúhtines buah!
Verse: 35     Thero selbun míssidato   \   thíg ih, druhtin, thráto
Verse: 36     gináda thina in wára;   \   wes még ih fergon méra?
Verse: 37     Ther hóldo thin ni míde   \   nub er iz thána snide,
Verse: 38     joh er iz thána scerre,   \   tház iz hiar ni mérre,
Verse: 39     Zi thiu thaz gúati sine   \   thes thiu báz hiar scine,
Verse: 40     joh man wizzi fóllon   \   in thíu then guatan wíllon;
Verse: 41     Want er thaz gúata mínnot,   \   joh hiar iz lísit thuruh gót,
Verse: 42     thaz árga hiar ouh mídit   \   joh iz thána snidit,
Verse: 43     Noh thuruh éina lugina   \   ni firwírfit al thia rédina,
Verse: 44     noh thuruh úngiwara mín   \   ni lázit thia frúma sin;
Verse: 45     Súntar thaz giscríb min   \   wirdit bézira sin,
Verse: 46     búazent síno gúati   \   thio mino míssodati.
Verse: 47     Sọ eigun dáti sine   \   lon fon drúhtine,


p. 188v    


Manuscript page: 188v 
Verse: 48     gélt filu fóllon   \   thuruh then gúatan willon,
Verse: 49     Want er thaz úbila firméid   \   joh iz garo thána sneid;
Verse: 50     thaz gúata steit giháltan   \   joh mág sih baz giwáltan.
Verse: 51     Sús bi thésa redina   \   so duent thie gótes thegana,
Verse: 52     sie wírkent thiz gimúati   \   thuruh thio íro guati;
Verse: 53     Sús duent thíe io álle   \   thes gúaten willen fólle,
Verse: 54     thie selbun drúta sine   \   joh liebe fríunta mine.
Verse: 55     Ih wéiz ouh thaz thu irkénnist,   \   joh thih iz únfarholan ist,
Verse: 56     wio áfur iogilícho   \   duit ther mín gilicho.
Verse: 57     Then rúarit io thiu smérza   \   (thaz dúit imo úbil herza),
Verse: 58     er scówot zi themo gúate   \   séragemo múate;
Verse: 59     Iz rúarit sino brústi   \   sar zi théra fristi
Verse: 60     mit míhilen ríuon,   \   so ér iz biginnit scóuon;
Verse: 61     Er bíeget zemo gúate,   \   ist úbilo imo in múate,
Verse: 62     wólt er sar thén wílon   \   gérno iz firdílon.
Verse: 63     Nist ímo thar ouh fóllon   \   thuruh then argan wíllon,
Verse: 64     súntar er thaz grúbilo,   \   finthit er thar úbilo;
Verse: 65     Joh wilit súlichero íagilih   \   theiz állaz si so sámalih,
Verse: 66     biginnent frám thaz réchen   \   thaz sie thaz gúata theken;


p. 189r    


Manuscript page: 189r 
Verse: 67     Lúagent io zemo árgen,   \   thaz sie génaz bergen,
Verse: 68     tház siez io bihéllen   \   mit árgemo willen.
Verse: 69     Iz spríchit ouh giwáro   \   Hierónimus ther máro,
Verse: 70     giwuag er wórtes sines   \   thes selben álten nides.
Verse: 71     Er quit sin súmiliche,   \   thoh in thaz wérk liche,
Verse: 72     sie thoh, bi thíe meina,   \   thes árgen nemen góuma;
Verse: 73     Thaz sie tház io spurilon   \   wio sie in ábuh redinon,
Verse: 74     joh sie thés io faren   \   wioz híntorort gikeren!
Verse: 75     Nu sie tház ni mident,   \   so hohan gómon rinent,
Verse: 76     sie óuh thaz ni éltent,   \   then gotes drút so sceltent:
Verse: 77     Waz dúit thanne iro frávili   \   theru mínera nídiri,
Verse: 78     joh iro wíllo úbiler?   \   got biskírme mih ér!
Verse: 79     Sus sínt thiu thíng ellu,   \   so íh thir hiar nu zéllu;
Verse: 80     sus míssemo múate   \   sint úbile joh gúate:
Verse: 81     Thie einun wóllent in wár   \   thaz gúata ófonon sar,
Verse: 82     thie ándere mit ílon   \   iz wóllent sar firdílon.
Verse: 83     Thie gúate es sar bigínnent   \   joh iz frámbringent,
Verse: 84     joh sint fró thrato   \   réhtero dato;
Verse: 85     Thie andere álle filu frúa   \   sero grúnzent tharzúa,
Verse: 86     sero dúit in thiu fríst   \   theiz bithékitaz nist.
Verse: 87     Nu bifílu ih mih hiar   \   then béziron allen in wár,


p. 189v    


Manuscript page: 189v 
Verse: 88     allen gótes theganon   \   mit selben Krístes seganon;
Verse: 89     Tház thie selbun smáhi mín   \   in gihúgti muazin íro sin,
Verse: 90     mit wórton mih ginúagen   \   zi drúhtine gifúagen;
Verse: 91     Io sár in thémo friste   \   zi wáltantemo Kríste,
Verse: 92     zi wáltanteru hénti   \   ána theheinig énti;
Verse: 93     Themo si gúallichi   \   ubar állaz sinaz ríchi,
Verse: 94     ubar allo wórolti   \   si díuri sin io wónanti;
Verse: 95     In érdu joh in hímile,   \   in ábgrunte ouh hiar nídere,
Verse: 96     mit éngilon joh mánnon   \   in éwinigen sángon!
Verse: 97     Ther míh hiar so gidrósta,   \   thero árabeito irlósta,
Verse: 98     thaz ér min githáhta,   \   zi stáde mih bibráhta.
Verse: 99     Thoh íh tharzua húgge,   \   thoh scówon sio zi rúgge,
Verse: 100     bin mir ménthenti   \   in stade stántenti.
Verse: 101     Si gúallichi thera énsti   \   thiu mir thés io giónsti,
Verse: 102     lób ouh thera giwélti   \   ána theheinig énti
Verse: 103     In érdu joh in hímile,   \   in ábgrunte ouh hiar nídere,
Verse: 104     mit éngilon joh mánnon   \   in éwinigen sángon! Amen.



Next part


This text is part of the TITUS edition of Otfrid von Weissenburg, Evangelienbuch.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.