| Ms. line: 13 | Furfarenti gisah man blintan |
| Ms. line: 14 | fon giburti. Inti fragetun inan |
| Ms. line: 15 | sine iungiron: meistar, |
| Ms. line: 16 | uuer suntota, these odo sine eldiron, |
| Ms. line: 17 | thaz her blint vvurdi giboran? |
| Ms. line: 18 | Thó antlingita ther heilant: noh theser |
| Ms. line: 19 | suntota noh sine eldiron, |
| Ms. line: 20 | uzouh thaz vvurdi arougit gotes uuerc in imo. |
| Ms. line: 21 | Mih gilimphit uuirkan sinu uuerc |
| Ms. line: 22 | thie mih santa, unz iz tag ist: |
| Ms. line: 23 | quimit naht, thanne nioman mag |
| Ms. line: 24 | uuirkan. So lango so ih in mittiligarte bim, |
| Ms. line: 25 | so bim ih lioht mittiligartes. |
| Ms. line: 26 | Mit thiu her thisu quad, speo in erda |
| Ms. line: 27 | inti teta leimon fon speihhaltrun inti salbota |
| Ms. line: 28 | then leimon ubar sinu ougun inti quad imo: |
| Ms. line: 29 | far inti uuasc thih in themo uuazare Siloe, |
| Ms. line: 30 | thaz ist arrekit gisentit. |
| Ms. line: 31 | Fuor her thô inti vvuosc sih inti quam gisehenti. |
| Ms. line: 1 | Giuuesso thie nahiston inti thie inan er gisahun, |
| Ms. line: 2 | thaz her betalari uúas, quadun: |
| Ms. line: 3 | eno ni ist thiz ther thie thar sáz |
| Ms. line: 4 | inti betolata? Andere quadun: |
| Ms. line: 5 | her ist íz, andere quadun: nist, |
| Ms. line: 6 | úzouh hér ist imo gilih. Her uvarlihho quad: |
| Ms. line: 7 | ih bim íz. Sentence: 6 Thó quadun sie imo: |
| Ms. line: 8 | vvuo sint thir thiu ougun íntanu? |
| Ms. line: 9 | Tho antlingita her: ther man thie dar ist giquetan |
| Ms. line: 10 | heilant, her teta leimon inti salbota |
| Ms. line: 11 | minu ougun inti quad mír: |
| Ms. line: 12 | fár zi themo uúazare Siloe inti uúasc thih! |
| Ms. line: 13 | Inti ih fuor inti vvuosc inti gisah. |
| Ms. line: 14 | Tho quadun sie imo: uúar ist hér? |
| Ms. line: 15 | Tho quad hér: ni uúeiz. Tho leittun sie thén |
| Ms. line: 16 | zi then Pharisein thie thar blint uúas. |
| Ms. line: 17 | Thó uuas sambaztag, tho then leimon teta |
| Ms. line: 18 | ther heilant inti aroffonota sinu ougun. |
| Ms. line: 19 | Abur fragetun ín |
| Ms. line: 20 | thie Pharisei vvuo hér gisahí. |
| Ms. line: 21 | Tho quad her ín: leimon teta hér |
| Ms. line: 22 | mir ubar minu ougun, inti ih vvuosc inti gisah. |
| Ms. line: 23 | Quadun uuarlicho fon den Pharisæis sume: |
| Ms. line: 24 | nist these man fon gote, |
| Ms. line: 25 | bithiu uuanta sambaztag ni biheltit. |
| Ms. line: 26 | Anthere quadun: vvuo mag |
| Ms. line: 27 | suntig man thisiu zeihan duon? |
| Ms. line: 28 | Inti gisliz uuas in in. |
| Ms. line: 29 | Tho quadun sie themo blinten abur: |
| Ms. line: 30 | thu uuaz quidist fon demo thie thir inteta |
| Ms. line: 31 | thiniu ougun? Her quad tho: |
| Ms. line: 1 | uuanta her uuizago ist. |
| Ms. line: 2 | Ni giloubtun thie Iudæi fon imo |
| Ms. line: 3 | thaz her blint uuari inti gisahi, |
| Ms. line: 4 | unz sie gihalotun sine eldiron |
| Ms. line: 5 | thiez gisahun, inti fragetun |
| Ms. line: 6 | sie sus quedente: ist theser iúer sun, |
| Ms. line: 7 | then ir quedet thaz er blint giboran uvari? |
| Ms. line: 8 | vvuo sihit her thanne nu? |
| Ms. line: 9 | Tho antlingitun in sine elthiron |
| Ms. line: 10 | inti quadun: uuir uuizun thaz theser ist |
| Ms. line: 11 | unser sun inti thaz her blint giboran ist: |
| Ms. line: 12 | thanne vvuo her nu gisehe |
| Ms. line: 13 | ni uuizunmes, odo uúer gioffonoti |
| Ms. line: 14 | sinu ougun uúir ni uuizunmes: |
| Ms. line: 15 | inan fraget: altar habet, |
| Ms. line: 16 | her sprehe fon imo selbemo. |
| Ms. line: 17 | Thiz quadun sine eldiron, |
| Ms. line: 18 | uuanta sie forhtun thie Iudeon: |
| Ms. line: 19 | iu tho gieinotun sih thie Iudaei, |
| Ms. line: 20 | oba uúer inan Christ biiachi, |
| Ms. line: 21 | uz fon theru samanungu uuari. |
| Ms. line: 22 | Bithiu sine eldiron quadun: |
| Ms. line: 23 | bithiu uuanta her altar habet, |
| Ms. line: 24 | in selbon fraget. |
| Ms. line: 25 | Gihalotun then man abur |
| Ms. line: 26 | ther blint uuas inti quathun imo: |
| Ms. line: 27 | gib gote diurida, |
| Ms. line: 28 | uuir uuizumes thaz these man |
| Ms. line: 29 | suntig ist. Sentence: 15 Tho quad her: |
| Ms. line: 30 | oba her suntig ist ni uueiz: ein uueiz ih: |
| Ms. line: 31 | mit diu ih blint uuas, nu gisihu. |
| Ms. line: 1 | Tho quadun sie imo: uuaz teta her thir? |
| Ms. line: 2 | vvuo inteta her thinu ougun? |
| Ms. line: 3 | Tho antlingita in: ih quad iú iu, |
| Ms. line: 4 | inti ir gihortut: uúaz uuollet ír abur |
| Ms. line: 5 | gihoren? uuellet ir iungiron |
| Ms. line: 6 | sine uuesan? Sentence: 17 Tho fluochotun sie imo |
| Ms. line: 7 | inti quadun: thu sís sín iungiro, |
| Ms. line: 8 | uuir birumes Moyseses iungiron. |
| Ms. line: 9 | Uuír uuizumes thaz Moysese spráh got: |
| Ms. line: 10 | thesan ni uuizuuuir uuanan her ist. |
| Ms. line: 11 | Tho antlingita der man inti quad in: |
| Ms. line: 12 | in thiu ist vvuntar |
| Ms. line: 13 | thaz ir ni uuizit uuanan her si, |
| Ms. line: 14 | inti inteta minu ougun! |
| Ms. line: 15 | Uuir uuizumes uuárlicho daz suntige |
| Ms. line: 16 | got ni gihorit, oh oba uuer gotes bigengiri |
| Ms. line: 17 | ist inti sinan uuillon tuot, then gihorit. |
| Ms. line: 18 | Fon uuerelti ni uuard gihorit |
| Ms. line: 19 | thaz uúer gioffanoti ougun blint giboranes. |
| Ms. line: 20 | Ni uúari dese fon gote, ni mohti tuon |
| Ms. line: 21 | thes íouuiht. |
| Ms. line: 22 | Thó antlingitun sie inti quadun imo: |
| Ms. line: 23 | in sunton bist al giboran, inti thu leris unsih? |
| Ms. line: 24 | inti vvurpfun in úz. |
