| Ms. line: 23 | Uuarun gitan thó encenia |
| Ms. line: 24 | in Hierusalem, inti uúas uuintar. |
| Ms. line: 25 | Inti gieng ther heilant in themo temple |
| Ms. line: 26 | in phorcihe Salomones. |
| Ms. line: 27 | Umbibigabun inan thie Iudæi |
| Ms. line: 28 | inti quadun imo: |
| Ms. line: 29 | zunzuuúaz nimist thu unsera sela? |
| Ms. line: 30 | Oba thu Crist sist, quid uns iz offano. |
| Ms. line: 31 | Tho antlingita in ther heilant: |
| Ms. line: 1 | ih sprih iu inti ir ni giloubet: |
| Ms. line: 2 | thiu uuerc thiu ih duon in namon |
| Ms. line: 3 | mines fater, thiu giuuizscaf |
| Ms. line: 4 | sagent fon mir, oh ir ni giloubet, |
| Ms. line: 5 | uuanta ir ni birut fon minen scafon. |
| Ms. line: 6 | Minu scáf horent mina stemma, |
| Ms. line: 7 | inti ih inkennu síu, |
| Ms. line: 8 | inti siu folgent mir, |
| Ms. line: 9 | inti gibu in euuin líb, |
| Ms. line: 10 | inti ni uoruuerdent zi euuidu, |
| Ms. line: 11 | inti ni nimit siu nioman fon mineru henti. |
| Ms. line: 12 | Min fater daz er mir gab, |
| Ms. line: 13 | thaz ist mera allen, |
| Ms. line: 14 | inti nioman ni meg iz noti neman |
| Ms. line: 15 | fon mines fater henti. |
| Ms. line: 16 | Ih inti ther fater ein birumes. |
| Ms. line: 17 | Tho namun thie Iudæi steina, |
| Ms. line: 18 | tház sien steinotin. |
| Ms. line: 19 | Tho antlingita in ther heilant: |
| Ms. line: 20 | managiu guotiu uuerc eroucta ih îu |
| Ms. line: 21 | fon minemo fater: |
| Ms. line: 22 | thuruh uuelih thero uuerco |
| Ms. line: 23 | steinot ir mih? |
| Ms. line: 24 | Tho antlingitun imo thie Iudæi: |
| Ms. line: 25 | fon guotemo uuerke ni steinon uuir dih, |
| Ms. line: 26 | oh fon bismaridu, |
| Ms. line: 27 | inti mit diu thu man bist, |
| Ms. line: 28 | duost thih selbon got. |
| Ms. line: 29 | Tho antlingita in ther heilant: |
| Ms. line: 30 | ia ist giscriban in îuuueru evvu: |
| Ms. line: 31 | uuanta ih quad: ir birut gota? |
| Ms. line: 1 | Oba thie quad gota |
| Ms. line: 2 | ci den gotes uuort gitan ist, |
| Ms. line: 3 | inti ni mac daz giscrib zilosit uuerdan: |
| Ms. line: 4 | then der fater giheilagota |
| Ms. line: 5 | inti santan in uueralt, |
| Ms. line: 6 | ir quedet: thú bismarost, |
| Ms. line: 7 | uuanta ih quad: ih bin gotes sun? |
| Ms. line: 8 | Oba ih ni duon uuerc mines fater, |
| Ms. line: 9 | ni curit mir gilouben. |
| Ms. line: 10 | Ob ih duon, ob ir mir ni uuellet |
| Ms. line: 11 | gilouben, giloubet then uuercon, |
| Ms. line: 12 | tház ir forstantet inti giloubet |
| Ms. line: 13 | tház der fater in mir ist |
| Ms. line: 14 | inti ih in themo fater. |
| Ms. line: 15 | Suohtun inan ci gifahanne, |
| Ms. line: 16 | inti er ingíeng fon iro hanton. |
| Ms. line: 17 | Inti gíeng abur ubar Iordanen |
| Ms. line: 18 | in dia stat thár da uuas Iohannis |
| Ms. line: 19 | toufenti zi erist, inti uuoneta thár. |
| Ms. line: 20 | In manage quamun zi imo |
| Ms. line: 21 | inti quadun: uuanta Iohannis |
| Ms. line: 22 | ni teta nohhein zeihan: |
| Ms. line: 23 | alliu so uuelihiu |
| Ms. line: 24 | Iohannis quad fon desemo |
| Ms. line: 25 | uuariu uuarun. |
| Ms. line: 26 | Inti manage giloubtun in inan. |
