TITUS
Edda
Part No. 12
Previous part

Song: Alv. 
Strophe: 1 
(ALVÍSSMÁL.)


Verse: 1    "Becci breiða nú scal brúðr með mér,
Verse: 2    heim í sinni snúaz;
Verse: 3    hratað um mægi mun hveriom þiccia;
Verse: 4    heima scalat hvíld nema."

Strophe: 2 
Verse: 1    "Hvat er þat fira, hví ertu svá fǫlr um nasar,
Verse: 2    vartu í nótt með ná?
Verse: 3    þursa líki þicci mér á þér vera,
Verse: 4    ertattu til brúðar borinn."

Strophe: 3 
Verse: 1    "Alvíss ec heiti, bý ec fyr iorð neðan,
Verse: 2    á ec undir steini stað;
Verse: 3    vagna verz ec em á vit kominn,
Verse: 4    bregði engi fǫsto heiti fira!"

Strophe: 4 
Verse: 1    "Ec mun bregða, þvíat ec brúðar á
Verse: 2    flest um ráð sem faðir;
Verse: 3    varca ec heima, þá er þér heitið var,
Verse: 4    at sá einn er giof er með goðom."

Strophe: 5 
Verse: 1    "Hvat er þat recca, er í ráðom telz
Verse: 2    flióðs ins fagrglóa?
Verse: 3    fiarrafleina þic muno fáir kunna,
Verse: 4    hverr hefir þic baugom borit?"
Strophe: 6 
Verse: 1    "Vingþórr ec heiti - ec hefi víða ratað -
Verse: 2    sonr em ec Síðgrana;
Verse: 3    at ósátt minni scaltu þat iþ unga man hafa
Verse: 4    oc þat giaforð geta."

Strophe: 7 
Verse: 1    "Sáttir þínar er ec vil snemma hafa
Verse: 2    oc þat giaforð geta;
Verse: 3    eiga vilia, heldr enn án vera,
Verse: 4    þat iþ miallhvíta man."

Strophe: 8 
Verse: 1    "Meyiar ástom muna þér verða,
Verse: 2    vísi gestr, of varið,
Verse: 3    ef þú ór heimi kant hveriom at segia
Verse: 4    alt, þat er ec vil vita.

Strophe: 9 
Verse: 1    Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sú iorð heitir, er liggr fyr alda sonom,
Verse: 4    heimi hveriom í."

Strophe: 10 
Verse: 1    "Iorð heitir með mǫnnom, enn með ásom fold,
Verse: 2    kalla vega vanir,
Verse: 3    ígron iotnar, álfar gróandi,
Verse: 4    kalla aur upregin."

Strophe: 11 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sá himinn heitir erakendi
Verse: 4    heimi hveriom í."

Strophe: 12 
Verse: 1    "Himinn heitir með mǫnnom, enn hlýrnir með goðom,
Verse: 2    kalla vindofni vanir, uppheim iotnar, álfar fagraræfr,
Verse: 3    dvergar driúpan sal."

Strophe: 13 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hverso máni heitir, sá er menn siá
Verse: 4    heimi hveriom í."

Strophe: 14 
Verse: 1    "Máni heitir með mǫnnom, enn mylinn með goðom,
Verse: 2    kalla hverfanda hvél helio í,
Verse: 3    scyndi iotnar, enn sein dvergar,
Verse: 4    kalla álfar ártala."

Strophe: 15 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sú sól heitir, er siá alda synir,
Verse: 4    heimi hveriom í."

Strophe: 16 
Verse: 1    "Sól heitir með mǫnnom, enn sunna með goðom,
Verse: 2    kalla dvergar Dvalins leica,
Verse: 3    eygló iotnar, álfar fagrahvél,
Verse: 4    alscír ása synir."

Strophe: 17 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé þau scý heita, er scúrom blandaz,
Verse: 4    heimi hveriom í."

Strophe: 18 
Verse: 1    "Scý heita með mǫnnom, enn scúrván með goðom,
Verse: 2    kalla vindflot vanir,
Verse: 3    úrván iotnar, álfar veðrmegin,
Verse: 4    kalla í helio hiálm huliz."

Strophe: 19 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sá vindr heitir, er víðast ferr,
Verse: 4    heimi hveriom í."

Strophe: 20 
Verse: 1    "Vindr heitir með mǫnnom, enn váfuðr með goðom,
Verse: 2    kalla gneggiuð ginregin,
Verse: 3    opi iotnar, álfar dynfara,
Verse: 4    kalla í helio hviðuð."

Strophe: 21 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé þat logn heitir, er liggia scal
Verse: 4    heimi hveriom í."

Strophe: 22 
Verse: 1    "Logn heitir með mǫnnom, enn lægi með goðom,
Verse: 2    kalla vindslot vanir,
Verse: 3    ofhlý iotnar, álfar dagsefa,
Verse: 4    kalla dvergar dags vero."

Strophe: 23 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sá marr heitir, er menn róa
Verse: 4    heimi hveriom í."

Strophe: 24 
Verse: 1    "Sær heitir með mǫnnom, enn sílægia með goðom,
Verse: 2    kalla vág vanir,
Verse: 3    álheim iotnar, álfar lagastaf,
Verse: 4    kalla dvergar diúpan mar."

Strophe: 25 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sá eldr heitir, er brenn fyr alda sonom
Verse: 4    heimi hveriom í."

Strophe: 26 
Verse: 1    "Eldr heitir með mǫnnom, enn með ásom funi,
Verse: 2    kalla vag vanir,
Verse: 3    frecan iotnar, enn forbrenni dvergar,
Verse: 4    kalla í helio hrǫðuð."

Strophe: 27 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sá viðr heitir, er vex fyr alda sonom
Verse: 4    heimi hveriom í."

Strophe: 28 
Verse: 1    "Viðr heitir með mǫnnom, enn vallar fax með goðom,
Verse: 2    kalla hlíðþang halir,
Verse: 3    eldi iotnar, álfar fagrlima,
Verse: 4    kalla vǫnd vanir."

Strophe: 29 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé sú nótt heitir, in Nǫrvi kenda,
Verse: 4    heimi hveriom í."

Strophe: 30 
Verse: 1    "Nótt heitir með mǫnnom, enn niól með goðom,
Verse: 2    kalla grímo ginregin,
Verse: 3    óliós iotnar, álfar svefngaman,
Verse: 4    kalla dvergar draumniorun."

Strophe: 31 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé þat sáð heitir, er sá alda synir
Verse: 4    heimi hveriom í."

Strophe: 32 
Verse: 1    "Bygg heitir með mǫnnom, enn barr með goðom,
Verse: 2    kalla vaxt vanir,
Verse: 3    æti iotnar, álfar lagastaf,
Verse: 4    kalla í helio hnipinn."

Strophe: 33 
Verse: 1    "Segðu mér þat, Alvíss - ǫll of rǫc fira
Verse: 2    voromc, dvergr, at vitir -,
Verse: 3    hvé þat ǫl heitir, er drecca alda synir
Verse: 4    heimi hveriom í."

Strophe: 34 
Verse: 1    "Ǫl heitir með mǫnnom, enn með ásom biórr,
Verse: 2    kalla veig vanir,
Verse: 3    hreinalǫg iotnar, enn í helio mioð,
Verse: 4    kalla sumbl Suttungs synir."

Strophe: 35 
Verse: 1    "Í eino briósti ec sác aldregi
Verse: 2    fleiri forna stafi;
Verse: 3    miclom tálom ec qveð tældan þic:
Verse: 4    uppi ertu, dvergr, um dagaðr,
Verse: 5    nú scínn sól í sali.




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.