TITUS
Edda
Part No. 13
Previous part

Song: HH. 
Strophe: 0 
(HELGAQVIÐA HUNDINGSBANA IN FYRRI)


Verse: 1    Hér hefr up qvæði frá Helga Hundingsbana þeira oc
Verse: 2    Hǫðbrodds.

Verse: 3    Vǫlsungaqviða.

Strophe: 1 
Verse: 1    Ár var alda, þat er arar gullo,
Verse: 2    hnigo heilog vǫtn af Himinfiollom;
Verse: 3    þá hafði Helga, inn hugomstóra,
Verse: 4    Borghildr borit í Brálundi.

Strophe: 2 
Verse: 1    Nótt varð í bo, nornir qvómo,
Verse: 2    þær er ǫðlingi aldr um scópo;
Verse: 3    þann báðo fylki frægstan verða
Verse: 4    oc buðlunga beztan þiccia.

Strophe: 3 
Verse: 1    Snero þær af afli ørlǫgþátto,
Verse: 2    þá er borgir braut í Brálundi;
Verse: 3    þær um greiddo gullin símo
Verse: 4    oc und mána sal miðian festo.

Strophe: 4 
Verse: 1    Þær austr oc vestr enda fálo,
Verse: 2    þar átti lofðungr land á milli;
Verse: 3    brá nipt Nera á norðrvega
Verse: 4    einni festi, ey bað hon halda.

Strophe: 5 
Verse: 1    Eitt var at angri Ylfinga nið
Verse: 2    oc þeiri meyio, er munuð foddi:
Verse: 3    hrafn qvað at hrafni - sat á hám meiði,
Verse: 4    andvanr áto -: "Ec veit noccoð.

Strophe: 6 
Verse: 1    Stendr í brynio burr Sigmundar,
Verse: 2    dogrs eins gamall, nú er dagr kominn;
Verse: 3    hvessir augo sem hildingar;
Verse: 4    sá er varga vinr, við scolom teitir."

Strophe: 7 
Verse: 1    Drótt þótti sá dǫglingr vera,
Verse: 2    qváðo með gumnom góð ár komin;
Verse: 3    siálfr gecc vísi ór vígþrimo
Verse: 4    ungom fora ítrlauc grami.

Strophe: 8 
Verse: 1    Gaf hann Helga nafn oc Hringstaði,
Verse: 2    Sólfioll, Snæfioll oc Sigarsvǫllo,
Verse: 3    Hringstǫð, Hátún oc Himinvanga,
Verse: 4    blóðorm búinn, broðr Sinfiotla.

Strophe: 9 
Verse: 1    Þá nam at vaxa fyr vina briósti
Verse: 2    álmr ítrborinn, ynðis lióma;
Verse: 3    hann galt oc gaf gull verðungo,
Verse: 4    sparði eigi hilmir hodd blóðrekinn.

Strophe: 10 
Verse: 1    Scamt lét vísi vígs at bíða,
Verse: 2    þá er fylkir var fimtán vetra;
Verse: 3    oc hann harðan lét Hunding veginn,
Verse: 4    þann er lengi réð lǫndom oc þegnom.

Strophe: 11 
Verse: 1    Qvǫddo síðan Sigmundar bur
Verse: 2    auðs oc hringa Hundings synir,
Verse: 3    þvíat þeir átto iofri at gialda
Verse: 4    fiárnám mikit oc fǫður dauða.

Strophe: 12 
Verse: 1    Létað buðlungr bótir uppi,
Verse: 2    né niðia in heldr nefgiold fá;
Verse: 3    ván qvað hann mundo veðrs ins micla
Verse: 4    grára geira oc gremi Óðins.

Strophe: 13 
Verse: 1    Fara hildingar hiorstefno til,
Verse: 2    þeirar er lǫgðo at Logafiollom;
Verse: 3    sleit Fróða frið fiánda á milli,
Verse: 4    fara Viðris grey valgiorn um ey.

Strophe: 14 
Verse: 1    Settiz vísi, þá er vegit hafði
Verse: 2    Álf oc Eyiólf, und Arasteini,
Verse: 3    Hiorvarð oc Hávarð, Hundings sono;
Verse: 4    farit hafði hann allri ætt geir Mímis

Strophe: 15 
Verse: 1    Þá brá lióma af Logafiollom,
Verse: 2    enn af þeim liómom leiptrir qvómo;
Verse: 3    þá var und hiálmom á Himinvanga
Verse: 4    Brynior vóro þeira blóði stocnar.
Verse: 5    Enn af geirom geislar stóðo.

Strophe: 16 
Verse: 1    Frá árliga ór úlfiði
Verse: 2    dǫglingr at því dísir suðronar,
Verse: 3    ef þær vildi heim með hildingom
Verse: 4    þá nótt fara; þrymr var álma.

Strophe: 17 
Verse: 1    Enn af hesti Hǫgna dóttir
Verse: 2    - líddi randa rym - ræsi sagði:
Verse: 3    "Hugg ec, at vér eigim aðrar sýslor,
Verse: 4    enn með baugbrota biór at drecca.

Strophe: 18 
Verse: 1    Hefir minn faðir meyio sinni
Verse: 2    grimmom heitit Granmars syni;
Verse: 3    enn ec hefi, Helgi, Hǫðbrodd qveðinn,
Verse: 4    konung óneisan, sem kattar son.

Strophe: 19 
Verse: 1    Þá kømr fylkir fára nátta,
Verse: 2    nema þú hánom vísir valstefno til
Verse: 3    eða mey nemir frá mildingi."

Strophe: 20 
Verse: 1    "Uggi eigi þú Ísungs bana!
Verse: 2    fyrr mun dólga dynr, nema ec dauðr siác."

Strophe: 21 
Verse: 1    Sendi áro allvaldr þaðan,
Verse: 2    of lopt oc um lǫg, leiðar at biðia,
Verse: 3    iðgnógan agnar lióma
Verse: 4    brǫgnom bióða oc burom þeira.

Strophe: 22 
Verse: 1    "Biðit sciótliga til scipa ganga
Verse: 2    oc ór Brandeyio búna verða!"
Verse: 3    Þaðan beið þengill, unz þinig qvómo
Verse: 4    halir hundmargir ór Heðinseyio.

Strophe: 23 
Verse: 1    Oc þar af stǫndom ór Stafnsnesi
Verse: 2    beit hans út scriðo oc búin gulli;
Verse: 3    spurði Helgi Hiorleif at því:
Verse: 4    "Hefir þú kannaða koni óneisa?"

Strophe: 24 
Verse: 1    Enn ungr konungr ǫðrom sagði;
Verse: 2    seint qvað at telia af Trǫnoeyri
Verse: 3    langhǫfðuð scip und líðondom,
Verse: 4    þau er í Ǫrvasund útan fóro:

Strophe: 25 
Verse: 1    "Tólf hundruð tryggra manna;
Verse: 2    þó er í Hátúnom hálfo fleira,
Verse: 3    víglið konungs; ván erom rómo."

Strophe: 26 
Verse: 1    Svá brá stýrir stafntioldom af,
Verse: 2    at mildinga mengi vacþi
Verse: 3    oc dǫglingar dagsbrún siá,
Verse: 4    oc siclingar snero up við tré
Verse: 5    vefnistingom á Varinsfirði.

Strophe: 27 
Verse: 1    Varð ára ymr oc iárna glymr,
Verse: 2    brast rǫnd við rǫnd, rero víkingar;
Verse: 3    eisandi gecc und ǫðlingom
Verse: 4    lofðungs floti lǫndom fiarri.

Strophe: 28 
Verse: 1    Svá var at heyra, er saman qvómo
Verse: 2    Kólgo systir oc kilir langir,
Verse: 3    sem biorg eða brim brotna myndi.

Strophe: 29 
Verse: 1    Draga bað Helgi há segl ofarr,
Verse: 2    varðat hrǫnnom hǫfn þingloga,
Verse: 3    þá er ógorlig Ægis dóttir
Verse: 4    stagstiórnmǫrom steypa vildi.

Strophe: 30 
Verse: 1    Enn þeim siálfom Sigrún ofan,
Verse: 2    fólcdiorf, um barg oc fari þeira;
Verse: 3    snøriz ramliga Rán ór hendi
Verse: 4    giálfrdýr konungs at Gnipalundi.

Strophe: 31 
Verse: 1    Svát þar um aptan í Unavágom
Verse: 2    flaust fagrbúin flióta knátto;
Verse: 3    enn þeir siálfir frá Svarinshaugi
Verse: 4    með hermðar hug her kǫnnoðo.

Strophe: 32 
Verse: 1    Frá goðborinn Guðmundr at því:
Verse: 2    "Hverr er landreki, sá er liði stýrir,
Verse: 3    oc hann feicnalið forir at landi?"

Strophe: 33 
Verse: 1    Sinfiotli qvað - slǫng up við rá
Verse: 2    rauðom scildi, rǫnd var ór gulli;
Verse: 3    þar var sundvorðr, sá er svara kunni
Verse: 4    oc við ǫðlinga orðom scipta -:

Strophe: 34 
Verse: 1    "Segðu þat í aptan, er svínom gefr
Verse: 2    oc tícr yðrar teygir at solli,
Verse: 3    at sé Ylfingar austan komnir,
Verse: 4    gunnar giarnir, at Gnipalundi.

Strophe: 35 
Verse: 1    Þar mun Hǫðbroddr Helga finna,
Verse: 2    flugtrauðan gram, í flota miðiom,
Verse: 3    sá er opt hefir ǫrno sadda,
Verse: 4    meðan þú á qvernom kystir þýiar."

Strophe: 36 
Verse: 1    "Fát mantu, fylkir, fornra spialla,
Verse: 2    er þú ǫðlingom ósǫnno bregðr;
Verse: 3    þú hefir etnar úlfa krásir
Verse: 4    oc broðr þínom at bana orðit,
Verse: 5    opt sár sogin með svǫlom munni,
Verse: 6    hefr í hreysi hvarleiðr scriðit."

Strophe: 37 
Verse: 1    "Þú vart vǫlva í Varinseyio,
Verse: 2    scollvís kona, bartu scrǫc saman;
Verse: 3    qvaztu engi mann eiga vilia,
Verse: 4    segg bryniaðan, nema Sinfiotla.

Strophe: 38 
Verse: 1    Þú vart in scoða, scass, valkyria,
Verse: 2    ǫtul, ámátlig, at Alfǫður;
Verse: 3    mundo einheriar allir beriaz,
Verse: 4    svévís kona, um sacar þínar.

Strophe: 39 
Verse: 1    Nío átto við á nesi Ságo
Verse: 2    úlfa alna, ec var einn faðir þeira."

Strophe: 40 
Verse: 1    "Faðir varattu fenrisúlfa,
Verse: 2    ǫllom ellri, svá at ec muna,
Verse: 3    sízt þic geldo fyr Gnipalundi
Verse: 4    þursa meyiar, á Þórsnesi.

Strophe: 41 
Verse: 1    Stiúpr vartu Siggeirs, látt und stǫðom heima,
Verse: 2    varglióðom vanr á viðom úti;
Verse: 3    kómo þér ógǫgn ǫll at hendi,
Verse: 4    þá er broðr þínom brióst raufaðir.
Verse: 5    Gorðir þic frægian af firinvercom.

Strophe: 42 
Verse: 1    Þú vart brúðr Grana á Brávelli,
Verse: 2    gullbitluð, vart gor til rásar;
Verse: 3    hafða ec þér móðri mart sceið riðit,
Verse: 4    svangri und sǫðli, simul forbergis."

Strophe: 43 
Verse: 1    "Sveinn þóttir þú siðlauss vera,
Verse: 2    þá er þú Gullnis geitr mólcaðir,
Verse: 3    enn í annat sinn Imðar dóttir,
Verse: 4    tǫtrughypia; vill þú tǫlo lengri?"

Strophe: 44 
Verse: 1    "Fyrr vilda ec at Frecasteini
Verse: 2    hrafna seðia á hræom þínom,
Verse: 3    enn tícr yðrar teygia at solli
Verse: 4    eða gefa gǫltom; deili grǫm við þic!"

Strophe: 45 
Verse: 1    "Væri ycr, Sinfiotli, somra myclo
Verse: 2    gunni at heyia oc glaða ǫrno,
Verse: 3    enn sé ónýtom orðom at bregðaz,
Verse: 4    þótt hringbrotar heiptir deili.

Strophe: 46 
Verse: 1    Þicciat mér góðir Granmars synir,
Verse: 2    þó dugir siclingom satt at mæla;
Verse: 3    þeir hafa marcat á Móinsheimom,
Verse: 4    at hug hafa hiorom at bregða."

Strophe: 47 
Verse: 1    Þeir af ríki renna léto
Verse: 2    Svipuð oc Sveggiuð, Sólheima til,
Verse: 3    dala dǫggótta, døcqvar hlíðir;
Verse: 4    scalf Mistar marr, hvars megir fóro.

Strophe: 48 
Verse: 1    Motto þeir tiggia í túnhliði,
Verse: 2    sǫgðo stríðliga stilli qvómo;
Verse: 3    úti stóð Hǫðbroddr, hiálmi faldinn,
Verse: 4    hugði hann ióreið ættar sinnar:
Verse: 5    "Hví er hermðar litr á Hniflungom?"

Strophe: 49 
Verse: 1    "Snúaz hér at sandi snofgir kiólar,
Verse: 2    racca hirtir oc rár langar,
Verse: 3    scildir margir, scafnar árar,
Verse: 4    gǫfuct lið gylfa, glaðir Ylfingar.

Strophe: 50 
Verse: 1    Ganga fimtán fólc up á land,
Verse: 2    þó er í Sogn út siau þúsundir;
Verse: 3    liggia hér í grindom fyr Gnipalundi
Verse: 4    brimdýr blásvort oc búin gulli.
Verse: 5    Þar er miclo mest mengi þeira,
Verse: 6    muna nú Helgi hiorþing dvala."

Strophe: 51 
Verse: 1    "Renni raucn bitluð til reginþinga,
Verse: 2    enn Sporvitnir at Sparinsheiði,
Verse: 3    Mélnir oc Mýlnir til Myrcviðar!
Verse: 4    látið engi mann eptir sitia,
Verse: 5    þeira er benlogom bregða kunni.

Strophe: 52 
Verse: 1    Bióði þér Hǫgna oc Hrings sonom,
Verse: 2    Atla oc Yngva, Ǫlf inom gamla;
Verse: 3    þeiro giarnir gunni at heyia,
Verse: 4    látom Vǫlsunga viðrnám fá!"

Strophe: 53 
Verse: 1    Svipr einn var þat, er saman qvómo
Verse: 2    fǫlvir oddar at Frecasteini;
Verse: 3    ey var Helgi, Hundings bani,
Verse: 4    fyrstr í fólki, þar er firar bǫrðuz,
Verse: 5    ostr á ímo, alltrauðr flugar;
Verse: 6    sá hafði hilmir hart móðacarn.

Strophe: 54 
Verse: 1    Kómo þar ór himni hiálmvitr ofan
Verse: 2    - óx geira gnýr -, þær er grami hlífðo;
Verse: 3    þá qvað þat Sigrún - sárvitr flugo,
Verse: 4    át hálo scær af Hugins barri -:

Strophe: 55 
Verse: 1    "Heill scaltu, vísi, virða nióta,
Verse: 2    áttstafr Yngva, oc una lífi,
Verse: 3    er þú felt hefir inn flugartrauða
Verse: 4    iofur, þann er olli ægis dauða.

Strophe: 56 
Verse: 1    Oc þér, buðlungr, samir bæði vel
Verse: 2    rauðir baugar oc in ríkia mær;
Verse: 3    heill scaltu, buðlungr, bæði nióta
Verse: 4    Hǫgna dóttur oc Hringstaða,
Verse: 5    sigrs oc landa; þá er sócn lokit."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.