TITUS
Edda
Part No. 17
Previous part

Song: Grp. 
Strophe: 0 
(GRÍPISSPÁ)


Verse: 1    Grípir hét sonr Eylima, bróðir Hiordísar. Hann réð
Verse: 2    lǫndom oc var allra manna vitrastr oc framvíss.
Verse: 3    Sigurðr reið einn saman oc kom til hallar Grípis. Sigurðr
Verse: 4    var auðkendr. Hann hitti mann at máli úti fyrir hǫllinni;
Verse: 5    sá nefndiz Geitir. Þá qvaddi Sigurðr hann máls oc spyrr:

Strophe: 1 
Verse: 1    "Hverr byggir hér borgir þessar,
Verse: 2    hvat þann þióðkonung þegnar nefna?"
Verse: 3    "Grípir heitir gumna stióri,
Verse: 4    sá er fastri ræðr foldo oc þegnom."

Strophe: 2 
Verse: 1    "Er horscr konungr heima í landi,
Verse: 2    mun sá gramr við mic ganga at mæla?
Verse: 3    máls er þarfi maðr ókunnigr,
Verse: 4    vil ec fliótliga finna Grípi."

Strophe: 3 
Verse: 1    "Þess mun glaðr konungr Geiti spyria,
Verse: 2    hverr sá maðr sé, er máls qveðr Grípi."
Verse: 3    "Sigurðr ec heiti, borinn Sigmundi,
Verse: 4    enn Hiordís er hilmis móðir."

Strophe: 4 
Verse: 1    Þá gecc Geitir Grípi at segia:
Verse: 2    "Hér er maðr úti, ókuðr, kominn;
Verse: 3    hann er ítarligr at áliti,
Verse: 4    sá vill, fylkir, fund þinn hafa."

Strophe: 5 
Verse: 1    Gengr ór scála scatna dróttinn
Verse: 2    oc heilsar vel hilmi komnom:
Verse: 3    "Þiggðu hér, Sigurðr! væri somra fyrr,
Verse: 4    enn þú, Geitir, tac við Grana siálfom!"

Strophe: 6 
Verse: 1    Mæla námo oc mart hiala,
Verse: 2    þá er ráðspakir reccar funduz.
Verse: 3    "Segðu mér, ef þú veizt, móðurbróðir:
Verse: 4    hvé mun Sigurði snúna ævi?"

Strophe: 7 
Verse: 1    "Þú munt maðr vera mæztr und sólo
Verse: 2    oc hæstr borinn hveriom iofri,
Verse: 3    giofull af gulli, enn gløggr flugar,
Verse: 4    ítr áliti oc í orðom spacr."

Strophe: 8 
Verse: 1    "Segðu, gegn konungr, gerr, enn ec spyria
Verse: 2    snotr, Sigurði, ef þú siá þicciz:
Verse: 3    hvat mun fyrst goraz til farnaðar,
Verse: 4    þá er ór garði emc genginn þínom?"

Strophe: 9 
Verse: 1    "Fyrst muntu, fylkir, fǫður um hefna
Verse: 2    oc Eylima allz harms reca;
Verse: 3    þú munt harða Hundings sono,
Verse: 4    snialla, fella, mundu sigr hafa."

Strophe: 10 
Verse: 1    "Segðu, ítr konungr, ættingi, mér,
Verse: 2    heldr horscliga, er við hugat mælom:
Verse: 3    sérðu Sigurðar snǫr brǫgð fyrir,
Verse: 4    þau er hæst fara und himinscautom?"

Strophe: 11 
Verse: 1    "Mundu einn vega orm inn frána,
Verse: 2    þann er gráðugr liggr á Gnitaheiði;
Verse: 3    þú munt báðom at bana verða,
Verse: 4    Regin oc Fáfni, rétt segir Grípir."

Strophe: 12 
Verse: 1    "Auðr mun orinn, ef ec eflic svá
Verse: 2    víg með virðom, sem þú víst segir;
Verse: 3    leið at huga oc lengra seg:
Verse: 4    hvat mun enn vera ævi minnar?"

Strophe: 13 
Verse: 1    "Þú munt finna Fáfnis boli
Verse: 2    oc up taca auð inn fagra,
Verse: 3    gulli hloða á Grana bógo;
Verse: 4    ríðr þú til Giúca, gramr vígrisinn."

Strophe: 14 
Verse: 1    "Enn scaltu hilmi í hugazroðo,
Verse: 2    framlyndr iofurr, fleira segia;
Verse: 3    gestr em ec Giúca, oc ec geng þaðan:
Verse: 4    hvat mun enn vera ævi minnar?"

Strophe: 15 
Verse: 1    "Sefr á fialli fylkis dóttir,
Verse: 2    biort, í brynio, eptir bana Helga;
Verse: 3    þú munt hǫggva hvǫsso sverði,
Verse: 4    brynio rísta með bana Fáfnis."

Strophe: 16 
Verse: 1    "Brotin er brynia, brúðr mæla tecr,
Verse: 2    er vacnaði víf ór svefni;
Verse: 3    hvat mun snót at heldr við Sigurð mæla,
Verse: 4    þat er at farnaði fylki verði?"

Strophe: 17 
Verse: 1    "Hon mun ríkiom þér rúnar kenna,
Verse: 2    allar, þær er aldir eignaz vildo,
Verse: 3    oc á mannz tungo mæla hveria,
Verse: 4    lif með læcning; lifðu heill, konungr!"

Strophe: 18 
Verse: 1    "Nú er því lokit, numin ero froði,
Verse: 2    oc em braut þaðan búinn at ríða;
Verse: 3    leið at huga oc lengra seg:
Verse: 4    hvat mun meirr vera minnar ævi?"

Strophe: 19 
Verse: 1    "Þú munt hitta Heimis bygðir
Verse: 2    oc glaðr vera gestr þióðkonungs;
Verse: 3    farið er, Sigurðr, þatz ec fyrir vissac,
Verse: 4    scala fremr enn svá fregna Grípi."

Strophe: 20 
Verse: 1    "Nú fær mér ecca orð, þaztu mæltir,
Verse: 2    þvíat þú fram um sér, fylkir, lengra;
Verse: 3    veiztu ofmikit angr Sigurði,
Verse: 4    því þú, Grípir, þat gerra segia."

Strophe: 21 
Verse: 1    "Lá mér um osco ævi þinnar
Verse: 2    liósast fyrir líta eptir;
Verse: 3    rétt emca ec ráðspacr taliðr,
Verse: 4    né in heldr framvíss, farit, þatz ec vissac."

Strophe: 22 
Verse: 1    "Mann veit ec engi fyr mold ofan,
Verse: 2    þann er fleira sé fram enn þú, Grípir;
Verse: 3    scalattu leyna, þótt liótt sé,
Verse: 4    eða mein goriz á mínom hag."

Strophe: 23 
Verse: 1    "Era með lǫstom lǫgð ævi þér,
Verse: 2    láttu, inn ítri, þat, ǫðlingr, nemaz!
Verse: 3    þvíat uppi mun, meðan ǫld lifir,
Verse: 4    naddéls boði, nafn þitt vera."

Strophe: 24 
Verse: 1    "Verst hyggiom því, verðr at sciliaz
Verse: 2    Sigurðr við fylki at sógoro;
Verse: 3    leið vísa þú - lagt er alt fyrir -,
Verse: 4    morr, mér, ef þú vilt, móðurbróðir!"

Strophe: 25 
Verse: 1    "Nú scal Sigurði segia gerva,
Verse: 2    allz þengill mic til þess neyðir;
Verse: 3    mundo víst vita, at vætki lýgr:
Verse: 4    dogr eitt er þér dauði ætlaðr."

Strophe: 26 
Verse: 1    "Vilcat ec reiði rícs þióðkonungs,
Verse: 2    góðráðs, at heldr, Grípis, þiggia;
Verse: 3    nú vilc víst vita, þótt viltki sé:
Verse: 4    hvat á sýnt Sigurðr sér fyr hǫndom?"

Strophe: 27 
Verse: 1    "Flióð er at Heimis, fagrt álitom
Verse: 2    - hana Brynhildi bragnar neina -,
Verse: 3    dóttir Buðla, enn dýrr konungr
Verse: 4    harðugðict man, Heimir, foðir."

Strophe: 28 
Verse: 1    "Hvat er mic at því, þótt mær sé,
Verse: 2    fǫgr áliti, fodd at Heimis?
Verse: 3    þat scaltu, Grípir, gorva segia,
Verse: 4    þvíat þú ǫll um sér ørlǫg fyrir."

Strophe: 29 
Verse: 1    "Hon firrir þic flesto gamni,
Verse: 2    fǫgr áliti fóstra Heimis;
Verse: 3    svefn þú né sefr, né um sacar domir,
Verse: 4    gáraðu manna, nema þú mey sér."

Strophe: 30 
Verse: 1    "Hvat mun til lícna lagt Sigurði?
Verse: 2    segðu, Grípir, þat, ef þú siá þicciz;
Verse: 3    mun ec meyna mundi kaupa,
Verse: 4    þá ina fǫgro fylkis dóttur?"

Strophe: 31 
Verse: 1    "Iþ munoð alla eiða vinna,
Verse: 2    fullfastliga, fá munoð halda;
Verse: 3    verið hefir þú Giúca gestr eina nótt,
Verse: 4    mantattu horsca Heimis fóstro."

Strophe: 32 
Verse: 1    "Hvárt er þá, Grípir? get þú þess fyr mér!
Verse: 2    sér þú geðleysi í grams scapi?
Verse: 3    er ec scal við mey þá málom slíta,
Verse: 4    er ec allz hugar unna þóttomc."

Strophe: 33 
Verse: 1    "Þú verðr, siclingr, fyr svicom annars,
Verse: 2    mundo Grímhildar gialda ráða;
Verse: 3    mun bióða þér biarthaddað man,
Verse: 4    dóttur sína, dregr hon vél at gram."

Strophe: 34 
Verse: 1    "Mun ec við þá Gunnar gorva hleyti
Verse: 2    oc Guðrúno ganga at eiga?
Verse: 3    fullqvæni þá fylkir væri,
Verse: 4    ef meintregar mér angraðit."

Strophe: 35 
Verse: 1    "Þic mun Grímhildr gorva véla,
Verse: 2    mun hon Brynhildar biðia fýsa
Verse: 3    Gunnari til handa, Gotna drótni;
Verse: 4    heitr þú fliótliga for fylkis móður."

Strophe: 36 
Verse: 1    "Mein ero fyr hǫndom, má ec líta þat,
Verse: 2    ratar gorliga ráð Sigurðar,
Verse: 3    ef ec scal morrar meyiar biðia
Verse: 4    ǫðrom til handa, þeirar ec unna vel."

Strophe: 37 
Verse: 1    "Er munoð allir eiða vinna,
Verse: 2    Gunnarr oc Hǫgni, enn þú, gramr, þriði,
Verse: 3    þvíat litom víxla, er á leið eroð,
Verse: 4    Gunnarr oc þú, Grípir lýgr eigi."

Strophe: 38 
Verse: 1    "Hví gegnir þat? hví scolom scipta
Verse: 2    litom oc látom, er á leið erom?
Verse: 3    þar mun fláræði fylgia annat,
Verse: 4    atalt með ǫllo: enn segðu, Grípir!"

Strophe: 39 
Verse: 1    "Lit hefir þú Gunnars oc læti hans,
Verse: 2    mælsco þína oc meginhyggior;
Verse: 3    mundu fastna þér framlundaða
Verse: 4    fóstro Heimis, sér vætr fyr því."

Strophe: 40 
Verse: 1    "Verst hyggiom því, vándr munc heitinn,
Verse: 2    Sigurðr, með seggiom, at sógoro;
Verse: 3    vilda ec eigi vélom beita
Verse: 4    iofra brúði, er ec ozta veitc."

Strophe: 41 
Verse: 1    "Þú munt hvíla, hers oddviti,
Verse: 2    mærr, hiá meyio, sem þín móðir sé;
Verse: 3    því mun uppi, meðan ǫld lifir,
Verse: 4    þióðar þengill, þitt nafn vera.

Strophe: 43 
Verse: 1    Saman muno brullaup bæði druccin,
Verse: 2    Sigurðar oc Gunnars, í sǫlom Giúca;
Verse: 3    þá hǫmom víxlit, er it heim komit,
Verse: 4    hefir hvárr fyr því hyggio sína."

Strophe: 42 
Verse: 1    "Mun góða qván Gunnarr eiga,
Verse: 2    mærr, með mǫnnom - mér segðu, Grípir! -,
Verse: 3    þóat hafi þriár nætr þegns brúðr hiá mér,
Verse: 4    snarlynd, sofit? slícs eroð domi.

Strophe: 44 
Verse: 1    Hvé mun at ynði eptir verða
Verse: 2    mægð með mǫnnom? mér segðu, Grípir!
Verse: 3    mun Gunnari til gamans ráðit
Verse: 4    síðan verða, eða siálfom mér?"

Strophe: 45 
Verse: 1    "Minnir þic eiða, máttu þegia þó,
Verse: 2    antu Guðrúno góðra ráða:
Verse: 3    enn Brynhildr þicciz, brúðr, vargefin,
Verse: 4    snót fiðr vélar sér at hefndom."

Strophe: 46 
Verse: 1    "Hvat mun at bótom brúðr sú taca,
Verse: 2    er vélar vér vífi gerðom?
Verse: 3    hefir snót af mér svarna eiða,
Verse: 4    enga efnda, enn unat lítit."

Strophe: 47 
Verse: 1    "Mun hon Gunnari gorva segia,
Verse: 2    at þú eigi vel eiðom þyrmðir,
Verse: 3    þá er ítr konungr af ǫllom hug,
Verse: 4    Giúca arfi, á gram trúði."

Strophe: 48 
Verse: 1    "Hvat er þá, Grípir? get þú þess fyr mér!
Verse: 2    mun ec saðr vera at sǫgo þeiri?
Verse: 3    eða lýgr á mic lofsæl kona
Verse: 4    oc á siálfa sic? segðu, Grípir, þat!"

Strophe: 49 
Verse: 1    "Mun fyr reiði ríc brúðr við þic
Verse: 2    né af oftrega allvel scipa;
Verse: 3    viðr þú góðri grand aldregi,
Verse: 4    þó ér víf konungs vélom beittoð."

Strophe: 50 
Verse: 1    "Mun horscr Gunnarr at hvǫton hennar,
Verse: 2    Guthormr oc Hǫgni ganga síðan?
Verse: 3    muno synir Giúca á sifiugom mér
Verse: 4    eggiar rióða? enn segðu, Grípir!"

Strophe: 51 
Verse: 1    "Þá er Guðrúno grimt um hiarta,
Verse: 2    er broðr hennar þér til bana ráða,
Verse: 3    oc at ǫngo verðr ynði síðan
Verse: 4    vitro vífi; veldr því Grímildr.

Strophe: 52 
Verse: 1    Því scal hugga þic, hers oddviti,
Verse: 2    sú mun gipt lagit á grams ævi:
Verse: 3    munat mætri maðr á mold koma,
Verse: 4    und sólar siot, enn þú, Sigurðr, þiccir."

Strophe: 53 
Verse: 1    "sciliomc heilir! Munat scǫpom vinna,
Verse: 2    nú hefir þú, Grípir, vel gort, sem ec beiddac;
Verse: 3    fliótt myndir þú fríðri segia
Verse: 4    mína ævi, ef þú mættir þat."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.