TITUS
Johannes Fischart, Geschichtsklitterung
Part No. 500
Previous part

Paragraph: 4      Hierauff repetiert vnd repliciert man die Lection28 des vorigen tags, das er die nicht im SchulSack verligen ließ. Da recitiert ers29 außwendig : goß, gründet vnd gab vmb mehr verstands willen desselbigen etlich Exempel von fürfallenden händeln vnnd geschäfften, die er oder andere practicirt hetten : Das weret etwan auff zwo oder drey stunden, biß er sich gar außgerüst, eingnestelt, gefegt, inn die Händ gespeitzet, die Stümpff auffgebunden, Page: 337   außgebürstet, ersteubert vnd erblasen hett. Da kam man erst darnach auff den rechten butzen, that jm die ordenliche Lection auff drey stunden. Nach vollendung dessen, giengen sie hinauß auff Ferripfatetisch, conferierten vnd vnterredeten sich von einhalt der gehaltenen Lectur, vnd fügten sich hiemit auff das grün Bruch, oder auff die Schweitzermatten, die Reinisch Wisen, vnd die Schwäbisch Au, da spilten sie des Ballens, sprangen der Röck, stiessen der Böck, des Handballens, des vberkreyßschenckens, der Grubenkinder, des Rucksprungs, des Häuschreckensprungs mit gleichen füssen fürsich, des Jungfrauwurffs durch die Bein, der Barr, des Wettlauffs, des einbeinigen Thurniers, der Garnwind, des Brennjagens, der fünff Sprüng der weitest, vnd anders, damit sie eben so weidlich den Leib übten, als sie zuvor das Gemüt vnd die Seel geübt hetten. Vnnd stunden solche Spiel jnen frey, dann sie liessen dauon ab, wann es jnen geful : Vnd hörten gemeinlich auff, wann sie vber den gantzen Leib vor schweiß tropfften, wie ein Badschrepffer, oder sonst ermüdet waren. Darauff trockneten, wischeten vnd riben sie sich sehr wol, zogen frische hemder an, neue Page of re-edition: 262  kleyder vber alte Filtzläuß, vnd gingen damit allegemachlich fuß fur fuß zu hauß30, zusehen ob der Jmbiß fertig sey. Vnder deß sie nun warteten, prachten sie beredeter, diuisierlicher, Discurirlicher, auisirlicher weiß die zeit zu, mit erkündigung vnnd erwegung allerley zeitung, discutirung etlicher Antiquitteten, erzehlung etlicher schöner Sprüch31, die sie auß der Lection behalten hatten32. Welchs sie nicht lang triben, da fing sie der Herr Happetit von Darmstatt vnnd Eßlingen an zureiten : Satzten sich derwegen ordenlich zu Tisch. Zu anfang des essens laß man etwan ein Lustige Hystori von der alten Page: 338   Dapfferkeit : Biß er ein Trunck Weins gethan hett.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.