TITUS
Johannes Fischart, Geschichtsklitterung
Part No. 505
Previous part

Paragraph: 9      Nachgehends lieff er der Barr, der eyer, des Hirtzes, des Bärens, des Schweins, des Hasens, des Repphuns, der Röck, des Fasanen, sprang der Geiß, sprang vber das Gälglin, Page of re-edition: 268  klettert auff Maximilianisch oder Teurdanckisch der Gemsen, spielt des grossen Ballens, schmiß89 jn so wol mit den füssen als fäusten in die höh : rang, liff, vnd sprang, sprang, lief vnd rang, nit mit trei Passen ein sprung, nit des hinckebincke90 Knapfuß, nicht des Xockspringens91, seit vnd rucksprungs, noch des Böhmischen sprungs, Page: 346   noch auff eim Fuß schupffen : dann sein Abrichter Wolhinan92 sagt, solche Sprüng weren93 nichts werd, noch etwas nutz im Krieg. Sondern in eim zulauff sprang er vber ein graben, an eim Reiffspiß schwang er sich vber alle pfitzen, flog vber ein zaun, ersprang ein wand, lieff sechs schritt ein Maur auff, vnnd erstig also ein Laden vnnd Fenster eines spises hoch, also dz kein Hund sicher am Getter schlief. Schwamm inn vollem stram, zur seiten, die zwär, im kreiß, auf dem rucken, ein Liechtstöcklin, mit gantzem Leib, mit halbem, allein mit den Füssen, allein mit den armen, den einen arm vbersich streckend, vnnd ein Buch darinnen tragend, welches er vngenetzt vber den fluß94 pracht, seinen Mantel inn den Zänen nach ziehend95, wie Julius Cæsar inn Alexandria etwann gethan,96 vnd wie die Spanier bei Mülhausen vber die Elb thaten, schwam auff Türckisch vnterm Wasser, wie die inn newen Insuln, wann sie die Spanier fliehen : dorfft sich nit wie der groß Alexander in ein glaß schrauben lassen, die Schätz des Mörs zuerspähen : stig mit gewalt inn ein zimmlich groß Schiff, mit einer Hand das97 Schiff, in der andern ein stecken haltend : Hielt das Schiff mit den Zänen, wie jener Griech, da jhm beide Händ abgehawen waren : stürtzt sich alsdann wider ins Wasser, den kopff vor an, spilt des Tauchentlins,98 holt ein Pfenning darunter, schloff vnter den Flotz, saß auff den99 Flotz, schwam auff dem Dielen, bürtzelt vmb mit dem Dilen, spilt wie der Walfisch mit den Tonnen, sprang wie die Mörkälber, waltzt sich im Mur, beschmirt sich mit kat, wusch sich wider, hing ein ploch an ein fuß, vnnd schwum darmit : er hett sein Brot mit schwimmen können gewinnen, wie die Kinder inn Egypten am Nil fluß, welchen man nit ehe das Brot gibt, man werffs jhnen dann inn Page: 347   mitteln stram, daß sie inn den Nil darnach schwimmen müssen, vnnd es im Maul holen, wie vnsere Barbehund, da müssens das Hembd vnnd den Mantel wie ein Türckischen bund vmb den kopff winden. Vnd warlich Page of re-edition: 269  es thut den Egyptiern vonnöten, dann weil der Nil stäts nach dem Monliecht außlaufft müssen sie wol von eim Dorff zum andern schwimmen, wie die in Schweden auff Reiß vnnd Reutschuhen zusamen fahrn : welche, wann der weg sehr weit ist, Ried vnd Mörbinssen hernach ziehen, etwann vnderwegen darauff zuruhen100 : diß mußt101 Gargantzuwol alles nachthun : dann wann er oder seine Auffwarter etwas lasen oder hörten, das wacker war, so mußt mans nach machen. Darumb thurniert er auch auff dem Wasser, macht plasen vnd wällen hinden vnd fornen, lieff am gestad vnd hielt den Haußrhat, sprang vber die Prucken ab : darnach wider vber sein Schiff, welchs der Fischer da anhieng, auff das des Müllers Esel drein gieng vnd drinnen vntergieng, auff daß man ein rechtfertigung drauß anfieng, dasselbig wand er herumb, stieß es ab : schalt es : regierets : führets, praucht die nächst Stang für ein Steurruder, tribs geschwind, tribs lind, inn strengem ablauff des strams, wider den stram, in der mit, an dem vffer, hielts im mittelen lauff auff, mit einer hand leitet ers : mit der andern schirmet er vnd trib sein Affenspiel mit einem grossen Ruder, wurff daß Netz auß, stelt den Setzbären, schoß die Fischergere, die Tridenten, die trei Zänig Elger, die Füscingabel, stellt Reuschen, Angelt, zog die Segel an, stig die Seilleiter den Mastbaum auff vnd ab, gieng auff den Zehen auff dem rand, am bort, auff der spitze : wickelt vnd wackelt : justiert vnnd richtet den mörquadrant vnnd Compaß, widerstrebet dem Wind, er ließ sich dem Page: 348   Wind, da band er das Nachsteurruder hoch, da nider, hie zog ers zur lincken, dort zur rechten, vnnd hett also sein flechten vnd fechten.

Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.