TITUS
Johannes Fischart, Geschichtsklitterung
Part No. 587
Previous part

Paragraph: 5      Gargantoa als er vmb die gegene des Forstes zu Vede kam, ward er vom Gotart Wolbeigeist10 gewarnet, daß im Schloß noch etlich Feind legen : welches zuerfahren, rüffet Gargantoa als fast er mocht. Seit jhr drinn, oder nicht? seit jhr drinn, so secht vnd geht drauß : seit jhr nicht drinn, ha so darf es nicht der Wort. Aber ein schelmischer Schützenmeister, so die kunst vom Juden, der den Hertzog Albrecht von Mechelburg vor Franckfort erschoß, gelehrnt, vnnd auff11 der Bastei, welche die Frantzosen Machicoulis vnnd wir Nagloch heissen, stund12, richtet ein stuck büchssen nach jhm, vnnd schoß jhn grausamlich auff die rechte Schläffe, aber schadet jhm eben so wenig als ob jhn einer mit eim Pfirsichkern geschnelt het. Was ist das? sprach Gargantoa, werfft jhr mit Traubenbören zu? der Herbst soll euch wol etwas kosten : meint also nit anders dann es weren der grösten Cananeischen Traubenbör eine gewesen : seufftzt derhalben drüber, daß sie die Edel Creatur so vbel anlegten, gleich wie die Spangrünköch.

Page: 455  
Next part


This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.