TITUS Texts: Johannes Fischart, Geschichtsklitterung

TITUS
Johannes Fischart, Geschichtsklitterung
Part No. 644

Paragraph: 4 Hierauff führt er sein Hör ins Feld, vnd stellet die ersatzung vnnd hinderhalt auff beide seiten des Bergs. Der Mönch nam zu jhm sechs Fänlin Fußvolcks, vnd zwey hundert Kürisser, mit denen setzt er mit sonderer geschicklichkeit vber ein Mur oder gemöß, also daß er die höhe auff der Straß gehn Loudin zum vortheil einname. Vnter des gieng der Sturm in alle macht an : Die Picrocholisten wußten inn solchem plötzlichem getümmel nicht, ob rhatsamer wer¹³ außzufallen, vnd die anlauffende zuträngen, oder die Statt einzuhalten, vnnd sich lassen pfrengen : Gleichwol wischten sie vnbedacht mit etlichen Panern Hofgesinds hinauß, die wurden schön mit vielen Stuckbüchssen, so all gegen demselben halt gericht waren, empfangen : vnnd damit¹⁴ man dem geschütz des mehr raum geb, es sicherer gegen dem Feind zugebrauchen, wichen die Gurgelstrozzianer¹⁵ in ein Thal hinab, da stoben die Köpff vbersich, daß es sahe, als ob die Buben mit hütlein etwas vom Baum würffen¹⁶.

This text is part of the TITUS edition of Johannes Fischart, Geschichtsklitterung.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.