TITUS
Ulrich von Eschenbach, Alexander
Part No. 45
Previous part

Chapter: 44b  
Schlacht am Grânicus


Verse: 5823       Sich hete Mennôn bereit,
Verse: 5824    mit sehstûsent volkes er reit

Verse: 5825    gegen dem waʒʒer Grânicôn,
Verse: 5826    dâ er ê schumpfentiure lôn

Verse: 5827    an einer tjost hete genumen.
Verse: 5828    Alexandrô wârn die mære komen.

Verse: 5829    dise fünfe sant er dar,
Verse: 5830    daʒ die dâ næmen strîtes war:

Verse: 5831    Gwigrimranz und Jôrân,
Verse: 5832    Gâlôes und Flôriân,

Verse: 5833    der fünfte daʒ was Hûbert,
Verse: 5834    des herze niuwan strîtes gert.

Verse: 5835    mit den ellens vesten
Verse: 5836    den unverzagten gesten

Verse: 5837    gegen Grânicôn ûf den plân
Verse: 5838    sant er vierhundert man.

Verse: 5839    schône heten sie sich bereit.
Verse: 5840    Mennôn het ouch sich geleit

Verse: 5841    als er der vînde beite.
Verse: 5842    ze der tjost er sich bereite.

Verse: 5843    er hete sich genomen vür,
Verse: 5844    Flôriân was in der selben kür.

Verse: 5845    ûf der plânje zwischen den scharn
Verse: 5846    dise zwêne kâmen gevarn

Verse: 5847    gegen einander hurteclîche.
Verse: 5848    die helde lobes rîche

Verse: 5849    tâten mit tjoste einander wê.
Verse: 5850    der ein enphienc aldâ den rê,

Verse: 5851    Mennôn, der sich übel rach:
Verse: 5852    Flôriân daʒ sper durch in stach,

Verse: 5853    dâ von im sîn leben swant.
Verse: 5854    er velte in tôten ûf daʒ lant.

Verse: 5855    er zeiget im mit der tjost nît.
Verse: 5856    dô samilierte sich deʒ strît

Verse: 5857    von den hern beiden.
Verse: 5858    ê die wurden gescheiden,

Verse: 5859    die Asiâne tiefer wunden
Verse: 5860    von den gesten enphunden,

Verse: 5861    die ze tôde brâhten stiure.
Verse: 5862    man sach ûʒ helmen die fiure

Verse: 5863    von slegen ûf gegen lüften varn.
Verse: 5864    Jôrân kunde die vînt niht sparn,

Verse: 5865    Gâlôes mit Hûberte
Verse: 5866    die vînde dô tôdes werte,

Verse: 5867    daʒ die unervorhten
Verse: 5868    mit den iren dô schaden worhten.

Verse: 5869    ich wil den strît mit kurze sagen:
Verse: 5870    der Dariâne wart dâ vil erslagen,

Verse: 5871    mit den daʒ velt dâ wart beströut:
Verse: 5872    des die helle wart ervröut.

Verse: 5873    vil Sarrazîn ir ende dâ kurn.
Verse: 5874    die geste liute ouch dâ verlurn,

Verse: 5875    die Alexander sêre clagte.
Verse: 5876    die âventiure mir sagte

Verse: 5877    wie die geste den sic dô nâmen
Verse: 5878    und der vînde niht hundert wider kâmen.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.