TITUS
Alexanderroman (Wernigeroder Handschrift)
Part No. 48
Previous part

Chapter: 77  
Große Beratung bei Darius


Verse: 1762    Dario kom ain pöt:

Verse: 1763    Dez ward er trawrig und unfrö.
Verse: 1764    Nach seinen fürsten er do

Verse: 1765    Sant und sprach zü in:
Verse: 1766    'Den ich in meinem synn

Verse: 1767    Hann geschaczt ain kint,
Verse: 1768    Seht wie dem sind

Verse: 1769    So vil stet und land
Verse: 1770    Undertann, die sein hand

Verse: 1771    Betwungen hat mit forht.
Verse: 1772    Er hat kürczlich geworht

Verse: 1773    Große dink mit klainem her.
Verse: 1774    Sich tar nymmant zu wer

Verse: 1775    Gen ym seczen do von.
Verse: 1776    Ratënd alle wie wir tünd.

Verse: 1777    Ez wollent vil leiht also
Verse: 1778    Die got.' dez künigs pruder sprach do:

Verse: 1779    'Du sagst selber lob im.
Verse: 1780    Lieber her, vernym,

Verse: 1781    Du geist ym selb grözz er:
Verse: 1782    Lieber künig, wer

Verse: 1783    Sol in dann schelten vor dir?
Verse: 1784    Ains daz ist mein gir

Verse: 1785    Ze sagen von dem held güt:
Verse: 1786    So er zu streit hat müt,

Verse: 1787    Er wil alczeit der erst
Verse: 1788    Sein und der hërst,

Verse: 1789    So man rürt die veind:
Verse: 1790    Die andern die seint

Verse: 1791    Dez küner sicherlich.
Verse: 1792    Dar umb so main ich

Verse: 1793    Daz ir auch also
Verse: 1794    Tün sult.' der künig do

Verse: 1795    Sprach: 'dez wer zu vil.'
Verse: 1796    Ainer der sprach: 'ich wil

Verse: 1797    Iü sagen von Allexander.
Verse: 1798    Wer in an siht, der

Verse: 1799    Müzz erschrecken dor ab.
Verse: 1800    Ir sprecht daz er ain knab

Verse: 1801    Sey: dez ist er nicht.
Verse: 1802    Wer eben sein gesiht

Verse: 1803    Scheczet, der siht wol
Verse: 1804    Daz er manhait ist völ

Verse: 1805    Und dar zu fraysam:
Verse: 1806    Daz ich wol vernam,

Verse: 1807    Daz ich zu Philippo
Verse: 1808    Von dir geschikt ward do

Verse: 1809    Umb den zins gen Kriechen land:
Verse: 1810    Allexander wart erkand

Verse: 1811    Mir do an den stünden.'
Verse: 1812    Ainer sprach: 'wir kunden

Verse: 1813    Uns behelffen paz.
Verse: 1814    Künig, tu daz,

Verse: 1815    Haizz auz dem land Parthös
Verse: 1816    Und auch auzz Medos

Verse: 1817    Und auch von allen landen dein
Verse: 1818    Alles volk vein

Verse: 1819    Bringen auf einen tag,
Verse: 1820    Als vil mann ymmer mag.

Verse: 1821    Künig, so wizz für war,
Verse: 1822    So Allexander zwar

Verse: 1823    Sicht dann die uber möß,
Verse: 1824    So wiß daz er fleuht sein strözz.'

Verse: 1825    Do sprach ain gut kneht:
Verse: 1826    'Her, du vernymm rëht

Verse: 1827    Mich. ez ist oft geschehen
Verse: 1828    Und hann ez selber gesehenn

Verse: 1829    Daz ain groß hert mit schöff
Verse: 1830    Stund her und daz loff

Verse: 1831    Her ain klains wolfflein:
Verse: 1832    Die schaff fluhent alle hin.

Verse: 1833    Ich sprich auf ewr huld daz:
Verse: 1834    Allexander von Macedös

Verse: 1835    Nymmer dürch kain drö
Verse: 1836    Zeuht von dem veld, so

Verse: 1837    Er hat pey im held
Verse: 1838    Die pesten auz erweld.

Verse: 1839    Er schaczt daz volk von Persya
Verse: 1840    Für nichcz. ich sag euch da,

Verse: 1841    Er hat in seiner schar
Verse: 1842    Zway hundert tausent gar

Verse: 1843    Ritterlicher mann
Verse: 1844    Der pesten so mans kan

Verse: 1845    Vinden in der werlte kraiß,
Verse: 1846    Die ir plüt und swaizz

Verse: 1847    Hannd öft verreret dürch in.
Verse: 1848    Wiß daz er in

Verse: 1849    Ist ynneclichen hold
Verse: 1850    Und geit in reychen sold.'




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.