TITUS
Alexanderroman (Wernigeroder Handschrift)
Part No. 121
Previous part

Chapter: 269  
Geburt eines monströsen Kindes in Babylon


Verse: 5935    Süß saz er in dem trön,
Verse: 5936    Die fursten pey im schön,

Verse: 5937    Und richtet auz die lant.
Verse: 5938    Für in braht man zu hant

Verse: 5939    Ain kint, daz ain fraw gepar.
Verse: 5940    Wider all natür gar

Verse: 5941    Waz die gebürt geschaffen:
Verse: 5942    Gleich ainem affen

Verse: 5943    Het ez zwai angesiht,
Verse: 5944    Die warnd hinder sich geriht.

Verse: 5945    Auf dem leib ain manlich gert
Verse: 5946    Het im die natür beschert.

Verse: 5947    Daz underhalb dez nabels waz,
Verse: 5948    Daz lebt: daz oberthalb daz

Verse: 5949    Waz ze möl allez töd.
Verse: 5950    Do mans dem künig dar pöt,

Verse: 5951    Er erschrak ze mol ser
Verse: 5952    Und hiez im pald komen her

Verse: 5953    Ariolum den maister sein.
Verse: 5954    Er sprach: 'waz mag dicz wunder sein ?

Verse: 5955    Und waz ez bedeuten sey,
Verse: 5956    Daz laz mich wißen hie bey.'

Verse: 5957    Als pald er ez geplicket an,
Verse: 5958    Vor laid er wainen began.

Verse: 5959    'Künig, ich sag dir laidige mër.
Verse: 5960    Ez nachet laider da her

Verse: 5961    Daz du dein leben müst enden:
Verse: 5962    Daz tut mir ze er kenden

Verse: 5963    Diesew gebürt ungehëwr.
Verse: 5964    Hör waz ist sein figür.

Verse: 5965    Als sich dicz wunder
Verse: 5966    Ain tail gleicht besunder

Verse: 5967    Menschlichem pild,
Verse: 5968    Daz ander tail ist wild,

Verse: 5969    Weder mensch noch tyer,
Verse: 5970    Ich gelaub daz die vier

Verse: 5971    Ellement sicherlich
Verse: 5972    Nvͤ gebraht dis geleich.

Verse: 5973    Daz ez oben töt ist,
Verse: 5974    Daz bedeut daz du in kurczer frist

Verse: 5975    Sterben müst jëmerlich.
Verse: 5976    Daz im daz gesicht hinder sich

Verse: 5977    Stat, daz sol dir bedëuten wöl
Verse: 5978    Daz nach deinem töd dein reich sol

Verse: 5979    Ertaillet werden weit
Verse: 5980    Und daz vil manig streit

Verse: 5981    Sich dar umb erheben müß:
Verse: 5982    Dez kan nymmer werden püz.

Verse: 5983    Yeder künig maint sein lant
Verse: 5984    Beschirmen vor dez andern hant.'

Verse: 5985    Do Allexander daz vernam,
Verse: 5986    Vil ser er wainen begann

Verse: 5987    Und sprach: 'O almehtiger Got,
Verse: 5988    Ich pit dich gar on allen spöt

Verse: 5989    Daz mir der töd nit köm so snëll
Verse: 5990    Und mir daz leben nit enquëll,

Verse: 5991    Daz ich müg volbringen
Verse: 5992    Dez ich hab gedingen.

Verse: 5993    Müg ez aber nit gesein,
Verse: 5994    So gib ich mich den genaden dein:

Verse: 5995    Schaff mit mir waz du wilt,
Verse: 5996    Dez selben mich nit bevilt.'




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.