TITUS
Alexanderroman (Wernigeroder Handschrift)
Part No. 123
Previous part

Chapter: 288  
Alexanders Tod


Verse: 6255    Allexander moht nit mer
Verse: 6256    Gesprechen von der großen ser

Verse: 6257    Und kert sich gen der wend:
Verse: 6258    Sein leben nam ain end.

Verse: 6259    Ze stund köm in dem lüft
Verse: 6260    Ain döner her gegüft

Verse: 6261    Grözz und zu mol greülich,
Verse: 6262    Mit pliczen, slegen herticlich.

Verse: 6263    Daz ertrich pidem begann,
Verse: 6264    Da Allexander end nam.

Verse: 6265    Waz daz bedeut und bedeuten söl,
Verse: 6266    Daz kan ich euch nit sagen wöl.

Verse: 6267    Wann aines daz dünkt mich
Verse: 6268    Daz die zaichen sicherlich

Verse: 6269    Beschachen durch daz
Verse: 6270    Daz er so höchmütig waz.

Verse: 6271    In benügt nit dor an
Verse: 6272    Daz er all die werlt betwang

Verse: 6273    Under sein gewalt und pöt,
Verse: 6274    Er wolt auch wißen on spöt

Verse: 6275    Waz in dem luft wer,
Verse: 6276    Und wolt versuchen mer

Verse: 6277    Daz mer und die wunder
Verse: 6278    Die dar yn besunder

Verse: 6279    Sind payde clain und größ.
Verse: 6280    Die ellement daz verdrözz

Verse: 6281    Daz er in ye so nachent komen
Verse: 6282    Törst, als ich hon vernomen:

Verse: 6283    Dürch daz beschachen dise wünder.
Verse: 6284    Als ich main besünder,

Verse: 6285    Ist ez ain wunder größ
Verse: 6286    Daz Allexander beslozz

Verse: 6287    Die zehen gesleht,
Verse: 6288    Als man auch vil rëht

Verse: 6289    In der heiligen geschrift list,
Verse: 6290    Wie er sie mit list

Verse: 6291    Beslüst, Gög und Magög.
Verse: 6292    Großer wunder gesach nÿ aüg,

Verse: 6293    Die ye getet kain haydnisch man.
Verse: 6294    Het ez sant Peter getan,

Verse: 6295    Ez wer wünders mer dann vil.
Verse: 6296    Ez kan nymmant an ain zil

Verse: 6297    Sagen waz im Got verhangt
Verse: 6298    Ze tün. dar umb mich nit belangt

Verse: 6299    Waz die Gothait da mit maint
Verse: 6300    Daz sie im so vil erschaint

Verse: 6301    Wunders auf der erde.
Verse: 6302    Nymmant sich dor an kere:

Verse: 6303    Ez waiz Got wol wor umb ers tet.
Verse: 6304    Da von nymmant ze sagen stet.




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.