TITUS
Heinrich von Meissen, Frauenlob
Part No. 9
Previous part

Text: 8 
VIII. Zarter Ton


Strophe: 1 
Verse: 1    Ich höre des vater lere jehen:
Verse: 2    <kint, wiltu sehen
Verse: 3    lieb an dir selben, la dir daz geschehen:
Verse: 4    ʽie minner sorge, ie grozer var'
Verse: 5    trage in dem herzen din, daz sage ich dir vür war,
Verse: 6    so machtu spehen,
Verse: 7    der rat dir nützlich ist.>

Verse: 8    Ir hohen vürsten, set iuch vür,
Verse: 9    sit valsch die tür
Verse: 10    erdrungen hat an rat, an ammetkür!
Verse: 11    habet ouch den dumen in der hant!
Verse: 12    set uf, wem ir bevelhet lib unde eren phant!
Verse: 13    ich höre, ich spür
Verse: 14    gallen in [ ] honeges list.

Verse: 15    Ouch sicht man wol, wie schiere gelücke struchet;
Verse: 16    die hoste vreude sich zu jamer bruchet;
Verse: 17    lieb in leide tuchet.
Verse: 18    ir vürsten, daz nemt in den mut.
Verse: 19    ez wirt iu gut,
Verse: 20    welt ir die vlut
Verse: 21    des lebens tragen in vrist.

Strophe: 2 
Verse: 1    Wer ist ein man got unt der diet?
Verse: 2    an swem geschiet,
Verse: 3    daz in die zit der vierzic jare besiet,
Verse: 4    ob er im selben an gesiget,
Verse: 5    so daz die tugent selb vierde in siner zellen liget,
Verse: 6    und nie verschriet
Verse: 7    die warheit mit ir sage:

Verse: 8    Treit er der reinen vrouwen pris
Verse: 9    mit manheit wis,
Verse: 10    blüt im uz maze ganzer milte ein ris,
Verse: 11    teilt im bescheidenheit ir macht, -
Verse: 12    gedult, barmunge und elich leben, die sint geslacht.
Verse: 13    zu snel, zu lis
Verse: 14    nicht rechtes zorn voljage.

Verse: 15    In zucht und [ ] triuwe sol sin herze welzen.
Verse: 16    swen ich nu spür sin manheit also velzen,
Verse: 17    set, dem wil ich smelzen
Verse: 18    ein lob uz miner künste golt.
Verse: 19    swer dienet den solt,
Verse: 20    wib, dem sit holt.
Verse: 21    mit liebe er iu behage.

Strophe: 3 
Verse: 1    Swelch sat zu vru dem acker wirt,
Verse: 2    wol die verbirt
Verse: 3    ein billich sniden, als die zit begirt.
Verse: 4    swelch mus zu vil let in ir hol,
Verse: 5    daz sie dar uz entwichen muz, dern ist nicht wol,
Verse: 6    swenne ir geswirt
Verse: 7    der katzen slichen zu.

Verse: 8    Swelch jugent sich zu vru verliget,
Verse: 9    wie ob gesiget
Verse: 10    gemach den eren an, unpris ir pfliget.
Verse: 11    swer ouch zu gach gemach verslet,
Verse: 12    daz ist ein ungewin, ob in uncraft bevet.
Verse: 13    swer beide wiget,
Verse: 14    in beiden maze er tu.

Verse: 15    Zu vru gemach tut gerne afterriuwe,
Verse: 16    zu lange unruwe dem leben ist untriuwe.
Verse: 17    starken lip ich schiuwe,
Verse: 18    der sich nicht vrischet mit der tat.
Verse: 19    swes mut so stat,
Verse: 20    der habe den rat,
Verse: 21    daz er sich münche vru.

Strophe: 4 
Verse: 1    Mit jungen junc, mit alten alt,
Verse: 2    mit snellen balt,
Verse: 3    mit vrevelen vrech, mit hübeschen wolgestalt,
Verse: 4    ie nach der zit sol man daz wegen.
Verse: 5    vil maniger hiure brücket, der zu jare muz stegen.
Verse: 6    daz haben gezalt
Verse: 7    die wisen uns vür gut.

Verse: 8    Wis under dem, der obe dir si.
Verse: 9    wis neben bi
Verse: 10    dem ebenen din an art, an eren zwi.
Verse: 11    wis obe diner undern diet.
Verse: 12    volge im mit ganzes herzen craft, swer dir daz riet:
Verse: 13    ich sage dich vri
Verse: 14    vor schandenvarwer vlut.

Verse: 15    La dich in senftem, stetem grüze vinden,
Verse: 16    sprich lieplich zu den alden unt den kinden,
Verse: 17    so muz sich gesinden
Verse: 18    zu dir der menige prislich hort.
Verse: 19    uz hohem ort
Verse: 20    ein vriuntlich wort,
Verse: 21    daz willet nidern mut.

Strophe: 5 
Verse: 1    Wa prüve ich ritterliche phat
Verse: 2    an prises wat?
Verse: 3    nu Manheit, dir bevolhen si der rat.
Verse: 4    lere uns die jungen ritter tugent,
Verse: 5    bedenke, waz & ir wirde ^bringe prises^ & mugent.
Verse: 6    ʽwer wandel hat,
Verse: 7    der & vecht ein niuwen kür,

Verse: 8    Swer & valsch [ ] <zu> ritter wirt gekleit &,
Verse: 9    <we> im, der treit
Verse: 10    der ritterschaft ein swachez kunterfeit.
Verse: 11    nach afterriuwe prüve ein <man>
Verse: 12    und merke, daz er müge bi ritterschaft bestan.
Verse: 13    her-arm, daz meit
Verse: 14    ie wiser liute tür.

Verse: 15    Her-arm, daz treit ein schemic siden hemde,
Verse: 16    her-arm, daz heizet wol vroun Eren lemde,
Verse: 17    tugende sint im vremde.
Verse: 18    si daz dir spiene dins herzen vlut
Verse: 19    menlichen mut,
Verse: 20    sich, ritter gut,
Verse: 21    din pris sich nie [ ] <verlür>.'

Strophe: 6 
Verse: 1    Swer nu zu blicke dienen wil
Verse: 2    und smehet vil,
Verse: 3    ir herren, merket [ ] siner dienste zil.
Verse: 4    an swem ir eines valsch erjaget,
Verse: 5    vor dem bewart iuch, als der wise man iu saget,
Verse: 6    e daz sin spil
Verse: 7    mit falscheit meine sich.

Verse: 8    Die wile und sie nicht schaden mügen
Verse: 9    & nach losen tügen &,
Verse: 10    so honigen sie den dienst mit valschen trugen.
Verse: 11    & swenn [ ] <sich> die hant gefalten & mag,
Verse: 12    so wizzet, daz sie tun der triuwen einen slag
Verse: 13    mit todes zügen.
Verse: 14    da bi so lere ich mich,

Verse: 15    Daz nieman sol & den vint zu nahen füren
Verse: 16    und <haben>, ob er <in> selber wil nöten &, snüren.
Verse: 17    [ ] möchte ein wolf berüren
Verse: 18    die schaf vor hute, er stele ir nicht.
Verse: 19    zu solcher schicht
Verse: 20    habet, fürsten, pflicht.
Verse: 21    sie git iu selden strich.

Strophe: 7 
Verse: 1    Swer gut nicht kan für gut [ ] verdoln,
Verse: 2    ob der muz holn
Verse: 3    ein [ ] brennen und darnach verbrunnen koln,
Verse: 4    dem widervert des frosches sunc,
Verse: 5    den nach dem senften stocke fraz ein grüner unc,
Verse: 6    als er verstoln
Verse: 7    quam in den pful gefarn.

Verse: 8    Ich meine, die dienest gernde schar
Verse: 9    sol dienen; dar
Verse: 10    durch [ ] man sie mit freude und mit craft bewar.
Verse: 11    in triuwen und in reiner tugent
Verse: 12    sie suln <ouch> von im liden allez, daz sie <sint> mugent.
Verse: 13    ir valsch gefar
Verse: 14    mag sich gein im wol sparn.

Verse: 15    Den rechten vogt kan nieman übergelten.
Verse: 16    verzeret wirt ein guter herre selten.
Verse: 17    man mag [ ] hiure schelten,
Verse: 18    daz man zu jare neme für heil.
Verse: 19    wide unde seil,
Verse: 20    daz si ir teil,
Verse: 21    die fürsten sust verscharn.

Strophe: 8 
Verse: 1    Ir herren, wizzet, waz ir tut:
Verse: 2    tugent oder unfrut
Verse: 3    man saget von iu künigen [ ], fürsten vrut.
Verse: 4    ir graven, frien, dienestman,
Verse: 5    ir ritter, fürbaz sult ich nennen noch enkan,
Verse: 6    sit daz mich lut
Verse: 7    kunst uf bescheidenheit.

Verse: 8    Ja weiz ich vil, des ich nicht tar
Verse: 9    gemelden gar.
Verse: 10    ich sihe und wil nicht sehen noch hören, dar
Verse: 11    ob mich min zucht da heizet dagen.
Verse: 12    ez türren ander liute kunden unde sagen,
Verse: 13    daz offenbar
Verse: 14    wirt iu die kundikeit.

Verse: 15    Nieman kan hoher herren tat bedecken,
Verse: 16    sie sin gut oder swach, man tar sie [ ] wecken.
Verse: 17    alle risen [ ], recken,
Verse: 18    die kunden des nicht understan:
Verse: 19    und tar ein man
Verse: 20    untat began,
Verse: 21    sie komt mit worten breit.

Strophe: *9 
Verse: 1    Sechs ding in ein die schrift gebar;
Verse: 2    zwei von der schar
Verse: 3    der andern vier [ ] sich teilen abe gar,
Verse: 4    so daz ir ieslichem so schon
Verse: 5    geistlichen sint erwelt zwei houbet [ ] fron,
Verse: 6    so ist ir nar
Verse: 7    wol mit der selden stric.

Verse: 8    Vier edelheit saget uns die schrift
Verse: 9    uz voller gift:
Verse: 10    schaz [ ] wol und ouch darzu des stammes stift
Verse: 11    sint zwo werltliche edelheit,
Verse: 12    zwei geistlich adel sint der kunst ein tugentcleit.
Verse: 13    & wie wol ez trift
Verse: 14    rilichen honiges ric &.

Verse: 15    Schaz und geburt gein libes adel biegen,
Verse: 16    so wil der geist kunst mit der tugent wigen,
Verse: 17    & [ ] sust <in> ein muz fliegen &
Verse: 18    frischeftig, wirdig, edel man.
Verse: 19    wol im, swer kan
Verse: 20    sins sinnes ban
Verse: 21    tragen in adels blic.

Strophe: *10_[a] 
Verse: 1    Wir dürfen got die schuld nicht geben,
Verse: 2    ob wir sust leben,
Verse: 3    daz wir mit [ ] willen hie nach sünden streben.
Verse: 4    böse unde gut ist uns gezalt
Verse: 5    uf erden hie gar sicherlichen manigvalt.
Verse: 6    & nu merke gar eben:
Verse: 7    vor <dem> gerichte dort

Verse: 8    Sust han gesprochen alle die &.
Verse: 9    nu merket hie,
Verse: 10    swa man den sin hin keret, & [ ] geschehe [ ] <ez> ie
Verse: 11    in maniger wis gar ordenlich
Verse: 12    zu helfe <...> den höchsten, milten fürsten rich,
Verse: 13    daz im sin wie &
Verse: 14    <...> wirt gar zerstort.

Verse: 15    Hie ist geteilet, swer da kiesen welle,
Verse: 16    zu himelriche oder <hin> zu helle.
Verse: 17    [ ] swer sin ungefelle
Verse: 18    erkiesen wil, der hat die kür,
Verse: 19    des himels tür
Verse: 20    alsus verlür:
Verse: 21    der töt sich, <we> den mort!

Strophe: *11_[b] 
Verse: 1    Swaz man gesprechen, singen mag
Verse: 2    nacht unde tag,
Verse: 3    swaz guter lere [ ] in wisem hirne lag,
Verse: 4    daz loufet al uf einen ort:
Verse: 5    wie du der sele hütest vor des meiles port.
Verse: 6    sich, den bejag
Verse: 7    so eischet got von dir.

Verse: 8    Sit daz din leben also stat,
Verse: 9    daz ez vergat,
Verse: 10    des laz dich vinden hie in [ ] guter tat.
Verse: 11    ez weret sam ein ougenblic,
Verse: 12    und wenn got wil, so leget der tod uns sinen stric.
Verse: 13    daz ist min rat,
Verse: 14    & und lebest & nicht als ein tier.

Verse: 15    Du bist gehöcht ob aller creatiure,
Verse: 16    dir dient luft, erde, wazzer und daz viure.
Verse: 17    [ ] ^nicht wart^ so gehiure
Verse: 18    als menschen geist und frier mut.
Verse: 19    ergat in gut,
Verse: 20    sin schepfer tut
Verse: 21    im sine helfe schier.

Strophe: 12_[a] 
Verse: 1    Wie pfaffenfürsten <sint> gestigen,
Verse: 2    man hat verswigen.
Verse: 3    der leien fürsten haben sich [ ] halb verzigen:
Verse: 4    - da man e milte herren vant,
Verse: 5    da hat der bischof beide liute unde ouch ir lant -
Verse: 6    sie sint versigen,
Verse: 7    als ich iu sagen wil.

Verse: 8    Ez komt gar allez an den stift,
Verse: 9    daz machet gift;
Verse: 10    daz sie vergelten mügen [ ], daz machet die schrift.
Verse: 11    ein bischof, der enerbet nicht.
Verse: 12    swa sechse teilen suln, da ist ez unbericht:
Verse: 13    <sus> haben geschift
Verse: 14    der herren also vil.

Verse: 15    Der pfaffen banier sicht man uf den felden,
Verse: 16    sie wellen pris und ere nicht vergelten:
Verse: 17    [ ] bi dem künige selden
Verse: 18    sicht man sie dringen in den scham.
Verse: 19    her Adelarn,
Verse: 20    welt irz bewarn,
Verse: 21    daz were dem riche ein spil.

Strophe: 13_[b] 
Verse: 1    Her künig, ir habet zu lang gebeit,
Verse: 2    ez wirt iu leit.
Verse: 3    der [ ] pfaffen fuz ist worden also breit,
Verse: 4    sie han der leien marke gar.
Verse: 5    des werdet ir an iuwer volge wol gewar,
Verse: 6    swenn ^ez sich^ treit,
Verse: 7    daz ir sult liute han.

Verse: 8    Sie achten lützel, wes ir gert,
Verse: 9    hiure unde vert;
Verse: 10    sie dünket nu daz riche [ ] nichtes wert.
Verse: 11    man sach ie leienfürsten streben
Verse: 12    in stürmen und in striten bi dem riche neben
Verse: 13    und ouch ir swert
Verse: 14    beschirmen sunder wan.

Verse: 15    Her künig, ir sult die leienfürsten richen,
Verse: 16    in rechter not die pfaffen von iu wichen.
Verse: 17    waz mag [ ] heiden gelichen?
Verse: 18    swa man <den> helm uf binden sol
Verse: 19    durch eren zol,
Verse: 20    da sicht man wol,
Verse: 21    wer manheit wil bestan.

Strophe: 14_[c] 
Verse: 1    Ez si gelart oder ungelart,
Verse: 2    und swaz ie wart,
Verse: 3    zu dem sich hat der bischof [ ] e gekart,
Verse: 4    darzu die closter, clusen tür:
Verse: 5    haben die müneche und nunnen gelt, daz muz herfür.
Verse: 6    blate unde bart,
Verse: 7    die sint nu gar enwicht.

Verse: 8    Solt er davon nicht riche sin
Verse: 9    - daz ist wol schin -
Verse: 10    und lieben sich dem künige [ ] Constantin,
Verse: 11    der da zu Rome ein houbet was,
Verse: 12    der uns die pfafheit erste erhub, als ich ez las,
Verse: 13    bi triuwen min,
Verse: 14    daz were ein jamers schicht.

Verse: 15    Der pfaffen richtum breitet sich uf erden,
Verse: 16    die lant, <die> müzen in zu jungest werden
Verse: 17    von ir ungeberden,
Verse: 18    die sie nu triben um daz gut
Verse: 19    in gires glut.
Verse: 20    ich han des mut,
Verse: 21    ez tete manch leie nicht.

Strophe: 15 
Verse: 1    Swa blic an blicke vint sin art
Verse: 2    schone unbewart,
Verse: 3    zuhant der blic sich zu dem herzen schart;
Verse: 4    dem blicke jaget die liebe nach.
Verse: 5    die wile die dri sich vreuwen, so komt der minnen schach
Verse: 6    in twalmes vart,
Verse: 7    den drin wil sie an gesigen.

Verse: 8    Eines reinen wibes wunniclich munt,
Verse: 9    swem der tut kunt
Verse: 10    ein lechelichez suchen, kusses vunt,
Verse: 11    sich, wie zertlich daz gebert,
Verse: 12    wol unde wol im, swem daz honic ist beschert.
Verse: 13    herze ist enzunt,
Verse: 14    gelust ist ingestigen.

Verse: 15    Da klaget daz herze denne über sin selbes blicken,
Verse: 16    und klaget daz blicken uf der liebe stricken.
Verse: 17    lieb wil sich entzwicken
Verse: 18    und klaget uf minne. Amor, der voget,
Verse: 19    komt ingezoget.
Verse: 20    swa hin er broget,
Verse: 21    da muz ir kraft geligen.

Strophe: 16 
Verse: 1    Wip, selden hort, der wunnen spil,
Verse: 2    wip, vröuden zil,
Verse: 3    ein spiegel zarter süze, ich sprechen wil.
Verse: 4    wip, wurzel aller werdicheit,
Verse: 5    wip, aller güte ein fiol, der nie kraft vermeit,
Verse: 6    wip, tugende vil
Verse: 7    durch dich got hat gegeben.

Verse: 8    Wip, wereclicher ere ein dach,
Verse: 9    wip, triuwe ein bach,
Verse: 10    wip, senfticlicher höhe ein prisgemach,
Verse: 11    wip, mannes lip geselleschaft,
Verse: 12    wip, aller sune ein sigeriche magenkraft,
Verse: 13    wip, milte ein vach,
Verse: 14    nach dem die werden streben.

Verse: 15    Wip, minniclicher wunne ein trutlich garte,
Verse: 16    wip, aller edele ein überliuchtic warte,
Verse: 17    wip, din lop kein scharte
Verse: 18    hat nie verwunt, des wol dich, wip!
Verse: 19    wip, leitvertrip,
Verse: 20    hochgerter lip,
Verse: 21    trac, wip, wiplich din leben.

Strophe: 17 
Verse: 1    Man, vint in röte bleiche scham,
Verse: 2    - nicht [ ] züchten gram, -
Verse: 3    daz sie dir retet vrevel uf vrouwen stam.
Verse: 4    bedenke, waz daz sprichet ʽwip'!
Verse: 5    so hoffe ich, daz der vrevel mide dinen lip.
Verse: 6    ʽwip', süzer nam:
Verse: 7    wunne, irdisch paradis.

Verse: 8    Bedenke ouch, waz daz ʽvrouwe' si!
Verse: 9    ʽvro', 'we' [ ] da bi.
Verse: 10    ʽvro' heizet sie durch diner vreuden zwi,
Verse: 11    - al menschlich wünne von ir komt, -
Verse: 12    ʽwe' da von, daz natur an ir mit früchten fromt.
Verse: 13    swer ist nu vri
Verse: 14    der tugent an vrouwen pris,

Verse: 15    Der denke an blündez lachen roter munde,
Verse: 16    wie ^blickes stral^ uz spilnder ougen grunde
Verse: 17    stricken friunt zu friunde.
Verse: 18    man, wilt du prises und eren zol
Verse: 19    erfüllen vol,
Verse: 20    sprich vrouwen wol,
Verse: 21    lobe al ir formen ris.

Strophe: 18 
Verse: 1    Lop si dir, formelicher tag,
Verse: 2    lop dim bejag!
Verse: 3    lop si <dir>, saffic saf, lop wandels slag!
Verse: 4    lop si dir, elementen gurt,
Verse: 5    lop si dir, art, lop si dir, wehe, lop der geburt,
Verse: 6    lop, als ich mag
Verse: 7    bejagen uz sinnes grunt.

Verse: 8    Lop si dir, Adam, durch din bein,
Verse: 9    von dem erschein
Verse: 10    uns wibes bilde! lop la dir [ ] sin rein,
Verse: 11    lop immer lop, lob hoher sedel!
Verse: 12    ach, daz din lop nicht kan volloben menschlich schedel!
Verse: 13    lop, lop ich mein.
Verse: 14    ich lobe der eren vunt.

Verse: 15    Lop si dir, süzer schepher! sie ist die <...>
Verse: 16    <...>

Strophe: *19 
Verse: 1    Wip, anevanc, ein morgensegen
Verse: 2    vür golt gewegen,
Verse: 3    wip, hübescher vunt, din nam muz immer stegen,
Verse: 4    waz man an vrouwen ho gewiget,
Verse: 5    ez si in schimpf, in ernst, da mit man hie gesiget.
Verse: 6    wip, meienregen
Verse: 7    zukünftic süzer vrucht.

Verse: 8    Wip, schöne ein guldin leitestab,
Verse: 9    der seite urhab,
Verse: 10    sit daz got hohem namen nie gegab
Verse: 11    uf erden hie wan wibes nam
Verse: 12    und daz er ouch von einer reinen meide quam.
Verse: 13    wip, hoheste grab
Verse: 14    durchtrechtic aller zucht.

Verse: 15    Wip, vündic vunt des hosten prises phorte,
Verse: 16    wip, uf sat blünder tugent in allem orte,
Verse: 17    wip, din nam in worte
Verse: 18    behelt des hosten lobes kranz.
Verse: 19    wip, wurzel ganz,
Verse: 20    an allen schranz
Verse: 21    got nam zu dir die vlucht.

Strophe: *20 
Verse: 1    Wip, leitestern der hosten scham,
Verse: 2    wip, süzer nam,
Verse: 3    wip, von dir erst ouch alle wunne quam,
Verse: 4    wip, vürgedachtic zarter vunt,
Verse: 5    ein anbegin: die nie entsloz den ersten bunt,
Verse: 6    - nie edeler stam
Verse: 7    uz erden hie gesproz -

Verse: 8    Ein rippe got mit siner hant
Verse: 9    hat so gewant
Verse: 10    zu dir, da von din nam ist hochbekant.
Verse: 11    ei, waz din nam al süze treit,
Verse: 12    da von die werden man mit dienest sin bereit,
Verse: 13    wip, hochgemant
Verse: 14    uz siner siten vloz!

Verse: 15    Wip, fioliner wurzegart, ein stengel,
Verse: 16    wip, ougen blick zu schouwen mannes engel.
Verse: 17    wip, der ere ein sprengel,
Verse: 18    alsam die meiste menige uns seit.
Verse: 19    wip, eren kleit,
Verse: 20    din wirde ist breit,
Verse: 21    wip, engeles genoz.

Strophe: *21 
Verse: 1    Wip, werenlicher wunne ein hort,
Verse: 2    wip, süzez wort,
Verse: 3    da mit man sich vür truren widerhort:
Verse: 4    swelch man sich vlizet an reine wip,
Verse: 5    dem ist getiuret herze, mut, sin unde lip,
Verse: 6    sins lebens ort
Verse: 7    nie vröude widersaz.

Verse: 8    Ir stolzen, wolgemuten man,
Verse: 9    halt eren ban
Verse: 10    durch reine wip, sit sie iu bi gestan.
Verse: 11    ir sin ane angel in bernder not
Verse: 12    gedenket, swenn ir <...> sult küssen ir munt so rot.
Verse: 13    der selden van
Verse: 14    sint wip, ane allen haz

Verse: 15    Lustlicher art vür truren hie zu schouwen:
Verse: 16    ie süzic, senftec, lieblich blic in ouwen,
Verse: 17    daz sint reine vrouwen,
Verse: 18    der lob man immer singen muz
Verse: 19    vür wandels buz,
Verse: 20    ir süzen gruz
Verse: 21    man ie zum hosten maz.

Strophe: *22 
Verse: 1    Des menschen geistes edelkeit
Verse: 2    vil adels heit
Verse: 3    ob alle dem, daz got sin wirde ersneit
Verse: 4    mit sines vürgedanken kraft,
Verse: 5    da von des menschen gernde ger ist sigehaft.
Verse: 6    die girde treit
Verse: 7    in gotes wesen e wesen.

Verse: 8    Die gir nicht e geruwen mac:
Verse: 9    wie eben ez wac
Verse: 10    ein ieglich dinc, mit voller rede ie lac,
Verse: 11    daz wold in sinen ursprinc wider;
Verse: 12    ob allez adel trat ie des menschen ursprinc sider.
Verse: 13    vernunst sin tac
Verse: 14    kan nicht die rede vollesen.

Verse: 15    Sit got uns gap zu einem rechten erbe
Verse: 16    ein vrie willekür, uns nicht verderbe,
Verse: 17    so dr<.> nicht ersterbe
Verse: 18    die schult. uns kiuset, der in ie kos,
Verse: 19    do selde uns noz:
Verse: 20    do würde wir los
Verse: 21    von jamer und genesen.

Strophe: 23 
Verse: 1    Ein höner gernder wirdikeit,
Verse: 2    dir si geseit:
Verse: 3    mut & in begirde [ ] uf alter & nie gereit,
Verse: 4    den vogel jaget durch den luft
Verse: 5    kein visch, nie in beger besaz des wages gruft
Verse: 6    tierlach gemeit.
Verse: 7    <sus> ieslich art begert.

Verse: 8    <...>

Verse: 9    Materje gert der formen mit der mische
Verse: 10    und ouch darzu des höchsten zirkels frische.
Verse: 11    [ ] falscher höner, wische
Verse: 12    hin, dar zu & <den, die> ungernde sint &,
Verse: 13    der helle kint,
Verse: 14    an selden blint.
Verse: 15    ir edeln, des entbert!

Strophe: 24 
Verse: 1    Swa man zu hönen kunst hat wert,
Verse: 2    und narre gert
Verse: 3    für rechte kunst, ez si ein hunt oder [ ] pfert,
Verse: 4    waz sol der sunnen glastes me;
Verse: 5    waz sol dem himels zirkel snelles loufes e;
Verse: 6    waz sol ein swert,
Verse: 7    den fluchtig tut ein rouch;

Verse: 8    Waz sol ein krone uf ein kaptil,
Verse: 9    uf haz ein spil;
Verse: 10    waz sol der erge jesen, [ ] der maze ein zil;
Verse: 11    waz sol der armen werlt ein zemen;
Verse: 12    waz sol dem wibel & <ein> lasurvaz, [ ] der schin & ein lemen,
Verse: 13    der muggen swil;
Verse: 14    waz sol dem balsem louch;

Verse: 15    Waz sol dem blinden speher varbe diezen;
Verse: 16    waz sol dem affen wiser künste fliezen;
Verse: 17    waz sol Sathanus niezen;
Verse: 18    waz sol dem esel tollentranc;
Verse: 19    waz sol dem sanc
Verse: 20    und seiten clanc,
Verse: 21    der lieber hort den gouch?

Strophe: *25 
Verse: 1    Nu merke, tunkel biderman,
Verse: 2    wiltuz verstan:
Verse: 3    din erenhenne kret, so krotzelt din han.
Verse: 4    mou, katze! esel, ruhestu icht?
Verse: 5    snürrinc, din snerren bi den granen ist enwicht.
Verse: 6    man huge in an!
Verse: 7    nu secht, swer oren hat.

Verse: 8    Din schame in schanden vlinset sich.
Verse: 9    sage unde sprich,
Verse: 10    wer sneit din ödez kleit? du tummest dich.
Verse: 11    din ochsenhorn, daz bückezet, vliuch!
Verse: 12    du gienge e menschlich, als ein vihe <du> nu kriuch.
Verse: 13    din gelf uf mich
Verse: 14    trit in din selbes phat.

Verse: 15    Varch unde swin, unswinlich ist din kerren.
Verse: 16    din affensin kan rüdelichen zerren.
Verse: 17    hut, la dich bescherren.
Verse: 18    du hast getrunken narren win.
Verse: 19    hochvart, nu grin!
Verse: 20    gief, kaf si din:
Verse: 21    sus drischet sich din sat.

Strophe: 26 
Verse: 1    Gefiolierte blüte kunst,
Verse: 2    dins brunnen dunst
Verse: 3    und din geröset flammenriche brunst,
Verse: 4    die hete wurzelhaftez obez
Verse: 5    gewidemet: in dem boume künste riches lobes
Verse: 6    hielt [ ] wipfels gunst
Verse: 7    sin list, durchliljet kurc.

Verse: 8    Durchsternet was sins sinnes himel,
Verse: 9    glanz, als ein vimel
Verse: 10    durchkernet. luter golt nach wunsches stimel
Verse: 11    was al sin blut, geveimt uf lob,
Verse: 12    gevult [ ] <mit> margariten nicht zu kleine und grob;
Verse: 13    sins silbers schimel
Verse: 14    gab gimmen velsen schurc.

Verse: 15    Ach, kunst ist tot! nu klage [ ], armonie,
Verse: 16    planeten tirmen klage, nicht verzie
Verse: 17    polus jamers drie.
Verse: 18    genade im, süze trinitat,
Verse: 19    maget reine, entfat,
Verse: 20    ich meine Conrat,
Verse: 21    den helt von Wirzeburc.



Next part


This text is part of the TITUS edition of Heinrich von Meissen, Frauenlob.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.