TITUS
Heinrich von Meissen, Frauenlob
Part No. 10
Previous part

Text: 9 
IX. Würgendrüssel


Strophe: *1_[A] 
Verse: 1    Des himels erzenie
Verse: 2    du bist, [ ] <die> wandels vrie,
Verse: 3    din vrüchtic vreude senden siechen heilen kan,
Verse: 4    ich meine dich, hochgelobte balsamie,
Verse: 5    du gotes muter, tochter, brut,
Verse: 6       du apoteca rich,

Verse: 7    Mit aromat gezieret,
Verse: 8    din schöne ist übervieret,
Verse: 9    swer dich mit inneclichem herzen rufet an,
Verse: 10    wan dir der nardus durch den flor gesmieret,
Verse: 11    du sunnen schin, du sternes glast
Verse: 12       schön, überliuchticlich.

Verse: 13    Die kefse din beslozzen hete
Verse: 14       die ewigen gotheit,
Verse: 15    zwen unde sibenzic namen hoch,
Verse: 16       die got und ouch sin wesen treit.
Verse: 17    der dir selbdritte und doch alein
Verse: 18       zu dienste was bereit
Verse: 19    und du sin undertenig maget,
Verse: 20       des vater erbe ist din,
Verse: 21    daz erbe an uns, hilf, gotes trut,
Verse: 22       daz wir din erben sin.

Strophe: *2_[B] 
Verse: 1    Rich übervlüzzic güte
Verse: 2    bist du in voller vlüte,
Verse: 3    die meret sich gar willeclich von tage zu tage.
Verse: 4    nu sende uns, vrouwe, ein cristenlich gemüte
Verse: 5    durch den, dem zu gebote stet,
Verse: 6       swaz kriuchet, & wechelt, wimet &,

Verse: 7    Und bit vür uns den süzen,
Verse: 8    daz wir im dienen müzen,
Verse: 9    daz er uns bringe uz der verworren sünden hage.
Verse: 10    ja kan er wol uns cristen kummer büzen.
Verse: 11    er mac, er wil, er tar, er sol,
Verse: 12       er tut, lat, wiez im zimet.

Verse: 13    Ja bistu so gewaldic sin,
Verse: 14       daz er uns wol bewart
Verse: 15    vor houbetsünden und uns dort
Verse: 16       vor engestlichen nöten spart
Verse: 17    und wiset uns an den rechten wec
Verse: 18       hin zu der himelvart.
Verse: 19    den hilf uns, reine vrouwe, treten,
Verse: 20       e uns der sünden wint
Verse: 21    den sne werfe in den rechten stic.
Verse: 22       so blibe wir gotes kint.

Strophe: *3_[C] 
Verse: 1    Du vrone in eren vrüchte
Verse: 2    und vrouwe über alle züchte,
Verse: 3    hilf uns, daz wir naturen müzen widerstreben,
Verse: 4    die uns kan binden in der sünden süchte,
Verse: 5    daz wir icht vallen in daz we,
Verse: 6       das nimmerme zergat.

Verse: 7    Maria, muter here,
Verse: 8    nu sende uns dine lere,
Verse: 9    daz wir beschouwen dort din ewiclichez leben.
Verse: 10    ja hast du von uns hohen pris und ere,
Verse: 11    & enweren wir, du werst worden nie &,
Verse: 12       din heil gar an uns stat.

Verse: 13    Sit daz wir dich gehöhet han,
Verse: 14       so höhe, vrouwe, ouch uns,
Verse: 15    und laz uns des engelden nicht,
Verse: 16       daz wir ligen in der sünden runs,
Verse: 17    und hilf uns, muter, reine meit,
Verse: 18       die hulde dines suns
Verse: 19    erwerben, e denn daz der tot
Verse: 20       den ort gebe manicvalt,
Verse: 21    und bit vür uns den höchsten voget,
Verse: 22       sit du sin hast gewalt.

Strophe: 4_[a] 
Verse: 1    Sibilla sprach e: richet
Verse: 2    die wirde, <die> hin wichet,
Verse: 3    ie eiter und ie erger wirt der werlte leben.
Verse: 4    ir hohez lob von tage zu tage blichet.
Verse: 5    die edeln sint entslafen hie
Verse: 6       und ouch an eren zagen.

Verse: 7    Ir fürsten, ir sult wachen,
Verse: 8    die liute frolich machen,
Verse: 9    mit den ir sult uf erden hie nach eren streben.
Verse: 10    ez komt iu heim an ritterlichen sachen:
Verse: 11    die herren mit der ritterschaft
Verse: 12       vil selten pris bejagen.

Verse: 13    Künig Artus mit ritterschaft
Verse: 14       vil hohen pris erwarb;
Verse: 15    swie daz er doch erstorben si,
Verse: 16       sin reinez lob doch nie verdarb
Verse: 17    künig Alexander, der ouch hie
Verse: 18       in hohen wirden starb.
Verse: 19    die fürsten nemen snöden schaz
Verse: 20       für ritterliche tat,
Verse: 21    der ritterschaft mit swachem saz
Verse: 22       so gar verdrungen hat.

Strophe: 5_[b] 
Verse: 1    Ach, wie tun nu die jungen!
Verse: 2    der schaz hat gar verdrungen
Verse: 3    der werlte pris und ouch ir ritterlichez leben,
Verse: 4    als uns gesaget han die wisen zungen.
Verse: 5    ir fürsten, herren, dienestman,
Verse: 6       ir ritter, eren wert,

Verse: 7    Ir sult iuch vor besinnen,
Verse: 8    den rechten schaz sult minnen
Verse: 9    und ouch da bi nach ritterlichen eren streben:
Verse: 10    swer an <dem> mut wil ritterschaft gewinnen,
Verse: 11    der ritterlichen orden treit
Verse: 12       alhie uf diser erd.

Verse: 13    Hie vor sach man die wirde noch,
Verse: 14       dar ieslich [ ] gunde streben.
Verse: 15    nu hat die werlt ir wirde hin
Verse: 16       & und ouch um & snöden schaz gegeben.
Verse: 17    wafen, daz sust verdrungen hat
Verse: 18       schaz ritterlichez leben:
Verse: 19    nach tode hast du kein zuversicht,
Verse: 20       niur einen kranken hort;
Verse: 21    im volget ouch von hinnen nicht
Verse: 22       wan sin verdientez wort.

Strophe: 6_[c] 
Verse: 1    Ir herren, ritter, knechte,
Verse: 2    tut nach dem alten rechte
Verse: 3    durch got und durch iurn werden ritterlichen pris,
Verse: 4    alsam hie vor tet <ie> daz iur geslechte.
Verse: 5    ob ir an mut welt nemen abe,
Verse: 6       so denket an reine wib:

Verse: 7    Ir blic kan mut entzünden,
Verse: 8    zu swem sie sich gefriunden,
Verse: 9    dem blüet immer wunniglicher eren ris.
Verse: 10    ir senfter gruz kan mannes herze durchgründen,
Verse: 11    daz ir in ritterlicher tat
Verse: 12       traget einen stolzen lip.

Verse: 13    Swen übet reiner frouwen gruz,
Verse: 14       des manheit git wol mut:
Verse: 15    ez komt von reiner frouwen gunst,
Verse: 16       so da ein man menlichen tut;
Verse: 17    ir minniglicher aneblic
Verse: 18       tut mannes herze frut.
Verse: 19    ob ir nu wellet mit vernunst
Verse: 20       an mute gar verzagen,
Verse: 21    erwerbet reiner frouwen gunst,
Verse: 22       so müget ir pris erjagen.

Strophe: *7 
Verse: 1    Der spehe die spehe kennet:
Verse: 2    swa man den kalc nu brennet,
Verse: 3    da lit er trucken drizig jar und ist doch kalt,
Verse: 4    und wirt er naz, sin art zuhant sich trennet
Verse: 5    und meldet fiur, daz er ^an sich
Verse: 6       so lange hat^ geliten,

Verse: 7    Daz nimmer würde funden
Verse: 8    an im zu keinen stunden,
Verse: 9    [ ] <ob> in die fiuchte lieze trucken, unverstalt.
Verse: 10    in trunkenheit wirt manig sache enbunden:
Verse: 11    wurden die liute trunken nicht,
Verse: 12       ez würde gar vermiten.

Verse: 13    Die wile trucken ist der kalc,
Verse: 14       sin <viur>, daz <ist> verspart,
Verse: 15    und wirt er naz, gar manigvalt
Verse: 16       vor hitze er brinnet uf der vart.
Verse: 17    so ist der kalc und trunkenheit
Verse: 18       vil wol von einer art.
Verse: 19    swaz tougen dinge ein mensche hat
Verse: 20       an sich verborgen gar,
Verse: 21    in trunkenheit swer fregen gat,
Verse: 22       ez wirt im offenbar.

Strophe: 8 
Verse: 1    Man prüfet bi der krone
Verse: 2    richtum und adel frone:
Verse: 3    richtum sol haben alzit niur ein milten mut,
Verse: 4    so sol ein künig geben riche löne.
Verse: 5    sie sint wol hohes lobes wert,
Verse: 6       mit maneger richen gunst

Verse: 7    Der zepter wil gewalten,
Verse: 8    recht und unrecht zerspalten.
Verse: 9    solch leite sol leiten recht, und swa man daz nicht tut,
Verse: 10    kein zwifel sol die rede nicht beschalten
Verse: 11    bescheidenheit, die wirken kan
Verse: 12       ein lob uz voller kunst.

Verse: 13    ^Öl, daz^ man künigen strichet an,
Verse: 14       daz ist von solcher art:
Verse: 15    ez breitet sich und wil ouch sin
Verse: 16       zu solcher maze, swar manz [ ] schart.
Verse: 17    sust solte ein künig gein gote
Verse: 18       ouch sin gar <wol> bewart
Verse: 19    mit triuwen und mit reinem mut
Verse: 20       und ouch mit edeler tat,
Verse: 21    und ander fürsten also gut:
Verse: 22       daz öl in fiuchte stat.

Strophe: 9 
Verse: 1    Ir fürsten, welt ir horden
Verse: 2    den fürstenlichen orden,
Verse: 3    so haltet [ ] lieb, von dem ir habet hie werde tat:
Verse: 4    wirt iu sin gunst, so sit ir selig worden.
Verse: 5    für allen schaz, für allez golt
Verse: 6       man in hie tiuren sol.

Verse: 7    Ir fürsten, nu sit grüzig,
Verse: 8    den fromen kummerbüzig,
Verse: 9    und saget dem danc, der richez lob erworben hat,
Verse: 10    so wirt sin pris zu allen ziten süzig,
Verse: 11    und secht, so höhet sich sin mut
Verse: 12       und zimt den herren wol.

Verse: 13    Sol man den fromen nicht richer tat
Verse: 14       nach riliche sagen danc,
Verse: 15    so muz <es> verdriezen sinen mut,
Verse: 16       der e nach stolzem prise ranc.
Verse: 17    swa man den bösen stiuren tut,
Verse: 18       dem nie kein wirde erclanc,
Verse: 19    <me> wan ein der mit reiner tat
Verse: 20       hat lobes vil erstriten,
Verse: 21    da wen ich, daz der fürsten rat
Verse: 22       an witzen si versniten.

Strophe: 10 
Verse: 1    Swelch her in miltem mute
Verse: 2    mit troste und ouch mit gute
Verse: 3    sin liute gerne sicht, swenn er nicht krieges pfliget,
Verse: 4    der leit den vinden triuweliche afterhute:
Verse: 5    ein herre ^solte gerne sehen^
Verse: 6       sin liute zu aller zit.

Verse: 7    Swa man zu hofe sich dringet,
Verse: 8    da wirde und ere ringet,
Verse: 9    da hat der wise mut dem argen <an> gesiget.
Verse: 10    swelch herre sich von sinen liuten twinget
Verse: 11    in senfter zit [ ], dem herren wirt
Verse: 12       gewünschet manig strit.

Verse: 13    Man streichet eine katzen schon,
Verse: 14       um daz sie miuse jaget.
Verse: 15    man komet einen tummen hanen,
Verse: 16       um daz er kündet, wanne ez taget.
Verse: 17    so man die helde lobet nicht,
Verse: 18       von den ein velt erwaget,
Verse: 19    da man dem ernest lachen sol,
Verse: 20       ir herren, secht iuch für:
Verse: 21    verdienter dienst gesiget wol,
Verse: 22       [ ] <der> twanc ein velt verlür.

Strophe: 11_[a] 
Verse: 1    Man sicht die Maze struchen,
Verse: 2    ir bein, <die> han die muchen.
Verse: 3    die höchsten, die <zer> werlte solten rechtes pflegen,
Verse: 4    die lazen sie in krankem wesen kuchen.
Verse: 5    recht sam der struz daz isen tut,
Verse: 6       so slinden sie daz meil.

Verse: 7    Schaz setzet und entsetzet;
Verse: 8    die miete, die hat geletzet
Verse: 9    der cristenheit ir e und <ouch> ir werden segen.
Verse: 10    der pfaffen ban swert für die stole wetzet:
Verse: 11    haz unde nit, git ist ir wunsch;
Verse: 12       falsch git den besten teil.

Verse: 13    Künig Constantinus hat nicht wol
Verse: 14       also daran gefarn,
Verse: 15    daz nu der pfaffen wisen sol
Verse: 16       dem riche sinen stul bewarn.
Verse: 17    bi zweinzig hüten sicht man sich
Verse: 18       wol drizig blaten scham.
Verse: 19    her künig, nu secht den ritter vrut,
Verse: 20       - daz spil ist gar verlorn,
Verse: 21    & daz alter macht den fromen mut & -,
Verse: 22       erwecket swinden zorn!

Strophe: 12_[b] 
Verse: 1    Wie nu, wie nu, ir pfaffen,
Verse: 2    wie sint die recht geschaffen?
Verse: 3    [ ] künig Karl dem riche und ouch dem stule hat gegeben
Verse: 4    die swert. & ir beider kallen muz ich claffen &.
Verse: 5    ist Peters allez daz da ist,
Verse: 6       Johannes, wa ist din swert?

Verse: 7    Ich wene, du sist entnücket.
Verse: 8    din swert ist dir entzücket,
Verse: 9    die stole und ouch der ban ho ob dem swerte sweben.
Verse: 10    blate, schicke <dich>, daz schilt und sper [ ] dich drücket!
Verse: 11    Johannes, got erwecke dich,
Verse: 12       dins leides Peter gert.

Verse: 13    Sin ist daz riche und der stab,
Verse: 14       der frevel und gewalt,
Verse: 15    er setzet uf, er setzet abe,
Verse: 16       solch wille ist siner macht gezalt.
Verse: 17    din fürstentum, din ritterschaft,
Verse: 18       die beide sint verschalt.
Verse: 19    Johannes, hege din altez recht,
Verse: 20       als ez gestanden habe.
Verse: 21    nimst du din swert ^enzit nicht^ wider,
Verse: 22       man jaget dich mit dem stabe.

Strophe: 13_[c] 
Verse: 1    Wie lange wilt du slafen?
Verse: 2    sta uf, nu schriet wafen
Verse: 3    Cecilienlant. Calaber, & Egipten, Kriechen clagen.
Verse: 4    des stules wolf tut we des riches schafen,
Verse: 5    & Britange beitet diner kunft.
Verse: 6       wol uf, ez rufet dir.

Verse: 7    Ziuch nu daz swert, Johannes,
Verse: 8    und twing den wolf des bannes,
Verse: 9    wil er des riches schaf nu von ir weide jagen.
Verse: 10    der [ ] <tron> ist unbewart, er hat nicht mannes,
Verse: 11    der wolf tut alzu grozen schaden,
Verse: 12       sin giel ist arger gir.

Verse: 13    Des wolfes biz wirt selten heil.
Verse: 14       man muz den arzet holn
Verse: 15    zu Rome und muz in koufen ho,
Verse: 16       ez glüen [ ] der simonien koln.
Verse: 17    der kirchen sang, & daz tiuret & nu,
Verse: 18       die miete hat verstoln
Verse: 19    ir ordenlichez cresemkleit,
Verse: 20       sie sprenzet ir gewant,
Verse: 21    wa sie nu wont: ane unterscheit
Verse: 22       so ist sie uz gesant.

Strophe: 14_[D] 
Verse: 1    Freut iuch, frou Simonie,
Verse: 2    zu Rome ist cunterfie:
Verse: 3    der stul und ouch der ban iuch hat zu wibe erkorn,
Verse: 4    der ^swester, stole^, wil ouch in storie.
Verse: 5    daz nu der blaten hohez adel
Verse: 6       sich selbe nidert so!

Verse: 7    Wer sol ez hohen danne?
Verse: 8    & ich tun nicht uz dem banne,
Verse: 9    daz er [ ] nider hat gewibet und ist doch hochgeborn.
Verse: 10    von im der werde fliuhet &. ich wene, er spanne
Verse: 11    den bogen, daz die cristenheit
Verse: 12       muz immer sin unfro.

Verse: 13    Haz unde nit und gitikeit
Verse: 14       vil swache kinder sint
Verse: 15    & und die die werlt gemeinlich treit &.
Verse: 16       daz sint der Simonien kint.
Verse: 17    des muz des guten Peters liecht
Verse: 18       zu Rome werden blint
Verse: 19    und ouch sin schif gan wiselos
Verse: 20       uf valscher miete se,
Verse: 21    daz e mit & heiliglichem floz
Verse: 22       al uf der & cristen e.

Strophe: 15_[E] 
Verse: 1    Ez gat mit sweren unden,
Verse: 2    ir anker niendert gründen,
Verse: 3    die segel [ ] sind in den topf geflochten & wol mit rat
Verse: 4    dem schiff &. do sante Peter ane sünden
Verse: 5    al uf der cristen wage [ ] floz,
Verse: 6       waz schöner visch er vieng!

Verse: 7    Wie nu, her himelpfetter,
Verse: 8    sit ir des rechtes veter?
Verse: 9    die gitikeit ist marner, & ouch daz schiffel hat &
Verse: 10    haz unde nit, die weren gerne seter.
Verse: 11    daz schif gat under, enwelt ir wern.
Verse: 12       got sprach, do erz begieng,

Verse: 13    Er wolde siner kirchen grunt
Verse: 14       uf iuwer ere legen.
Verse: 15    er gab zu binden iu [ ] <gewalt>
Verse: 16       und uf zu binden. welt ir hegen
Verse: 17    recht und gerichte, went daz schif,
Verse: 18       von grozen unden slegen
Verse: 19    versinken mag ez. des marners lust
Verse: 20       nach falscher miete strebet;
Verse: 21    [ ] im ist darum nieman nicht holt,
Verse: 22       der in dem schiffe swebet.

Strophe: 16_[f] 
Verse: 1    Driu recht, die horte ich kriegen.
Verse: 2    Nature jach: ʽane triegen
Verse: 3    min recht ist ein gelichez, swenn die andern schiln,
Verse: 4    ane unterscheit. min recht darf sich nicht biegen,
Verse: 5    min recht noch unverschranzet ist
Verse: 6       gein gotes gunste [ ] her.'

Verse: 7    Do jach der Geistlich Orden:
Verse: 8    ʽmin recht ist sterker worden
Verse: 9    und höhet sich von tage zu tage mit vrevelen spiln.
Verse: 10    Nature, swig, ja kan ich wunder horden:
Verse: 11    ich höhe, ich nider, swaz ich wil.
Verse: 12       ich roube, ich slahe noch mer.'

Verse: 13    ʽNature', sprach frou Werlte schon,
Verse: 14       ʽich höre, waz ir saget.
Verse: 15    ich wil ^ez immer clagen got^,
Verse: 16       daz ir min recht alhie verjaget.
Verse: 17    min recht stet an der fürsten hant,
Verse: 18       der herzen [ ] sint verzaget.
Verse: 19    die juden, heiden, Sarrazin,
Verse: 20       ir keiner brichet sin recht,
Verse: 21    an daz den touf enpfangen hat:
Verse: 22       des heret sich der knecht.'

Strophe: 17_[g] 
Verse: 1    Bi numerdume namen!
Verse: 2    wer hat des mordes samen
Verse: 3    so giudiglich geworfen in der fürsten rat,
Verse: 4    [ ] die sich <nu> wider daz riche valsches ramen?
Verse: 5    secht uf, secht uf, ein stolzer künig!
Verse: 6       ir prüfet andern schal,

Verse: 7    Erleschet <ir> noch die brende
Verse: 8    mit milte gebender hende.
Verse: 9    nu sumet nicht, - ir swert vil scharfe snide hat, -
Verse: 10    & wart iu erkennet wider des mordes vende
Verse: 11    scharoch: swie vil erzuct <er> hat &,
Verse: 12       sin zuc der meister hal.

Verse: 13    Man wendet manige sache wol,
Verse: 14       e sie bekomet an,
Verse: 15    & daz niemen kunde des fluges erhol &,
Verse: 16       ob sie kerne uf ein ander ban.
Verse: 17    von cleinem vadem wirket man
Verse: 18       ein snur, swer dringen kan,
Verse: 19    und uz der snur ein vestez seil.
Verse: 20       min rede ist: ʽnu swig,
Verse: 21    nu laz den vadem ane meil,
Verse: 22       du stolzer [ ] Ludewig.'

Strophe: 18_[h] 
Verse: 1    Crist, wes sol ich gelouben?
Verse: 2    man sicht sie brennen, rouben,
Verse: 3    die billich solten biten für die cristenheit.
Verse: 4    ez wart der stab enpfolhen den vil touben.
Verse: 5    nu setzen sie den stab hin dan
Verse: 6       und füren scharfe swert.

Verse: 7    Welch rat sol des [ ] gewerden?
Verse: 8    ʽwe, [ ] we si den uf erden!'
Verse: 9    sust rief der engel dristund, als Johannes seit.
Verse: 10    der vluch ist hie, daz spürt man an geberden:
Verse: 11    den wir von gote enpfolhen sint,
Verse: 12       ir mut niur frevels gert.

Verse: 13    Ein künig, der solte han ein swert,
Verse: 14       so müsten sie den stab
Verse: 15    vürn als ir vordern han getan.
Verse: 16       daz were ein fridelich urhab.
Verse: 17    [ ] nu füren sie daz swert, & <daz da>
Verse: 18       mangen wirfet^ in & sin grab.
Verse: 19    daz ist geremet frefelich
Verse: 20       dem riche uf den fuz.
Verse: 21    sie setzen niur künige uf, künige abe [ ],
Verse: 22       daz ist ein smeher gruz.

Strophe: 19_[i] 
Verse: 1    Sie schaffen unde schaffen,
Verse: 2    ja meine ich <niur> die pfaffen,
Verse: 3    die got zu dienste im selber hat hie uzerwelt:
Verse: 4    uf die sol nieman <nicht> unnützes claffen,
Verse: 5    er schendet sich in aller wis.
Verse: 6       ich singe uf den gewalt

Verse: 7    Der pfaffen von dem stule,
Verse: 8    den worden ist zeim pfule
Verse: 9    der clar urspring, den Peter gab in unverselt.
Verse: 10    sie fürchten, daz ir heizen & gebe icht kule &
Verse: 11    und lazen Simonie ir koln
Verse: 12       erhitzen manigvalt.

Verse: 13    Swenn dort die flamme entzündet ist,
Verse: 14       mit frevelichem jagen
Verse: 15    legaten & sint zu aller frist &,
Verse: 16       die kunnen wol ir fülle tragen
Verse: 17    und schatzen armer pfafheit abe
Verse: 18       <ir> nar, die valschen zagen.
Verse: 19    sie schatzen Simonie rich,
Verse: 20       daz komt in allez heim:
Verse: 21    sie vinden gallen sicherlich
Verse: 22       dort für den honigseim.

Strophe: *20_[A] 
Verse: 1    Ein junger man, gedenke,
Verse: 2    wie dich daz alter krenke!
Verse: 3    kein künig, kein fürste, kein herre, der wart nie so rich,
Verse: 4    daz er dem tode ein stunde möchte entwenken.
Verse: 5    burg unde lant, golt, silber, schaz
Verse: 6       mag in gehelfen nicht.

Verse: 7    Die jugent dich betriuget,
Verse: 8    behendikeit die liuget.
Verse: 9    er ist von clugen geistes <art>, daz dünket mich [ ],
Verse: 10    der sich bi zit gein sinem schepfer biuget.
Verse: 11    tut er des nicht, ez wirt im leit,
Verse: 12       ob im ein slag geschicht.

Verse: 13    Daz mensche wirt in driu geteilt,
Verse: 14       swenn ez von hinnen vert:
Verse: 15    die sele [ ] zu dem himelrich,
Verse: 16       ob in der lichnam habe beschert;
Verse: 17    daz fleisch den würmen endelich,
Verse: 18       daz han sie schier verzert;
Verse: 19    daz gut den erben. so sin leben
Verse: 20       naturliche <ist> volbracht,
Verse: 21    vert er zur helle, vor gote so ^wirt
Verse: 22       sin^ nimmerme gedacht.

Strophe: *21_[B] 
Verse: 1    Nu höre an, mensche, cristen,
Verse: 2    wilt du die sele fristen,
Verse: 3    die ewiglichen leben muz an endes zil,
Verse: 4    so hüte dich vor sundiglichen listen!
Verse: 5    gedenke an die wort, die got
Verse: 6       uf erden [ ] gesprochen hat.

Verse: 7    ʽIch urteile, als ich vinde',
Verse: 8    sprach er zu sim gesinde,
Verse: 9    mit sant Johannes ich ez wol beziugen wil.
Verse: 10    gib wider, laz ez nicht zu dinem kinde,
Verse: 11    ob du wilt komen zu der freude,
Verse: 12       die nimmerme zergat.

Verse: 13    Der ^zungen zwo und sibenzig^ sint,
Verse: 14       die sechzig sint verlorn;
Verse: 15    der zwelfe vert ein teil mit in [ ],
Verse: 16       die hie verschulten gotes zorn.
Verse: 17    swer aber heldet gotes bot,
Verse: 18       des nam ist uzerkorn.
Verse: 19    swer ie von gote komen si,
Verse: 20       der sinne wider dar.
Verse: 21    Deus, Sabaoth, Messias, hilf
Verse: 22       uns an der engel schar.

Strophe: *22_[C] 
Verse: 1    Swer sündet uf die riuwe,
Verse: 2    der ist der sele untriuwe;
Verse: 3    wirt im in kurzer stunt ein sneller tod gezalt,
Verse: 4    so hüte er sich, daz er die helle icht buwe.
Verse: 5    & verdachte sünde drivaltic sint,
Verse: 6       höre ich die wisen sagen.

Verse: 7    Laz dich in tugent brisen,
Verse: 8    wilt du von gote nicht risen,
Verse: 9    [ ] du sterbest [ ] junc ^oder joch^ sollest werden alt.
Verse: 10    nach guter lere streben ie die wisen;
Verse: 11    swer ordenlich uf erden lebet,
Verse: 12       dem mag dort wol behagen.

Verse: 13    Swelch herre, der hat ^knechte vil^
Verse: 14       dient einer im williclich,
Verse: 15    er ist im liep nach dienestrecht.
Verse: 16       daran gedenke, mensche, und sich,
Verse: 17    wiltu dich dem nicht lieben <hie>,
Verse: 18       der hat gemachet dich,
Verse: 19    und wilt dich im enpfremden <gar>,
Verse: 20       der dir gehelfen mag
Verse: 21    dort in des himelriches zesem,
Verse: 22       dast tusent jar ein tag.



Next part


This text is part of the TITUS edition of Heinrich von Meissen, Frauenlob.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.