TITUS
Hartmann, Iwein
Part No. 6
Previous part

Verse group: (6) 
Verse: 501    sine erkennent man noch sîn gebot.
Verse: 502    ichn wânde niht daz âne got

Verse: 503    der gewalt iemen töhte
Verse: 504    der sî betwingen möhte

Verse: 505    âne sloz und âne bant.'
Verse: 506    er sprach 'mîn zunge und mîn hant,

Verse: 507    mîn bete unde mîn drô,
Verse: 508    die hânt mirs gemachet sô

Verse: 509    daz sî bibende vor mir stânt
Verse: 510    und durch mich tuont unde lânt.

Verse: 511    swer ouch anders under in
Verse: 512    solde sîn als ich bin,

Verse: 513    der wære schiere verlorn.'
Verse: 514    'herre, vürhtents dînen zorn,

Verse: 515    so gebiut in vride her ze mir.'
Verse: 516    er sprach 'nienc vürhte dir:

Verse: 517    sine tuont dir bi mir dehein leit.
Verse: 518    nu han ich dir vil gar geseit

Verse: 519    swes dû geruochtest vrâgen:
Verse: 520    nune sol dich niht betrâgen,

Verse: 521    dune sagest mir waz dû suochest.
Verse: 522    Ob du iht von mir geruochest,

Verse: 523    daz ist allez getân.'
Verse: 524    ich sprach 'ich wil dich wizzen lân,

Verse: 525    ich suoche âventiure.'
Verse: 526    dô sprach der ungehiure

Verse: 527    'âventiure? waz ist daz?'
Verse: 528    'daz wil ich dir bescheiden baz.

Verse: 529    nû sich wie ich gewâfent bin:
Verse: 530    ich heize ein riter und hân den sin

Verse: 531    daz ich suochende rîte
Verse: 532    einen man der mit mir strîte,

Verse: 533    der gewâfent sî als ich.
Verse: 534    daz prîset in, und sleht er mich:

Verse: 535    gesige aber ich im an,
Verse: 536    sô hât man mich vur einen man,

Verse: 537    und wirde werder danne ich sî.
Verse: 538    sî dir nû nâhen ode bî

Verse: 539    kunt umb selhe wâge iht,
Verse: 540    des verswic mich niht,

Verse: 541    unde wîse mich dar,
Verse: 542    wand ich nâch anders nihte envar.'

Verse: 543    Alsus antwurt er mir dô
Verse: 544    'sît dîn gemüete stât alsô

Verse: 545    daz dû nâch ungemache strebest
Verse: 546    und niht gerne sanfte lebest,

Verse: 547    ichn gehôrte bî minen tagen
Verse: 548    selhes nie niht gesagen

Verse: 549    waz âventiure wære:
Verse: 550    doch sag ich dir ein mære,

Verse: 551    wil dû den lîp wâgen,
Verse: 552    sone darftû niht mê vrâgen

Verse: 553    hie ist ein brunne nâhen bî
Verse: 554    uber kurzer mîle drî:

Verse: 555    zewâre unde kumestû dar
Verse: 556    und tuostû im sîn reht gar,

Verse: 557    tuostû dan die widerkêre
Verse: 558    âne grôze dîn unêre,

Verse: 559    sô bistû wol ein vrum man:
Verse: 560    dâne zwîvel ich niht an.

Verse: 561    waz vrumt ob ich dir mêre sage?
Verse: 562    ich weiz wol, und bistû niht ein zage,

Verse: 563    so gesihestû wol in kurzer vrist
Verse: 564    selbe waz diu rede ist.

Verse: 565    Noch hœre waz sîn reht sî
Verse: 566    dâ stât ein capelle bî:

Verse: 567    diu ist schœne und aber cleine.
Verse: 568    kalt und vil reine

Verse: 569    ist der selbe brunne:
Verse: 570    in rüeret regen noch sunne,

Verse: 571    nochn trüebent in die winde.
Verse: 572    des schirmet im ein linde,

Verse: 573    daz nie man schœner gesach:
Verse: 574    diu ist sîn schate und sîn dach.

Verse: 575    sî ist breit hôch und alsô dic
Verse: 576    daz regen noch der sunnen blic

Verse: 577    niemer dar durch enkumt:
Verse: 578    irn schadet der winter noch envrumt

Verse: 579    an ir schœne niht ein hâr,
Verse: 580    sine stê geloubet durch daz jâr.

Verse: 581    und ob dem brunne stât ein
Verse: 582    harte zierlîcher stein,

Verse: 583    undersatzt mit vieren
Verse: 584    marmelînen tieren:

Verse: 585    der ist gelöchert vaste.
Verse: 586    ez hanget von einem aste

Verse: 587    von golde ein becke her abe:
Verse: 588    jane wæn ich niht daz iemen habe

Verse: 589    dehein bezzer golt danne ez sî.
Verse: 590    diu keten dâ ez hanget bî,

Verse: 591    diu ist ûz silber geslagen
Verse: 592    wil dû danne niht verzagen,

Verse: 593    sone tuo dem becke niht mê,
Verse: 594    giuz ûf den stein der dâ stê

Verse: 595    dâ mite des brunnen ein teil:
Verse: 596    deiswâr, sô hâstû guot heil,

Verse: 597    gescheidestû mit êren dan.'
Verse: 598    hin wîste mich der waltman

Verse: 599    einen stîc ze der winstern hant:
Verse: 600    ich vuor des endes unde vant

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.