TITUS
Hartmann, Iwein
Part No. 8
Previous part

Verse group: (8) 
Verse: 701    sîn stimme lûte sam ein horn:
Verse: 702    ich sach wol, im was an mich zorn.

Verse: 703    als ab ich in einen sach,
Verse: 704    mîn vorhte und mîn ungemach

Verse: 705    wart gesenftet iedoch,
Verse: 706    und gedâhte ze lebenne noch,

Verse: 707    und gurte mînem orse baz.
Verse: 708    dô ich dâ wider ûf gesaz,

Verse: 709    dô was er komen daz er mich sach.
Verse: 710    vil lûte rief er unde sprach,

Verse: 711    dô er mich aller verrest kôs
Verse: 712    'rîter, ir sît triuwelôs.

Verse: 713    mirn wart von iu niht widerseit,
Verse: 714    und habent mir lasterlîchez leit

Verse: 715    in iuwer hôchvart getân.
Verse: 716    nu wie sihe ich mînen walt stân!

Verse: 717    den habent ir mir verderbet
Verse: 718    und mîn wilt ersterbet

Verse: 719    und mîn gevügele verjaget.
Verse: 720    iu sî von mir widersaget:

Verse: 721    ir sult es mir ze buoze stân
Verse: 722    od ez muoz mir an den lîp gân.

Verse: 723    daz kint daz dâ ist geslagen,
Verse: 724    daz muoz wol weinen unde clagen:

Verse: 725    alsus clag ich von schulden.
Verse: 726    ichn hân wider iuwern hulden

Verse: 727    mit mînem wizzen niht getân:
Verse: 728    âne schulde ich grôzen schaden hân.

Verse: 729    hien sol niht vrides mêre wesen:
Verse: 730    wert iuch, ob ir welt genesen.'

Verse: 731    Dô bôt ich mîn unschulde
Verse: 732    und suochte sîne hulde:

Verse: 733    wan er was merre danne ich.
Verse: 734    done sprach er niht wider mich,

Verse: 735    wan daz ich mich werte,
Verse: 736    ob ich mich gerne nerte.

Verse: 737    dô tête ich daz ich mohte,
Verse: 738    daz mir doch lützel tohte.

Verse: 739    ich tjostierte wider in:
Verse: 740    des vuort er mîn ors hin.

Verse: 741    daz beste heil daz mir geschach,
Verse: 742    daz was daz ich mîn sper zebrach.

Verse: 743    vil schône sazte mich sîn hant
Verse: 744    hinder daz ors ûf daz lant,

Verse: 745    daz ich vil gar des vergaz
Verse: 746    ob ich ûf ors ie gesaz.

Verse: 747    er nam mîn ors und lie mich ligen.
Verse: 748    mir was gelückes dâ verzigen.

Verse: 749    done muote mich niht sô sêre,
Verse: 750    ern bôt mir nie die êre

Verse: 751    daz er mich wolde ane gesehen.
Verse: 752    dô im diu êre was geschehen,

Verse: 753    dô gebârter rehte diu gelîch
Verse: 754    als im aller tägelîch

Verse: 755    zehenstunt geschæhe alsame.
Verse: 756    der prîs was sîn, und mîn diu schame.

Verse: 757    swaz ich doch lasters dâ gewan,
Verse: 758    dâ was ich ein teil unschuldec an

Verse: 759    mir was der wille harte guot:
Verse: 760    done mohten mir diu werc den muot

Verse: 761    an im niht volbringen:
Verse: 762    des muose mir misselingen.

Verse: 763    Dô mir des orses wart verzigen,
Verse: 764    ichn moht niht imer dâ geligen:

Verse: 765    dô geruocht ich gân von dan
Verse: 766    als eln êrlôser man

Verse: 767    und saz aber zuo dem brunnen.
Verse: 768    der unzuht sult ir mich verkunnen,

Verse: 769    swie niugerne ich anders sî,
Verse: 770    und sæz ich iemer dâ bî,

Verse: 771    ichn begüzze in niemer mêre:
Verse: 772    ich entgalt es ê sô sêre.

Verse: 773    Dô ich gnuoc lange dâ gesaz
Verse: 774    unde betrahte daz

Verse: 775    waz mir ze tuonne wære,
Verse: 776    min harnasch was ze swære

Verse: 777    daz ichz gânde niht enmohte getragen:
Verse: 778    nû waz mag iu mêre sagen?

Verse: 779    wan ich schutez abe und gie dan.
Verse: 780    ich gnâdelôser man.

Verse: 781    gedâhte war ich kêrte,
Verse: 782    unz mich min herze lêrte,

Verse: 783    daz mir an minen wirt geriet
Verse: 784    von dem ich des morgens schiet.

Verse: 785    swie ich dar kam gegangen,
Verse: 786    ichn wart niht wirs enpfangen

Verse: 787    danne ouch des âbents dô ich reit:
Verse: 788    daz machet aber sîn hövescheit.

Verse: 789    wær mir diu êre geschehen,
Verse: 790    als ich in dem laster wart gesehen,

Verse: 791    min handelunge wær gnuoc guot.
Verse: 792    alsus trôstensmir den muot,

Verse: 793    er und mîn juncvrouwe.
Verse: 794    daz sî got iemer schouwe!

Verse: 795    Ich hân einem tôren glîch getân,
Verse: 796    diu mære der ich laster hân,

Verse: 797    daz ich diu niht kan verdagen:
Verse: 798    ich woldes ouch ê nie gesagen.

Verse: 799    wære mir iht baz geschehen,
Verse: 800    des hôrtent ir mich ouch nû jehen.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.