TITUS
Hartmann, Iwein
Part No. 9
Previous part

Verse group: (9) 
Verse: 801    sî iuwer deheinem geschehen baz,
Verse: 802    ob er nû welle, der sage ouch daz.'

Verse: 803    Dô rechent der herre Îwein
Verse: 804    ze künneschaft under in zwein:

Verse: 805    er sprach 'neve Kâlogrenant,
Verse: 806    ez richet von rehte mîn hant

Verse: 807    swaz dir lasters ist geschehen.
Verse: 808    ich wil ouch varn den brunnen sehen,

Verse: 809    und waz wunders dâ sî.'
Verse: 810    dô sprach aber Keiî

Verse: 811    ein rede diu im wol tohte;
Verse: 812    wan ers niht lâzen mohte,

Verse: 813    geschach ie man dehein vrümekheit,
Verse: 814    ezn wær im doch von herzen leit.

Verse: 815    'ez schînet wol, wizze Krist,
Verse: 816    daz disiu rede nâch ezzen ist.

Verse: 817    irn vastet niht, daz hœr ich wol.
Verse: 818    wînes ein becher vol

Verse: 819    der gît, daz sî iu geseit,
Verse: 820    mêre rede und manheit

Verse: 821    dan vierzec unde viere
Verse: 822    mit wazzer ode mit biere

Verse: 823    sô diu katze gevrizzet vil,
Verse: 824    zehant sô hebet sî ir spil:

Verse: 825    herre Îwein, alsô tuot ir.
Verse: 826    rât ich iu wol, sô volget mir.

Verse: 827    iu ist mit der rede ze gâch:
Verse: 828    slâfet ein lützel darnâch.

Verse: 829    troume iu danne iht swâre,
Verse: 830    sô sult irs iu zewâre

Verse: 831    nemen eine mâze.
Verse: 832    Ode vart iuwer strâze

Verse: 833    mit guotem heile,
Verse: 834    und gebet mir niht ze teile

Verse: 835    swaz iu dâ êren geschiht,
Verse: 836    und enzelt mir halben schaden niht.'

Verse: 837    'Her Keiî', sprach diu künegîn,
Verse: 838    'iuwer zunge müez gunêret sîn,

Verse: 839    diu allez guot gar verdaget
Verse: 840    und niuwan daz allerbœste saget

Verse: 841    des iuwer herze erdenken kan.
Verse: 842    doch wæn ich dar an

Verse: 843    der zungen unrehte tuo:
Verse: 844    iuwer herze twinget sî darzuo.

Verse: 845    dazn dunket deheiner schalkheit ze vil:
Verse: 846    nû muoz sî sprechen swaz ez wil.

Verse: 847    ichn mac sî niht gescheiden,
Verse: 848    wan übel geschehe in beiden.

Verse: 849    ich wil iu daz zewâre sagen,
Verse: 850    dem ir den vater hetet erslagen,

Verse: 851    dern vlizze sich des niht mêre
Verse: 852    wie er iu alle iuwer êre

Verse: 853    benæme, danne sî dâ tuot.
Verse: 854    iu habt ez eine, werdez iu guot.'

Verse: 855    Her Îwein lachet unde sprach
Verse: 856    'vrouwe, mirn ist niht ungemach

Verse: 857    swaz mir her Keiî sprichet:
Verse: 858    ich weiz wol daz er richet

Verse: 859    an mir mîn ungewizzenheit.
Verse: 860    im ist mîn unvuoge leit:

Verse: 861    dien wold er mich niht verdagen.
Verse: 862    Ouch kan erz mir wol undersagen

Verse: 863    mit selher vuoge als er ie pflac,
Verse: 864    die niemen wol gezürnen mac.

Verse: 865    mîn her Keiî der ist so wîs
Verse: 866    und hât selch êre und selhen prîs

Verse: 867    daz man in gerne hœren sol;
Verse: 868    und hân ich nû wâr, daz wizzet ir wol

Verse: 869    ich wil des iemer sîn ein zage
Verse: 870    daz ich im sîniu wort vertrage.

Verse: 871    Ouch enhebet er niht den strît
Verse: 872    der den êrsten slac gît:

Verse: 873    unz in der ander vertreit,
Verse: 874    sô ist der strît hin geleit.

Verse: 875    ichn wil mich mit dem munde
Verse: 876    niht gelîchen dem hunde,

Verse: 877    der dâ wider grînen kan,
Verse: 878    sô in der ander grinet an'

Verse: 879    Hie was mit rede schimpfes vil.
Verse: 880    ouch hete der künec ûf sîn zil

Verse: 881    geslâfen und erwachte sâ,
Verse: 882    unde enlac ouch niht langer dâ.

Verse: 883    er gienc hin ûz zuo in zehant,
Verse: 884    dâ er sî sament sitzen vant.

Verse: 885    sî sprungen ûf: daz was im leit
Verse: 886    und zurnde durch gesellekheit:

Verse: 887    wander was in weizgot verre
Verse: 888    baz geselle dan herre.

Verse: 889    er saz zuo in dâ nider.
Verse: 890    diu künegin saget im her wider

Verse: 891    Kâlogrenandes swære
Verse: 892    und älliu disiu mære.

Verse: 893    Nû hete der künec die gewonheit
Verse: 894    daz er nimmer deheinen eit

Verse: 895    bî sînes vater sêle swuor
Verse: 896    wan des er benamen volvuor.

Verse: 897    Uterpandragôn was er genant.
Verse: 898    bî im swuor er des zehant

Verse: 899    (daz hiez er über al sagen)
Verse: 900    daz er in vierzehen tagen

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.