TITUS
Hartmann, Iwein
Part No. 10
Previous part

Verse group: (10) 
Verse: 901    und rehte an sant Jôhannes naht
Verse: 902    mit aller sîner maht

Verse: 903    zuo dem brunnen wolde komen.
Verse: 904    dô sî daz heten vernomen,

Verse: 905    daz dûhte sî rîterlich und guot.
Verse: 906    wan dar stuont ir aller muot.

Verse: 907    ichn weiz wem liebe dran geschach:
Verse: 908    ez was dem hern Îwein ungemach,

Verse: 909    wand er sich hete an genomen
Verse: 910    daz er dar eine wolde komen.

Verse: 911    er gedâhte 'ich enmac daz niht bewarn
Verse: 912    und wil der künec selbe varn,

Verse: 913    mirn werde mîn rîterschaft benomen.
Verse: 914    mir sol des strîtes vür komen

Verse: 915    mîn her Gâwein:
Verse: 916    des enist zwîvel dehein,

Verse: 917    als schiere so er des strîtes gert,
Verse: 918    ern werdes vür mich gewert.

Verse: 919    entriuwen ez sol anders varn:
Verse: 920    ich kan daz harte wol bewarn,

Verse: 921    swer vierzehen tage erbîtet,
Verse: 922    daz er vor mir niht enstrîtet.

Verse: 923    wan ich sol in disen drin tagen
Verse: 924    des endes varn, und niemen sagen,

Verse: 925    in den walt ze Breziljân,
Verse: 926    suochen unz ich vunden hân

Verse: 927    den stîc den Kâlogrenant
Verse: 928    sô engen und sô rûhen vant.

Verse: 929    und dâ nâch sol ich schouwen
Verse: 930    die schœnen juncvrouwen,

Verse: 931    des êrbæren wirtes kint,
Verse: 932    diu beidiu alsô hövesch sint.

Verse: 933    so gesihe ich, swenne ich scheide dan,
Verse: 934    den vil ungetânen man

Verse: 935    der dâ pfliget der tiere.
Verse: 936    dar nâch sô sihe ich schiere

Verse: 937    den stein und den brunnen:
Verse: 938    des müezen sî mir gunnen

Verse: 939    daz ich in eine begieze,
Verse: 940    ich engeltes ode genieze.

Verse: 941    desn wirt nû niemen zuo gedâht
Verse: 942    unz ichz habe volbrâht:

Verse: 943    bevindent sîz so ez ergat,
Verse: 944    des wirt danne guot rât.'

Verse: 945    Alsus stal er sich dan
Verse: 946    und warp rehte als ein man

Verse: 947    der êre mit listen
Verse: 948    kunde gewinnen und vristen,

Verse: 949    und kam dâ er die knappen vant.
Verse: 950    den besten nam er dâ zehant,

Verse: 951    den er niht verdagete.
Verse: 952    vil stille er im sagete

Verse: 953    daz er im sîn gereite
Verse: 954    ûf sîn pfärit leite:

Verse: 955    er wolde ze velde rîten
Verse: 956    und sîn da ûze bîten

Verse: 957    unz erm sîn harnasch bræchte nach.
Verse: 958    er sprach 'nû lâ dir wesen gâch,

Verse: 959    und sich daz dûz wol verdagest.
Verse: 960    zewâre ob dûz iemen sagest,

Verse: 961    so ist iemer gescheiden
Verse: 962    diu vriuntschaft under uns beiden.'

Verse: 963    Sus reit er ûz und liez in dâ.
Verse: 964    vil schiere brâhter im hin nâ

Verse: 965    sîn ors und sîn îsengewant.
Verse: 966    nû wâfent er sich zehant,

Verse: 967    er saz ûf unde reit
Verse: 968    nâch wâne in grôz arbeit

Verse: 969    und erstreich grôze wilde,
Verse: 970    walt unde gevilde,

Verse: 971    unz er den engen stîc vant
Verse: 972    den sîn neve Kâlogrenant

Verse: 973    alsô kûme durch gebrach.
Verse: 974    Ouch Icit er grôzen ungemach

Verse: 975    unz daz er ûz ze velde kam.
Verse: 976    die guoten herberge er dô nam,

Verse: 977    daz im von wirte selch gemach
Verse: 978    eines nahtes nie geschach.

Verse: 979    des morgells schiet er von dan
Verse: 980    und vant den griulîchen man

Verse: 981    ûf einem gevilde
Verse: 982    stân bî sînem wilde

Verse: 983    und vor sînem aneblicke
Verse: 984    segent er sich vil dicke,

Verse: 985    daz got sô ungehiure
Verse: 986    deheine crêatiure

Verse: 987    geschepfen ie geruochte.
Verse: 988    der bewîst in des er suochte.

Verse: 989    Vil schiere sach her Îwein
Verse: 990    den boum, den brunnen, den stein,

Verse: 991    und gehôrte ouch den vogelsanc.
Verse: 992    dô was sîn twelen unlanc

Verse: 993    unz daz er ûf den stein gôz.
Verse: 994    dô kam ein siusen unde ein dôz

Verse: 995    und ein selch weter dar nâch
Verse: 996    daz in des dûhte daz im ze gâch

Verse: 997    mit dem giezen wær gewesen:
Verse: 998    wan er entriute niemer genesen.

Verse: 999    Dô daz weter ende nam,
Verse: 1000    dô hôrter daz geriten kam

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.