TITUS
Hartmann, Iwein
Part No. 11
Previous part

Verse group: (11) 
Verse: 1001    des selben waldes herre.
Verse: 1002    der gruozt in harte verre

Verse: 1003    als vîent sînen vîent sol:
Verse: 1004    ouch verstuont sich her Îwein wol

Verse: 1005    daz er sich weren solde,
Verse: 1006    ob er niht dulden wolde

Verse: 1007    beide laster unde leit.
Verse: 1008    ir ietweder was gereit

Verse: 1009    ûf des anderen schaden:
Verse: 1010    sî hete beide überladen

Verse: 1011    grôz ernest unde zorn.
Verse: 1012    sî nâmen diu ors mitten sporn:

Verse: 1013    sus was in zuo ein ander ger.
Verse: 1014    ir ietweder sîn sper

Verse: 1015    durch des andern schilt stach
Verse: 1016    ûf den lîp daz ez zebrach

Verse: 1017    wol ze hundert stücken.
Verse: 1018    dô muosen sî beide zücken

Verse: 1019    diu swert von den sîten.
Verse: 1020    hie huop sich ein strîten

Verse: 1021    daz got mit êren möhte sehen,
Verse: 1022    und solt ein kampf vor im geschehen.

Verse: 1023    über die schilte gienc diu nôt,
Verse: 1024    den ir ietweder vür bôt,

Verse: 1025    die wîle daz die werten:
Verse: 1026    sî wurden ab mit den swerten

Verse: 1027    zehouwen schiere alsô gar
Verse: 1028    daz sî ir bêde wurden bar.

Verse: 1029    Ich machte des strîtes harte vil
Verse: 1030    mit worten, wan daz ich enwil,

Verse: 1031    als ich iu bescheide.
Verse: 1032    sî wâren dâ beide,

Verse: 1033    unde ouch nieman bî in mê
Verse: 1034    der mir der rede gestê.

Verse: 1035    spræche ich, sît ez nieman sach,
Verse: 1036    wie dirre sluoc, wie jener stach:

Verse: 1037    ir einer wart dâ erslagen:
Verse: 1038    dern mohte niht dâ von gesagen:

Verse: 1039    der aber den sige dâ gewan,
Verse: 1040    O der was ein sô hövesch man,

Verse: 1041    er hete ungerne geseit
Verse: 1042    sô vil von sîner manheit

Verse: 1043    dâ von ich wol gemâzen mege
Verse: 1044    die mâze ir stiche und ir slege.

Verse: 1045    s wan ein dinc ich iu wol sagc,
Verse: 1046    daz ir deweder was ein zage,

Verse: 1047    wan da ergienc wehselslege gnuoc,
Verse: 1048    unz daz der gast dem wirte sluoc

Verse: 1049    durch den helm einen slac
Verse: 1050    zetal unz dâ daz leben lac.

Verse: 1051    und alser der tôtwunden
Verse: 1052    rehte het enpfunden,

Verse: 1053    dô twanc in des tôdes leit
Verse: 1054    mêre dan sîn zageheit

Verse: 1055    daz er kêrte und gap die vluht.
Verse: 1056    her Îwein jaget in âne zuht

Verse: 1057    engegen sîner burc dan.
Verse: 1058    ez het der halptôte man

Verse: 1059    ze vliehen einen gereiten muot:
Verse: 1060    ouch was sîn ors alsô guot

Verse: 1061    daz er vil nâch was komen hin.
Verse: 1062    dô gedâht her Îwein, ob er in

Verse: 1063    niht erslüege od vienge,
Verse: 1064    daz ez im danne ergienge

Verse: 1065    als im her Keiî gehiez,
Verse: 1066    der niemens ungespottet liez:

Verse: 1067    und waz im sîn arbeit töhte,
Verse: 1068    sô er mit niemen enmöhte

Verse: 1069    erziugen dise geschiht
Verse: 1070    (wan dâne was der liute niht):

Verse: 1071    sô spræcher im an sîn êre.
Verse: 1072    des begunder im vil sêre

Verse: 1073    ze slage mite gâhen,
Verse: 1074    unz sî die burc sâhen.

Verse: 1075    Nune was diu burcstrâze
Verse: 1076    zwein mannen niht ze mâze:

Verse: 1077    sus vuoren sî in der enge
Verse: 1078    beide durch gedrenge

Verse: 1079    unz an daz palas. dâ vor
Verse: 1080    was gehangen ein slegetor:

Verse: 1081    dâ muose man hin durch varn
Verse: 1082    unde sich vil wol bewarn

Verse: 1083    vor der selben slegetür,
Verse: 1084    daz man den lîp dâ niht verlür.

Verse: 1085    sweder ros od man getrat
Verse: 1086    iender ûz der rehten stat,

Verse: 1087    daz ruorte die vallen und den haft
Verse: 1088    der dâ alle dise kraft

Verse: 1089    und daz swære slegetor
Verse: 1090    von nidere ûf habte enbor:

Verse: 1091    sô nam ez einen val
Verse: 1092    alsô gâhes her zetal

Verse: 1093    daz im nieman entran.
Verse: 1094    sus was beliben manec man.

Verse: 1095    dâ reit der wirt vor im in.
Verse: 1096    der hete die kunst und den sin

Verse: 1097    daz im dâ von niht arges enwar:
Verse: 1098    wander meistert ez dar.

Verse: 1099    ez was swære unde sneit
Verse: 1100    sô sêre daz ez niht enmeit

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.