TITUS
Hartmann, Iwein
Part No. 12
Previous part

Verse group: (12) 
Verse: 1101    ezn schriete îsen unde bein.
Verse: 1102    nune kunde sich her Îwein

Verse: 1103    niht gehüeten dâ vor
Verse: 1104    unde valte daz tor,

Verse: 1105    und sluoc zen selben stunden
Verse: 1106    dem wirte eine wunden,

Verse: 1107    und genas als ich iu sage.
Verse: 1108    er hete sich nâch dem slage

Verse: 1109    hin vür geneiget unde ergeben:
Verse: 1110    alsus beleip im daz leben,

Verse: 1111    dô daz tor her nider sleif,
Verse: 1112    deiz im den lîp niht begreif

Verse: 1113    und sluoc, als ich vernomen habe,
Verse: 1114    daz ros ze mittem satel abe,

Verse: 1115    und schriet die swertscheide
Verse: 1116    und die sporn beide

Verse: 1117    hinder der versenen dan:
Verse: 1118    er genas als ein sælec man.

Verse: 1119    Dô im daz ros tôt gelac,
Verse: 1120    done mohter, als er ê pflac,

Verse: 1121    niht vürbaz gejagen:
Verse: 1122    ouch het er den wirt erslagen.

Verse: 1123    der vlôch noch den ende vor
Verse: 1124    durch ein ander slegetor

Verse: 1125    und lizz daz hinder ime nider:
Verse: 1126    done mohte der gast vür noch wider.

Verse: 1127    sus was mîn her Îwein
Verse: 1128    zwischen disen porten zwein

Verse: 1129    beslozzen und gevangen.
Verse: 1130    swie sêre im missegangen

Verse: 1131    an der vancnüsse wære.
Verse: 1132    doch was sîn meistiu swære

Verse: 1133    daz er im vor dan
Verse: 1134    alsô lebendec entran.

Verse: 1135    Ich wil iu von dem hûse sagen
Verse: 1136    dâ er inne was beslagen.

Verse: 1137    ez was, als er sît selbe jach,
Verse: 1138    daz er sô schœnez nie gesach

Verse: 1139    weder vor des noch sît,
Verse: 1140    hôch vest unde wît,

Verse: 1141    gemâlet gar von golde.
Verse: 1142    swer darinne wesen solde

Verse: 1143    âne vorhtlîche swære,
Verse: 1144    den dûhtez vreudebære.

Verse: 1145    dô suochter wider unde vür
Verse: 1146    und envant venster noch tür

Verse: 1147    dâ er ûz möhte.
Verse: 1148    nu gedâhter waz im töhte.

Verse: 1149    dô er mit selhen sorgen ranc,
Verse: 1150    dô wart bî im niht über lanc

Verse: 1151    ein türlîn ûf getân:
Verse: 1152    dâ sach er zuo im ûz gan

Verse: 1153    eine rîterlîche maget,
Verse: 1154    enhete sî sich niht verclaget.

Verse: 1155    diu sprach zem êrsten niht mê
Verse: 1156    wan 'ouwê, rîter, ouwê!

Verse: 1157    daz ir her komen sît,
Verse: 1158    daz ist iuwer jungestiu zît.

Verse: 1159    ir habet mînen herrn erslagen.
Verse: 1160    man mac sô jæmerlîchez clagen

Verse: 1161    an mîner lieben vrouwen
Verse: 1162    und an dem gesinde schouwen,

Verse: 1163    und sô grimmeclîchen zorn,
Verse: 1164    daz ir den lîp hânt verlorn.

Verse: 1165    daz sî iuch nû niht hânt erslagen,
Verse: 1166    daz vristet niuwan daz clagen

Verse: 1167    daz ob mînem herren ist:
Verse: 1168    sî slahent iuch ab an dirre vrist.'

Verse: 1169    Er sprach 'so ensol ich doch den lîp
Verse: 1170    niht verliesen als ein wîp:

Verse: 1171    michn vindet nieman âne wer.'
Verse: 1172    sî sprach 'got sî der iuch ner:

Verse: 1173    ern beschirme iuch eine, ir sît tôt.
Verse: 1174    doch gehabte sich ze grôzer nôt

Verse: 1175    nie man baz danne ir tuot:
Verse: 1176    ir sît benamen wol gemuot.

Verse: 1177    des sol man iuch geniezen lân.
Verse: 1178    swie leide ir mir habt getân,

Verse: 1179    ichn bin iu doch niht gehaz,
Verse: 1180    und sage iu mêre umbe waz.

Verse: 1181    Mîn vrouwe hete mich gesant
Verse: 1182    ze Britanje in daz lant.

Verse: 1183    dâ gesprach ich den künec von ir:
Verse: 1184    herre, daz geloubet mir,

Verse: 1185    ich schiet alsô von dan
Verse: 1186    daz mir dâ nie dehein man

Verse: 1187    ein wort zuo gesprach.
Verse: 1188    ich weiz doch wol daz ez geschach

Verse: 1189    von mîner unhövescheit.
Verse: 1190    alsô het ich ûf geleit,

Verse: 1191    ichn wære ir gruozes niht sô wol wert,
Verse: 1192    als man da ze hove gert:

Verse: 1193    ich weiz wol, des engalt ich.
Verse: 1194    herre, dô gruoztet ir mich,

Verse: 1195    und ouch dâ nieman mêre.
Verse: 1196    dô erbutet ir mir die êre

Verse: 1197    der ich iu hie lônen sol.
Verse: 1198    herre, ich erkenn iuch wol:

Verse: 1199    iuwer vater was, deist mir erkant,
Verse: 1200    der künec Urjên genant.

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.