TITUS
Hartmann, Iwein
Part No. 15
Previous part

Verse group: (15) 
Verse: 1401    ern lâze sich ouch ein wîp sehen?
Verse: 1402    wand waz möht im von der geschehen

Verse: 1403    Dô sî gesuochten genuoc
Verse: 1404    und in sîn stein des übertruoc

Verse: 1405    daz im niht arges geschach,
Verse: 1406    wand in dâ nieman ensach,

Verse: 1407    dô gelac daz suochen under in.
Verse: 1408    ir tôten truogen sî hin

Verse: 1409    ze münster, dâ manz ambet tete
Verse: 1410    mit vollem almuosen und mit gebete.

Verse: 1411    dar nâch truogen sî in ze grabe.
Verse: 1412    von ir grôzen ungehabe

Verse: 1413    wart dâ ein jæmerlîcher schal.
Verse: 1414    diu juncvrouwe sich dô stal

Verse: 1415    von dem gesinde dan
Verse: 1416    und gruozte den verborgen man

Verse: 1417    und trôst in als ein hövesch maget.
Verse: 1418    Ouch enwas her Îwein niht verzaget:

Verse: 1419    im hete diu minne einen muot
Verse: 1420    gegeben, als sî manegem tuot,

Verse: 1421    daz er den tôt niht entsaz.
Verse: 1422    doch hal er die maget daz

Verse: 1423    daz er sîner vîendinne
Verse: 1424    truoc sô grôze minne.

Verse: 1425    Er gedâhte 'wie gesihe ich sî?'
Verse: 1426    nû was im sô nâhen bî

Verse: 1427    diu stat dâ man in leite,
Verse: 1428    daz er sam gereite

Verse: 1429    hârte alle ir swære
Verse: 1430    sam er under in wære.

Verse: 1431    mit listen sprach er alsô
Verse: 1432    'ouwê, diz volc ist starke unvrô:

Verse: 1433    mir gât ze herzen ir clage
Verse: 1434    nâher danne ich iemen sage.

Verse: 1435    möht ez mit vuoge geschehen,
Verse: 1436    sô wold ich harte gerne sehen

Verse: 1437    ir gebærde und ir ungehabe,
Verse: 1438    die ich dâ hœre bî dem grabe.'

Verse: 1439    Die rede meinder niender sô:
Verse: 1440    wan ern gæbe drumbe niht ein strô,

Verse: 1441    ob sî mit glîchem valle
Verse: 1442    dâ zehant alle

Verse: 1443    lægen ûf der bâren,
Verse: 1444    die dâ gesinde wâren,

Verse: 1445    âne die vrouwen eine.
Verse: 1446    Ouch enwas diu nôt niht cleine,

Verse: 1447    daz er sî hôrte und niene sach.
Verse: 1448    nû buozte sî im den ungemach,

Verse: 1449    wande sî nâch sîner bete
Verse: 1450    ein venster ob im ûf tete,

Verse: 1451    und liez sî in wol beschouwen.
Verse: 1452    nû sach er die vrouwen

Verse: 1453    von jâmer lîden michel nôt.
Verse: 1454    sî sprach 'geselle, an dir ist tôt

Verse: 1455    der aller tiureste man,
Verse: 1456    der rîters namen ie gewan,

Verse: 1457    von manheit und von milte.
Verse: 1458    ezn gereit nie mit schilte

Verse: 1459    dehein rîter alsô volkomen.
Verse: 1460    ouwê wie bistû mir benomen?

Verse: 1461    ichn weiz war umbe ode wie.
Verse: 1462    der tôt möhte an mir wol hie

Verse: 1463    büezen swaz er ie getete,
Verse: 1464    und gewerte mich einer bete,

Verse: 1465    daz er mich lieze varn mit dir.
Verse: 1466    waz sol ich, swenne ich dîn enbir?

Verse: 1467    waz sol mir guot unde lîp?
Verse: 1468    waz sol ich unsælic wîp?

Verse: 1469    ouwê daz ich ie wart geborn!
Verse: 1470    ouwê wie hân ich dich verlorn?

Verse: 1471    ouwê, trûtgeselle.
Verse: 1472    got versperre dir die helle

Verse: 1473    und gebe dir durch sîne kraft
Verse: 1474    der engel genôzschaft:

Verse: 1475    wan dû wær ie der beste.'
Verse: 1476    ir jâmer was sô veste

Verse: 1477    daz sî sich roufte und zebrach.
Verse: 1478    dô daz her Îwein ersach,

Verse: 1479    dô lief er gegen der tür,
Verse: 1480    als er vil gerne hin vür

Verse: 1481    zuo ir wolde gâhen
Verse: 1482    und ir die hende vâhen.

Verse: 1483    Dô daz diu juncvrouwe ersach,
Verse: 1484    sî zôch in wider unde sprach

Verse: 1485    'saget, wâ welt ir hin,
Verse: 1486    ode wâ habt ir den sin

Verse: 1487    genomen der iu diz geriet?
Verse: 1488    nu ist vor der tür ein michel diet:

Verse: 1489    diu ist iu starke erbolgen.
Verse: 1490    irn wellent mir volgen,

Verse: 1491    sô habt ir den lîp verlorn'
Verse: 1492    alsus erwant in ir zorn.

Verse: 1493    sî sprach 'wes was iu gedâht?
Verse: 1494    wær iuwer gedanc volbraht,

Verse: 1495    sone hetent ir niht wol gevarn.
Verse: 1496    ichn trûwe iu den lîp niht bewarn,

Verse: 1497    ezn sî dan iuwer wille.
Verse: 1498    durch got sitzent stille.

Verse: 1499    er ist ein vil wîser man
Verse: 1500    der tumben gedanc verdenken kan

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.