TITUS
Hartmann, Iwein
Part No. 20
Previous part

Verse group: (20) 
Verse: 1901    mînes herren wandel hân,
Verse: 1902    sone wilz diu werlt sô niht verstân

Verse: 1903    als ez doch gote ist erkant:
Verse: 1904    der weiz wol, ob mîn lant

Verse: 1905    mit mir bevridet wære,
Verse: 1906    daz ichs benamen enbære.

Verse: 1907    nû rât mir, liebe, waz ich tuo,
Verse: 1908    hœret dehein rât dâ zuo.

Verse: 1909    sît ich ân einen vrumen man
Verse: 1910    mîn lant niht bevriden kan,

Verse: 1911    so gewinn ich gerne einen,
Verse: 1912    und anders deheinen,

Verse: 1913    den ich sô vrumen erkande
Verse: 1914    daz er mînem lande

Verse: 1915    guoten vride bære
Verse: 1916    und doch mîn man niht wære.'

Verse: 1917    Sî sprach 'daz sî iu widerseit.
Verse: 1918    wer wær der sich sô groz arbeit

Verse: 1919    iemer genæme durch iuch an,
Verse: 1920    erne wære iuwer man?

Verse: 1921    ir sprechet eht als ein wîp.
Verse: 1922    gebet ir im guot und lîp,

Verse: 1923    ir muget ez dannoch heizen guot
Verse: 1924    oberz willeclîchen tuot.

Verse: 1925    nû habent ir schœne unde jugent,
Verse: 1926    geburt rîcheit unde tugent

Verse: 1927    und muget einen alsô biderben man
Verse: 1928    wol gewinnen, obs iu got gan.

Verse: 1929    nune weinet niht mêre
Verse: 1930    und gedenket an iuwer êre:

Verse: 1931    zewâre, vrouwe, des ist nôt.
Verse: 1932    mîn herre ist vür sich einen tôt:

Verse: 1933    wænt ir daz älliu vrümekheit
Verse: 1934    mit im ze grabe sî geleit?

Verse: 1935    zewâre des enist niht,
Verse: 1936    wand man noch hundert ritter siht

Verse: 1937    die alle tiurre sint dan er
Verse: 1938    ze swerte ze schilte und ze sper.'

Verse: 1939    'dû hâst zewâre misseseit.'
Verse: 1940    'vrouwe, ich hân die wârheit.'

Verse: 1941    'der zeige mir doch einen.'
Verse: 1942    'liezct ir iuwer weinen,

Verse: 1943    deiswâr ich vunden iu harte wol.'
Verse: 1944    'ichn weiz waz ich dir tuon sol:

Verse: 1945    wan ez dunket mich unmügelich.
Verse: 1946    sich, got der gebezzer dich,

Verse: 1947    ob dû mir nû liegest
Verse: 1948    und mich gerne triegest.'

Verse: 1949    'vrouwe, hân ich iu gelogen,
Verse: 1950    sô bin ich selbe betrogen

Verse: 1951    nû bin ich ie mit iu gewesen
Verse: 1952    und muoz ouch noch mit iu genesen:

Verse: 1953    verriet ich iuch, waz wurde mîn?
Verse: 1954    nû müezt ir mîn rihtære sîn:

Verse: 1955    nu erteilet mir (ir sît ein wîp),
Verse: 1956    swâ zwêne vehtent umbe den lîp,

Verse: 1957    weder tiurre sî der dâ gesige
Verse: 1958    od der dâ sigelôs gelige.'

Verse: 1959    'der dâ gesiget, sô wæn ich.
Verse: 1960    'vrouwe, ez ist niht wænlich:

Verse: 1961    wan ez ist gar diu wârheit.
Verse: 1962    als ich iu nû hân geseit,

Verse: 1963    rehte alsô hât ein man
Verse: 1964    gesiget mînem herren an.

Verse: 1965    daz wil ich wol mit iu gehaben:
Verse: 1966    wan ir habet in begraben.

Verse: 1967    ich erziuges nû genuoc,
Verse: 1968    der in dâ jagete unde sluoc,

Verse: 1969    der ist der tiurer gewesen:
Verse: 1970    mîn herre ist tôt und er genesen'

Verse: 1971    Daz was ir ein herzeleit,
Verse: 1972    daz sî deheiner vrümekheit

Verse: 1973    iemen vur ir herren jach.
Verse: 1974    mlt unslten sl or zuo sprach

Verse: 1975    und hiez sî enwec strîchen:
Verse: 1976    sine woltes nämelîchen

Verse: 1977    niemer mêre gesehen.
Verse: 1978    sî sprach 'mir mac wol geschehen

Verse: 1979    von mînen triuwen arbeit
Verse: 1980    und doch nimmer dehein herzeleit,

Verse: 1981    wan ich sî gerne lîden wil.
Verse: 1982    zewâre ich bin gerner vil

Verse: 1983    durch mîne triuwe vertriben
Verse: 1984    dan mit untriuwen beliben.

Verse: 1985    vrouwe, nû gân ich von iu hin:
Verse: 1986    und sô ich hin vertriben bin,

Verse: 1987    sô nemet durch got in iuwern muot
Verse: 1988    waz iu sî nütze unde guot.

Verse: 1989    daz ich iu ê gerâten hân,
Verse: 1990    daz hân ich gar durch guot getân:

Verse: 1991    und got vüege iu heil und êre,
Verse: 1992    gesehe ich iuch niemer mêre.'

Verse: 1993    Sus stuont sî ûf und gie dan
Verse: 1994    zuo dem verborgen man.

Verse: 1995    dem brâhtes bœsiu mære,
Verse: 1996    daz ir vrouwe wære

Verse: 1997    unbekêriges muotes:
Verse: 1998    sine kunde sî deheines guotes

Verse: 1999    mit nihte überwinden:
Verse: 2000    sine möhte dâ niht vinden

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.