TITUS
Hartmann, Iwein
Part No. 21
Previous part

Verse group: (21) 
Verse: 2001    niuwan zorn unde drô.
Verse: 2002    des wart her Îwein unvrô.

Verse: 2003    diu maget und her Îwein
Verse: 2004    begunden ahten under in zwein

Verse: 2005    daz sîz noch versuochten baz,
Verse: 2006    ob sî ir vrouwen haz

Verse: 2007    bekêrte mit guote
Verse: 2008    ze senfterem muote.

Verse: 2009    Dô diu vrouwe ir maget vertreip
Verse: 2010    und sî eine beleip,

Verse: 2011    dô begundes sêre riuwen
Verse: 2012    daz sî ir grôzen triuwen

Verse: 2013    wider sî sô sêre engalt,
Verse: 2014    wand sî ir vluochet und sî schalt.

Verse: 2015    sî gedâhte 'waz hân ich getân!
Verse: 2016    ich solde sî geniezen lân

Verse: 2017    daz sî mir wol gedienet hât
Verse: 2018    ich weiz wol daz sî mir den rât

Verse: 2019    niuwan durch alle triuwe tete.
Verse: 2020    swâ ich gevolget ir bete,

Verse: 2021    daz enwart mir nie leit,
Verse: 2022    und hat mir ouch nû wâr geseit.

Verse: 2023    ich erkenne nu lange wol ir muot:
Verse: 2024    sî ist getriuwe unde guot.

Verse: 2025    ich hân sî übele lâzen.
Verse: 2026    ich möhte wol verwâzen

Verse: 2027    mîne zornige site:
Verse: 2028    wan dâ gewinnet niemen mite

Verse: 2029    niuwan schande unde schaden.
Verse: 2030    ich solde sî her wider laden:

Verse: 2031    daz kæme mir vil lîhte baz.
Verse: 2032    ich was ir âne schult gehaz.

Verse: 2033    mîn herre was biderbe genuoc:
Verse: 2034    aber jener der in dâ sluoc,

Verse: 2035    der muose tiurre sîn dan er:
Verse: 2036    erne het in anders her

Verse: 2037    mit gewalte niht gejaget.
Verse: 2038    sî hat mir dar an wâr gesaget.

Verse: 2039    Swer er ist der in sluoc,
Verse: 2040    wider den hân ich schulde gnuoc

Verse: 2041    daz ich im vîent sî:
Verse: 2042    ouch stât unschulde dâ bî,

Verse: 2043    der ez rehte wil verstân:
Verse: 2044    er hât ez werende getân.

Verse: 2045    mîn herre wolt in hân erslagen:
Verse: 2046    heter im daz durch mich vertragen

Verse: 2047    und het in lâzen genesen,
Verse: 2048    sô wær ich im ze liep gewesen:

Verse: 2049    wan sô wærer selbe tôt.
Verse: 2050    daz er in sluoc, des gie im nôt'

Verse: 2051    Sus brâhte siz in ir muote
Verse: 2052    ze suone und ze guote,

Verse: 2053    und machte in unschult wider sî.
Verse: 2054    dô was gereite dâ bî

Verse: 2055    diu gewaltige Minne,
Verse: 2056    ein rehtiu süenærinne

Verse: 2057    under manne und under wîbe.
Verse: 2058    sî gedâhte 'mit mînem lîbe

Verse: 2059    mac ich den brunnen niht erwern:
Verse: 2060    mich muoz ein biderbe man nern,

Verse: 2061    ode ich bin benamen verlorn.
Verse: 2062    weizgot ich lâze mînen zorn,

Verse: 2063    ob ez sich gevüegen kan,
Verse: 2064    und enger niuwan des selben man

Verse: 2065    der mir den wirt erslagen hât.
Verse: 2066    Ob ez anders umb in stât

Verse: 2067    alsô rehte und alsô wol
Verse: 2068    daz ich im mîn gunnen sol,

Verse: 2069    sô muoz er mich mit triuwen
Verse: 2070    ergetzen mîner riuwen,

Verse: 2071    und muoz mich deste baz hân
Verse: 2072    daz er mir leide hât getân.'

Verse: 2073    Daz sî ir maget ie leit gesprach,
Verse: 2074    daz was ir alsô ungemach

Verse: 2075    daz sîz vil sêre clagete.
Verse: 2076    morgen, dô ez tagete,

Verse: 2077    dô kam sî wider gegangen
Verse: 2078    und wart baz enpfangen

Verse: 2079    dan sî verlâzen wære.
Verse: 2080    ir benam diu vrouwe ir swære

Verse: 2081    mit guotem antfange.
Verse: 2082    sine saz bî ir niht lange

Verse: 2083    unz sî sî vrâgen began.
Verse: 2084    sî sprach 'durch got, wer ist der man

Verse: 2085    den dû mir gester lobtest
Verse: 2086    (ich wæne dû niht tobtest,

Verse: 2087    wan ez entohte deheinem zagen)
Verse: 2088    der mînen herren hât erslagen.

Verse: 2089    hât er die geburt und jugent
Verse: 2090    und dâ zuo ander tugent,

Verse: 2091    daz er mir ze herren zimt,
Verse: 2092    und swenn ez diu werlt vernimt,

Verse: 2093    daz sî mirz niht gewîzen kan
Verse: 2094    ob ich genomen habe den man

Verse: 2095    der mînen herren hat erslagen,
Verse: 2096    kanstû mir daz von im gesagen

Verse: 2097    daz mir mîn laster ist verleit
Verse: 2098    mit ander sîner vrümekheit,

Verse: 2099    und rætestû mirz danne,
Verse: 2100    ich nim in zeinem manne.'

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.