TITUS
Hartmann, Iwein
Part No. 22
Previous part

Verse group: (22) 
Verse: 2101    Sî sprach 'ez dunket mich guot
Verse: 2102    und gan iu wol daz ir den muot

Verse: 2103    sô schône hât verkeret.
Verse: 2104    ir sît mit im gêret

Verse: 2105    und endurfet iuchs niemer geschamen.'
Verse: 2106    sî sprach 'nâ sage mir sînen namen.

Verse: 2107    'vrouwe, er heizet her Îwein.'
Verse: 2108    zehant gehullen sî in ein.

Verse: 2109    sî sprach 'deiswâr, jâ ist mir kunt
Verse: 2110    sîn name nû vor maneger stunt:

Verse: 2111    er ist sun des künec Urjênes.
Verse: 2112    entriuwen ich verstênes

Verse: 2113    mich nû alrêrst ein teil:
Verse: 2114    und wirt er mir, sô hân ich heil.

Verse: 2115    weist aber dû, geselle,
Verse: 2116    rehte ob er mich welle?'

Verse: 2117    'er wolde wærez nû geschehen.'
Verse: 2118    'sage, wenne mag ich in gesehen?'

Verse: 2119    'vrouwe, in disen vier tagen.'
Verse: 2120    'ouwê, durch got waz wil dû sagen?

Verse: 2121    dû machest mir den tac ze lanc.
Verse: 2122    nim daz in dînen gedanc

Verse: 2123    daz ichn noch od morgen sehe'
Verse: 2124    'wie welt ir, vrouwe, daz daz geschehe?

Verse: 2125    ich entrœst iuch nihtes dar an:
Verse: 2126    sô snel ist dehein man

Verse: 2127    noch niht âne gevidere
Verse: 2128    daz hin und her widere

Verse: 2129    möhte komen in sô kurzer vrist.
Verse: 2130    ir wizzet wol wie verre dar ist.'

Verse: 2131    'so volge mînem râte.
Verse: 2132    mîn garzûn loufet drâte:

Verse: 2133    im endet ie ze vuoz ein tac
Verse: 2134    daz einer in zwein gerîten mac.

Verse: 2135    ouch hilfet im der mânschîn:
Verse: 2136    er lâze die naht einen tac sîn.

Verse: 2137    Ouch sint die tage unmâzen lanc.
Verse: 2138    sag im, er hât sîn iemer danc,

Verse: 2139    und daz ez im lange vrumt,
Verse: 2140    ob er morgen wider kumt.

Verse: 2141    heiz in rüeren diu bein,
Verse: 2142    und mache vier tage ze zwein.

Verse: 2143    er laz im nû wesen gach,
Verse: 2144    unde ruowe dar nâch

Verse: 2145    swie lange sô er welle.
Verse: 2146    nû liebe imz, trûtgeselle.'

Verse: 2147    Sî sprach 'vrouwe, daz sî getan.
Verse: 2148    Ouch sult ir ein dinc niht lân:

Verse: 2149    besendet iuwer liute
Verse: 2150    morgen unde hiute.

Verse: 2151    ir næmet übele einen man,
Verse: 2152    dâne wære ir rât an.

Verse: 2153    swer volget guotem râte,
Verse: 2154    dem misselinget spâte.

Verse: 2155    swaz der man eine tuot,
Verse: 2156    und enwirtz dar nâch niht guot,

Verse: 2157    sô hât er in zwei wîs verlorn:
Verse: 2158    er duldet schaden und vriunde zorn.'

Verse: 2159    sî sprach 'trûtgeselle, ouwê,
Verse: 2160    ich vürht ez mir niht wol ergê:

Verse: 2161    ezn ist lîhte niht ir rât.'
Verse: 2162    'vrouwe mîn, die rede lât.

Verse: 2163    irn habet niender selhen helt
Verse: 2164    ern lâze iuch nemen swen ir welt,

Verse: 2165    ê er iu den brunnen bewar.
Verse: 2166    diu rede ist ûf ir wege gar.

Verse: 2167    Ouwî sî sint des vil vrô
Verse: 2168    daz sî der lantwer alsô

Verse: 2169    über werden müezen:
Verse: 2170    sî bietent sich ziuwern vüezen,

Verse: 2171    swenne sî iuwer rede vernement,
Verse: 2172    und bitent iuch daz ir in nement.'

Verse: 2173    sî sprach 'nû sende den garzûn hin:
Verse: 2174    die wîle wil ouch ich nâch in

Verse: 2175    mînen boten senden,
Verse: 2176    daz wir die rede verenden.'

Verse: 2177    Sî het in schiere besant:
Verse: 2178    wan er was dâ zehant.

Verse: 2179    der garzûn tete als sî im beschiet,
Verse: 2180    er hal sich als sî im geriet:

Verse: 2181    wan er was gemachet unde gereit
Verse: 2182    zaller guoten kündekheit,

Verse: 2183    er kunde ir helfen liegen
Verse: 2184    und âne schalkheit triegen.

Verse: 2185    dô sich diu vrouwe des versach
Verse: 2186    daz dâ niender geschach,

Verse: 2187    daz der garzûn wære under wegen,
Verse: 2188    dô begunde diu maget des rîters pfleg

Verse: 2189    als ir got iemer lône.
Verse: 2190    sî bât in harte schône.

Verse: 2191    ouch was dâ gereit
Verse: 2192    wol drîer hande cleit,

Verse: 2193    grâ, härmîn, unde bunt:
Verse: 2194    wan des was der wirt zaller stunt

Verse: 2195    gewarnet als ein hövesch man
Verse: 2196    der wol des lîbes pflegen kan

Verse: 2197    und ders ouch guote state hât;
Verse: 2198    dô welte sî im die besten wât

Verse: 2199    unde leite in die an.
Verse: 2200    des andern âbendes gienc sî dan

Next part


This text is part of the TITUS edition of Hartmann, Iwein.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.